14-Jun-2025

ଅତାବିରା(ଆକାଶ ମିଶ୍ର): ପରିବେଶ ସନ୍ତୁଳନ ରକ୍ଷା କରିବା ପାଇଁ ଗ୍ରାମବାସୀଙ୍କ ପକ୍ଷରୁ ସୃଷ୍ଟି କରାଯାଇଥିବା ଗ୍ରାମ୍ୟ ଜଙ୍ଗଲ କୁ ଦୁର୍ବୃତ୍ତ ମାନେ କାଟି ଦେଇଛନ୍ତି। ଏ ହେଉଛି ବରଗଡ଼ ଜିଲ୍ଲା   ଅତାବିରା ବ୍ଲକ ଟାଙ୍ଗର ପାଲି  ପଞ୍ଚାୟତ ଅନ୍ତର୍ଗତ  ନୂଆପଡ଼ା ଗାଁର ଗ୍ରାମ୍ୟ ଜଙ୍ଗଲର ଦୃଶ୍ୟ। ସୂଚନାଯୋଗ୍ୟ ଯେ, ପ୍ରାୟ ୨୫/୩୦ ବର୍ଷ ତଳେ ଗ୍ରାମବାସୀଙ୍କ ପକ୍ଷରୁ  ସରକାରୀ ଜଙ୍ଗଲ ସୀମାକୁ ଲାଗି ରହିଥିବା ଦୁଇଶହ ଏକର ଗୋଚର ଜମିରେ ମୂଲ୍ୟବାନ ଗଛ ଗୁଡ଼ିକ ରୋପଣ  କରିଥିଲେ । ଏହାର ରକ୍ଷଣ ବେକ୍ଷଣ ପାଇଁ ପ୍ରଥମେ ଗ୍ରାମ ର ଚିନି କିରୋସିନି  ଡିଲରରୁ ୫୦ ପଇସା ଲେଖାଏଁ ସଞ୍ଚୟ  କରି ସେହି ପଇସାରେ ଜଣେ ଜଗୁଆଳି ରଖିଥିଲେ । ଗ୍ରାମବାସୀ  ପରିଶ୍ରମ କରି  ଏହି ଜଙ୍ଗଲ ର ଗଛ ଗୁଡ଼ିକ ର ଯତ୍ନ ନେଇ ଆସୁଥିଲେ। ଆଜି ସେହି

ଗଛ ଗୁଡ଼ିକ  ବଡ଼  ବଡ  ହୋଇ ଘଞ୍ଚ ଜଙ୍ଗଲରେ ପରିଣତ ହୋଇଥିଲା ।ଗଛ ଗୁଡ଼ିକ ବଢିବା ପରେ ଆଉ ଜଗୁଆଳି ରଖି ନାହାନ୍ତି । ହେଲେ ଦୁଇ ତିନ ଦିନ ହେଲା  କିଛି ଦୁର୍ବୃତ୍ତ ମାନେ ଆସି ଦିନ ବେଲା ଶବ୍ଦ ବିହୀନ ଯନ୍ତ୍ରରେ ଗଛ କାଟି ପ୍ରାୟ ୬ ରୁ ୭ ଟ୍ରିପ ଗଛ ନେଇ ସାରିଥିଲେ । କାଲି ପ୍ରାୟ ସନ୍ଧ୍ୟା ୫ ଟାରେ ଗ୍ରାମବାସୀ ତାଙ୍କୁ ଧରିଥିଲେ । ଗୋଟିଏ କାର ନଂ ଓଡି ୧୫ ଡବ୍ଲୁ ୦୬୬୯ ସହ କଟା ଗଛ ବୋଝେଇ ହୋଇଥିବା ସୋନପୁର ର ଏକ ଟ୍ରକ ନଂ ଓଡ଼ି ୩୧ ଏମ୍ ୪୮୦୦  ଓ ଗୋଟିଏ  ସ୍ବରାଜ ଟ୍ରାକ୍ଟର  ନଂ ଓଡ଼ି ୧୭ ଏ ସି୬୯୭୨ରେ ମୂଲ୍ୟବାନ ଶାଳ ଓ  ଆକାସିଆ ଗଛକୁ କାଟି  ନେବାକୁ ଉଦ୍ୟମ କରୁଥିବା ବେଳେ ଗ୍ରାମବାସୀ ତାଙ୍କୁ କାବୁ  କରିନେଇ ଗାଡ଼ି କୁ ଅଟକାଇ ରଖିଥିଲେ ।  କାର ରେ  ଜଣେ ଝିଅ  ଓ ଜଣେ ପୁରୁଷ ଥିଲେ । ସେମାନେ  ଗ୍ରାମବାସୀ ଙ୍କ ସହ ପାଟିତୁଣ୍ଡ କରି, ଜମି  ଆମର ବୋଲି କହିଥିଲେ  ଓ ସେଠାରୁ ଚମ୍ପଟ ମାରିଥିଲେ ।ଜମି ଯଦି ତାଙ୍କର ,ତେବେ ସେମାନେ କାହିଁକି ସେଠାରୁ ପଳାୟନ କରିଥିଲେ ?  ଜମିର ମାଲିକ ଯଦି ସେମାନେ, ତାଙ୍କ ପାଖରେ କାହିଁକି  ଜଙ୍ଗଲ ବିଭାଗର ଅର୍ଡର ନଥିଲା ଗଛ କାଟିବା ପାଇଁ ? ଟ୍ରକ ଡ୍ରାଇଭର ଅଶୋକ ସାହୁ କୁ କେବଳ  ଗ୍ରାମବାସୀ ଅଟକାଇ ରଖିଛନ୍ତି ।ଟ୍ରାକ୍ଟର ଡ୍ରାଇଭର ମଧ୍ୟ ଫେରାର ମାରିଛି । ଯେତେଦିନ ପର୍ଯ୍ୟନ୍ତ ଟ୍ରକ୍ ମାଲିକ ନ ଆସିବେ,ସେତେଦିନ ପର୍ଯ୍ୟନ୍ତ ଛଡାଯିବ ନାହିଁ ବୋଲି ଗ୍ରାମବାସୀ କହିଛନ୍ତି । ଏହି ଗଛ ଗୁଡିକ ଦିନବେଳେ କାଟୁ ଥିଲେ ମଧ୍ୟ ବନ ବିଭାଗ ନଜରରେ ନ ପଡିବା ପରିତାପର ବିଷୟ। ଏନେଇ ପରିବେଶବିତ ଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।  କମଗାଁ  ରେଞ୍ଜର ଅଧିନସ୍ଥ ଏହି ଗ୍ରାମ୍ୟ ଜଙ୍ଗଲ ଟି ଥିବାରୁ   ରେଞ୍ଜର ଅଫିସ କୁ ଖବର ଦେବାପରେ  ଜଙ୍ଗଲ ବିଭାଗର ସରକାରୀ  ଅଧିକାରୀ କୈଳାଶ  ମାଝୀ ପହଞ୍ଚି ଏହାର ତଦନ୍ତ କରିଥିଲେ ।କିନ୍ତୁ ବିଡ଼ମ୍ବନାର ବିଷୟ ଯେ ,ତାଙ୍କୁ ମଧ୍ୟ ଜଣା ନାହିଁ ଯେ ଗଛ କଟାଯାଇଥିବା ଜମି ଟି କାହାର ବୋଲି !କୌଣସି  ବ୍ୟକ୍ତି ବିଶେଷଙ୍କ ର ନା ସରକାରୀ  ଜମି ରୁ ଗଛ କଟାଯାଇଛି ,ତାହା ଜାଣିବା ପାଇଁ ସେ ଜମି ମାପ ପାଇଁ  ରାଜସ୍ବ ଅଧିକାରୀ ଙ୍କୁ ଡାକିଛନ୍ତି ।ହେଲେ କାଲି ସନ୍ଧ୍ୟା ରୁ ଆଜି ସନ୍ଧ୍ୟା ,ଦୀର୍ଘ ୨୪  ଘଣ୍ଟା ବିତିଯାଇଥିଲେ  ମଧ୍ୟ ଜମି ଚିହ୍ନଟ ପାଇଁ ରାଜସ୍ବ ଅଧିକାରୀ ପହଞ୍ଚି ନାହାନ୍ତି। ତେଣୁ ଜଙ୍ଗଲ ବିଭାଗର ମଧ୍ୟ ହାତ ରହିଛି ଗଛଚୋରୀରେ ବୋଲି ଗ୍ରାମବାସୀଙ୍କ ମଧ୍ୟରେ ଚର୍ଚ୍ଚା ହେଉଛି ।  ଯଦି ଗ୍ରାମବାସୀ  ଙ୍କୁ ଜଙ୍ଗଲ ବିଭାଗ ଭୁଆଁ ବୁଲାଇ ଦେଇ ପାରୁଛନ୍ତି , ତେବେ ଯଦି ବ୍ୟକ୍ତିଗତ କାହାର ଜଙ୍ଗଲରୁ ଏପରି ଚୋରି ହୁଏ ତେବେ ଜଙ୍ଗଲ ବିଭାଗ କଣ ତାର କଥା ବୁଝିବେ !  ଜଙ୍ଗଲ ବିଭାଗୀୟ ଅଧିକାରୀ ଙ୍କୁ ପଚାରିଲେ କହୁଛନ୍ତି  ତଦନ୍ତ ଚାଲିଛି ।କିନ୍ତୁ ତାହା ମଧ୍ୟ ସତ ନା ମିଛ ,ଗ୍ରାମବାସୀ ଙ୍କ ପାଇଁ ପ୍ରଶ୍ନବାଚୀ ହୋଇ ରହିଛି ।  ଏତେ ବଡ଼ ଅପରାଧ କରୁଥିବା ଅପରାଧୀ ମାନେ

ବିନ୍ଦାସ ଖସି ପଳାଉଛନ୍ତି, ହେଲେ ଜଙ୍ଗଲ ଜୀବିକା କରୁଥିବା ଗରିବ ଲୋକଙ୍କ ଉପରେ ଜଙ୍ଗଲ ବିଭାଗ ତାର  ତୁଫାନ ଦେଖାଇ କାଣିବିରାଡ଼ିର କୁଜି  ଅସରପା ଉପରେ ରାଗ  ପରି   ଜୋରିମାନା କରି ନିଜ ପଦବୀର ଇଜ୍ଜତ ସମ୍ଭାଲୁଛନ୍ତି । ଗ୍ରାମବାସୀଙ୍କ ଶ୍ରମ ଓ ସପ୍ନର ଜଙ୍ଗଲକୁ ଦୁର୍ବୃତ୍ତ ମାନେ ଧୂଳିସାତ କରିଦେଇଛନ୍ତି, ହେଲେ ଜଙ୍ଗଲ ବିଭାଗର ସକ୍ରୀୟତା ସେତେ ପରିମାଣରେ ଦେଖାଯାଉ ନ ଥିବା ନେଇ, ପ୍ରକୃତିର ରକ୍ଷକ  ଭକ୍ଷକ ସାଜିଛନ୍ତି ବୋଲି  ଗ୍ରାମବାସୀଙ୍କ ମନରେ କ୍ଷୋଭ ପ୍ରକାଶ ପାଉଛି । ନିଜ ବ୍ୟକ୍ତିଗତ ଜମିରୁ ଗଛ କାଟିଲେ ଜଙ୍ଗଲ ବିଭାଗରୁ ଅନୁମତି ନେବାକୁ ପଡ଼ୁଥିବା ବେଳେ ସରକାରୀ ଜଙ୍ଗଲକୁ ଲାଗି ରହିଥିବା ଗ୍ରାମ୍ୟ ଜଙ୍ଗଲରୁ  ଦିନ ଦହାଡା ଗଛଚୋରି, ଜଙ୍ଗଲ ବିଭାଗର ନିଷ୍କ୍ରିୟତା ପ୍ରତି  ପ୍ରଶ୍ନ ବାଚି ସୃଷ୍ଟି  ଉଠୁଛି lତେବେ ଦେଖାଯାଉ ଏଥିପ୍ରତି ଜଙ୍ଗଲ ବିଭାଗ କେତେ ସମ୍ବେଦନଶୀଳ,କେତେ ଦାୟିତ୍ୱବୋଧ  ପ୍ରଦର୍ଶନ କରୁଛନ୍ତି ନା ନିଷ୍କ୍ରିୟତା ପ୍ରଦର୍ଶନ କରି ଅସାଧୁ ବ୍ୟକ୍ତିଙ୍କୁ  ପ୍ରୋତ୍ସାହନ ଯୋଗାଉଛନ୍ତି ?