29-May-2025

ଅମ୍ବାଭୋନା(ପ୍ରକାଶ ଚନ୍ଦ୍ର ରଥ) ବରଗଡ ଜିଲ୍ଲା ଅମ୍ବାଭୋନା ବ୍ଲକ ଅଧିନସ୍ଥ ଅମ୍ବାଭୋନା ମୁଖ୍ୟ ଡ଼ାକଘର ଜରିଆରେ ଜନତାଙ୍କ ପାଖକୁ ଆସୁଥିବା ଚିଠି ତଥା ଅନ୍ୟାନ୍ୟ ପାର୍ସଲ ଲୋକଙ୍କ ପାଖରେ ଠିକ୍ ସମୟରେ ନ ପହଁଞ୍ଚିବା ଯୋଗୁଁ ଜନସାଧାରଣ ଅନେକ ସମୟରେ ହଇରାଣ ହେଉଛନ୍ତି।ଏମିତି ଏକ ଘଟଣା ସାମ୍ନାକୁ ଆସିଛି ଅମ୍ବାଭୋନା ଗ୍ରାମର ଉଷା ନାଏକଙ୍କ କ୍ଷେତ୍ରରେ।ତାଙ୍କର କହିବା ଅନୁସାରେ ଉଷା ନାଏକ ଙ୍କ ନାମରେ ୨୦୨୩ ସେପ୍ଟେମ୍ବର ମାସରୁ ଭାରତୀୟ ଷ୍ଟେଟ୍ ବ୍ୟାଙ୍କ ର ଅମ୍ବାଭୋନା ଶାଖାରେ ଏଟିଏମ୍ କାର୍ଡ଼ ପାଇଁ ଆବେଦନ କରାଯାଇଥିଲା।ଯାହା ତାଙ୍କୁ ଆଜି ପର୍ଯ୍ୟନ୍ତ ମିଳିପାରି ନାହିଁ। କୌଣସି କାରଣରୁ ତାଙ୍କ ମୋବାଇଲକୁ ଏଟିଏମ୍ କାର୍ଡ଼ର ସୂଚନା ମଧ୍ୟ ଆସି ନ ଥିବାରୁ ସେ ଏଟିଏମ୍ କାର୍ଡ଼ର ସ୍ଥିତି କଣ ଜାଣି ପାରି ନ ଥିଲେ। ଗତ ମଇ ୨୬ ତାରିଖରେ ସେ ଅମ୍ବାଭୋନା ଷ୍ଟେଟବ୍ୟାଙ୍କ ଶାଖା କୁ ଯାଇ ପୁନର୍ବାର ଏଟିଏମ୍ କାର୍ଡ଼ ପାଇଁ ଆବେଦନ କରିବାରୁ ବ୍ୟାଙ୍କ ଅଧିକାରୀ ତାଙ୍କୁ ପୁରୁଣା ଏଟିଏମ୍ କାର୍ଡ଼କୁ ପ୍ରଥମେ ବ୍ଲକ୍ କରିବାକୁ କହିଥିଲେ। ମାତ୍ର ଉଷା ନାଏକ ଙ୍କ ପାଖରେ ପୁରୁଣା କାର୍ଡ଼ ଏପର୍ଯ୍ୟନ୍ତ ପହଁଞ୍ଚି ପାରି ନାହିଁ। ବ୍ୟାଙ୍କ କର୍ମଚାରୀ ଙ୍କୁ କହିବାରୁ ବ୍ୟାଙ୍କ ଅଧିକାରୀ ଟ୍ରାକିଂ ଆଇଡି ଦେଇ ପୋଷ୍ଟ ଅଫିସରେ ଯାଞ୍ଚ କରିବାକୁ କହିଥିଲେ। କିନ୍ତୁ ଅମ୍ବାଭୋନା ପୋଷ୍ଟ ଅଫିସ ତରଫରୁ ତାଙ୍କୁ ୬ ମାସ ପୂର୍ବର କିଛି ଯାଞ୍ଚ କରାଯାଇ ପାରିବ ନାହିଁ ବୋଲି ରୋକଠୋକ୍ ଶୁଣାଇ ଦିଆ ଯାଇଥିଲା। କାର୍ଡ଼ଟି ପୋଷ୍ଟ ଅଫିସକୁ ଆସିଛି ନା ନାହିଁ ତାହା ଜାଣିବାକୁ ଚାହିଁଥିଲେ ହେଁ  ଖୋଜିବାକୁ ଆଦୌ ଚେଷ୍ଟା କରାଯାଇ ନ ଥିଲା ଏବଂ ପୁଣି ଥରେ ବ୍ଯାଙ୍କରେ ଯାଇ ଏଟିଏମ୍ କାର୍ଡ଼ ପାଇଁ ଆବେଦନ କରିବାକୁ କୁହାଯାଇଥିବା ସେ ଅଭିଯୋଗ କରିଛନ୍ତି। ଉଷା ନାଏକ ଜଣେ ବିଧବା ମହିଳା ଅଟନ୍ତି। ତାଙ୍କୁ ଭତ୍ତା ଉଠାଇବାରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା  ଏବଂ ପୂର୍ବରୁ ୨୦୧୮ ମସିହାରେ ମଧ୍ୟ ଆବେଦନ କରିଥିଲେ ସୁଦ୍ଧା ସେ ସମୟରେ ମଧ୍ୟ ଏଟିଏମ୍ କାର୍ଡ଼ ଟି ତାଙ୍କ ପାଖରେ ପହଞ୍ଚି ନ ଥିବା କହିଛନ୍ତି।ପ୍ରକାଶଯୋଗ୍ୟ ଯେ, ଅମ୍ବାଭୋନା ପୋଷ୍ଟ ଅଫିସ ତରଫରୁ ଚିଠି ପତ୍ର କିମ୍ବା ପାର୍ସଲ ଆସିଲେ ଲୋକଙ୍କୁ ଫୋନ୍ କରି ଅମ୍ବାଭୋନା ପୋଷ୍ଟ ଅଫିସକୁ ଆସି ନେବା ପାଇଁ କୁହାଯାଉଥିବା ଏବଂ ଅନ୍ୟ ବ୍ୟକ୍ତିଙ୍କ ହାତରେ ପାର୍ସଲ ପଠା ଯାଉଥିବା ଚର୍ଚ୍ଚା ହେଉଛି।ଅମ୍ବାଭୋନା ପୋଷ୍ଟ ଅଫିସ କର୍ମଚାରୀଙ୍କ ମନମୁଖୀ ଏବଂ ଦାୟିତ୍ୱହୀନତା ଯୋଗୁଁ ଧୀରେ ଧୀରେ ଭାରତୀୟ ଡାକବିଭାଗର  ବିଶ୍ୱସନୀୟତା ଉପରେ ପ୍ରଶ୍ନ ଚିହ୍ନ ଲାଗିଥିବା ଚର୍ଚ୍ଚା ହେଉଛି। ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।