02-May-2025

ବଲାଙ୍ଗିର(ପ୍ରେରଣା ଖବର): ବଲାଙ୍ଗିରରେ ବିଦ୍ୟୁତ୍ ବିଭାଗର ମେରୀମର୍ଜି ଶାସନରେ ସହରବାସୀ ହନ୍ତସନ୍ତ। ସପ୍ତାହକୁ ଗୋଟିଏ ଦିନ ବିଦ୍ୟୁତ୍ ବିଭାଗ ରକ୍ଷଣାବେକ୍ଷଣା ନାମରେ ୭/୮ ଘଣ୍ଟା ପର୍ଯ୍ୟନ୍ତ ବିଦ୍ୟୁତ୍ ସରବରାହ ବନ୍ଦ କରୁଥିବା ବେଳେ ଦିନ ତମାମ ବିଦ୍ୟୁତର ଲୁଚକାଳି ଖେଳରେ ସହରବାସୀ ବେହାଲ।ଗୋଟିଏ  ପଟେ ଭୀଷଣ ରୌଦ୍ରତାପରେ ଜନଜୀବନ ଅସ୍ତବ୍ୟସ୍ତ ହେଉଥବା ବେଳେ ଅନ୍ୟପଟେ ବିଦ୍ୟୁତ୍ ବିଭାଗର ବିଭିନ୍ନ ସମୟରେ ଆଳ ଦେଖାଇ ମେରିମର୍ଜି ଶାସନରେ ବେଧଡକ ବିଦ୍ୟୁତ୍ କାଟ୍ କରୁଥିବାରୁ ସହରରେ ଜନଅସନ୍ତୋଷ ଦେଖା ଦେଇଛି। ସାଧାରଣ ପବନ ହେଲେ ଘଣ୍ଟାଘଣ୍ଟା ଧରି ବିଦ୍ୟୁତ୍ ଉଭେଇ ଯାଉଥିବା ଦେଖିବାକୁ ମିଳୁଛି। ବିଦ୍ୟୁତ୍ ରକ୍ଷଣା ବେକ୍ଷଣା ତଥା ଅନେକ ସମୟରେ ଘଣ୍ଟା ଘଣ୍ଟା ଧରି ବିଦ୍ୟୁତ୍ ବିଚ୍ଛିନ୍ନ ହେଉଥିଲେ ମଧ୍ୟ ମାସ ପୁରିଲେ ହଜାର ହଜାର ଟଙ୍କା ବିଦ୍ୟୁତ୍ ବିଲ୍ ବାବଦରେ ପଇଠ କରିବାକୁ ପଡୁଛି। ତେବେ ଏଠି ବତ୍ତି ଗୋଲ ମିଟର ଚାଲୁ ହେଉନି ତ ? ବିଦ୍ୟୁତ୍ ବିଭାଗ ମେରୀମର୍ଜି ଶାସନରୁ ଦୂରେଇ ରହି ବିଦ୍ୟୁତ୍ ହିତାଧିକାରୀ ମାନଙ୍କ ସମସ୍ୟାର ଶୀଘ୍ର ସମାଧାନ ଦିଗରେ ତତ୍ପର ହେଲେ ସହରବାସୀ ଆଶ୍ୱସ୍ତି ଲାଭ କରିବେ ନଚେତ୍ ଆଗାମୀ ଦିନରେ ବିଦ୍ୟୁତ୍ ବିଭାଗର ମେରୀମର୍ଜି ଶାସନ ବିରୁଦ୍ଧରେ ସହରବାସୀ ସ୍ୱରତ୍ତୋଲନ କରିବା ପାଇଁ ପଛଘୁଞ୍ଚା ଦେବେନାହିଁ ବୋଲି ଚେତାବନୀ ଦେଇଛନ୍ତି।