10-Jul-2025

ବିନିକା(ହିମାଂଶୁ ଶେଖର ପୁଟେଲ )ବିନିକା ସରସ୍ଵତୀ ଶିଶୁ ବିଦ୍ୟା ମନ୍ଦିର ରାସ୍ତା ସମସ୍ତଙ୍କ ପାଇଁ ବିପଦପୂର୍ଣ୍ଣ ସାଜିଛି ।ଏନେଇ ଆଜି ବିଭିନ୍ନ ଖବରକାଗଜରେ ଖବର ପ୍ରକାଶ ପାଇବା ପରେ ବହୁ ସ୍ଵେଚ୍ଛାସେବୀ ସୋସିଆଲ ମିଡିଆରେ ଭାଇରାଲ କରିଥିବା ବେଳେ ରମେଶ ମେହେର ନାମକ ଜଣେ ସାମାଜିକ କର୍ମୀ ରାସ୍ତାର ଅବସ୍ଥା ତୁରନ୍ତ ସମାଧାନ ନେଇ ମାନ୍ୟବର ମୁଖ୍ୟମନ୍ତ୍ରୀ ଓଡ଼ିଶା ସରକାର,ମୁଖ୍ୟ ଶାସନ ସଚିବ,ଏଚୟୁଡିଡି ବିଭାଗ ଓଡ଼ିଶା ଏବଂ ସ୍ଥାନୀୟ ଏନଏସି ପ୍ରଶାସନକୁ ଜଣାଇଛନ୍ତି।ଖବର ପ୍ରକାଶ ପାଇବାର ୨୪ଘଣ୍ଟା ବିତି ଯାଇଥିଲେ ମଧ୍ୟ ରାସ୍ତାର ଅବସ୍ଥା ଯଥା ପୂର୍ବମ ତଥା ପରମ ହୋଇ ରହିଛି ।ଚିରା ଚିରା ହୋଇ ସିମେଣ୍ଟ କଂକ୍ରିଟ ଫାଟି ବିଭିନ୍ନ ସ୍ଥାନରେ ଛୋଟ ବଡ଼ ଗର୍ତ୍ତ ସୃଷ୍ଟି ହୋଇ ବର୍ଷା ପାଣି ଭରି ରହିଛି ।ରାସ୍ତାରେ ଦୈନନ୍ଦିନ ହଜାର ହଜାର ଛାତ୍ରଛାତ୍ରୀ ସ୍କୁଲ,କଲେଜ କୁ ପଡ଼ିବା ପାଇଁ ଯାଉଛନ୍ତି ।ସଙ୍କୁଚିତ ଦଦରା ରାସ୍ତା ସହିତ ଉଭୟ ପାର୍ଶ୍ୱରେ ଅନାବନା ଗଛ ଲତା ଯୋଗୁଁ ବିଭିନ୍ନ ସମୟରେ ଯିବା ଆସିବା କରୁଥିବା ସ୍କୁଲ ଯାନବାହନ,ବାଇକ ଆରୋହୀଙ୍କ  ପାଇଁ ସାଇଟ୍ ଦେବା ସମସ୍ୟା ସୃଷ୍ଟି କରିଛି।ପୁଣି କେତେବେଳେ ଗାଡ଼ି ଗୁଡିକ ସାଇଟ୍ ଦେବା ବେଳେ ସାଇକଲ ଯୋଗେ ଯାଉଥିବା ଛାତ୍ରଛାତ୍ରୀ ମାନେ ପାଣି ଭର୍ତ୍ତି ଗର୍ତ୍ତରେ ପଡ଼ୁଛନ୍ତି ତ ଆଉ କେତେବେଳେ ନିଜର ସୁରକ୍ଷା ପାଇଁ ରାସ୍ତା ପାର୍ଶ୍ବ ଚାଷ ଜମିକୁ ଓହ୍ଲାଇ ବାକୁ ବାଧ୍ୟ ହୋଇଥାନ୍ତି ।ସରକାର ରାସ୍ତା ଉନ୍ନତିକରଣ ପାଇଁ କୋଟି କୋଟି ଟଙ୍କା ଅନୁଦାନ ଯୋଗାଇ ଖର୍ଚ୍ଚ କରୁଛନ୍ତି ହେଲେ ସହରକୁ ସଂଯୋଗ ଏହି ସଙ୍କୁଚିତ ୩କିମି ସିମେଣ୍ଟ କଂକ୍ରିଟ ରାସ୍ତାର ମରାମତି କିମ୍ବା ନବୀକରଣ କାର୍ଯ୍ୟ ପ୍ରତି ବିଭାଗୀୟ କର୍ତୃପକ୍ଷ ସମ୍ପୂର୍ଣ୍ଣ ଅଣଦେଖା କରି ଆସୁଛନ୍ତି । ବିଶେଷ କରି ଏହି ରାସ୍ତା ଛାତ୍ରଛାତ୍ରୀଙ୍କ ପାଇଁ।ତେଣୁ ବିପଦପୂର୍ଣ୍ଣ ସାଜିଥିବା ଏହି ରାସ୍ତାର ଅବସ୍ଥାକୁ ଯୁଦ୍ଧକାଳୀନ ଭିତ୍ତିରେ ସମାଧାନ ଦିଗରେ ପ୍ରଶାସନ ପଦକ୍ଷେପ ନେବା ଆବଶ୍ୟକ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି ।