30-Apr-2025

ଢେଙ୍କାନାଳ(ଉଦୟଭାନୁ ସାହୁ): ରାଜ୍ୟ ସରକାର ଗରିବ ଲୋକଙ୍କ ପାଖରେ ହାତ ପାହନ୍ତାରେ ଖାଉଟି ସାମଗ୍ରୀ ପହଞ୍ଚାଇବା ସହ ସଧାରଣ ଲୋକଟିଏ ଯେମିତି ଭୋକ ଉପାସରେ ନରହିବ ସେନେଇ ପ୍ରତିଶ୍ରୁତିବଦ୍ଧ। ରାଜ୍ୟରେ ପରିବାର ପ୍ରତି ସଦସ୍ୟଙ୍କୁ ମାସକୁ ପାଞ୍ଚ କେଜି ଚାଉଳ ଓ ଅନ୍ତୋଦୟ ଯୋଜନାରେ ପ୍ରତି ପରିବାରକୁ ମାସକୁ ୩୫ କେଜି ଚାଉଳ ସରକାର ପ୍ରତି ମାସରେ ଯୋଗାଇ ଦେଉଛନ୍ତି। ତେବେ ହିନ୍ଦୋଳ ନିର୍ବାଚନମଣ୍ଡଳିରେ ଦେଖାଦେଇଛି ପ୍ରତିଶୋଧମୂଳକ ରାଜନୀତି, ପ୍ରଭାବଶାଳୀ ରାଜନେତାଙ୍କ ହାତବାରିସୀ ସାଜିଛି ପ୍ରଶାସନ।ଜନସାଧାରଣ ତଥା ଖାଉଟିଙ୍କ ମୌଳିକ ଅଧିକାର ମୌଳିକ ସୁବିଧାକୁ ପାଦରେ ଦଳି ଦିଆଯାଉଛି ହିନ୍ଦୋଳରେ କେତେଜଣ ପ୍ରଭାବଶାଳି ପ୍ରତିଶୋଧ ପରାୟଣ ନେତାଙ୍କ ନିର୍ଦେଶରେ।  ରାସନ ସାମଗ୍ରୀ ପାଇଁ ହିନ୍ଦୋଳ ବ୍ଲକ ଉପଖଣ୍ଡ ଅସରଡ଼ା ପଞ୍ଚାୟତ ଅସରଡ଼ା ଗ୍ରାମବାସୀ ଅସନ୍ତୋଷ ସହ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି l
 ସୂଚନା ଅନୁଯୟୀ ଗ୍ରାମର ସରସ୍ଵତୀ ଦେହୁରୀଙ୍କ ନାମେ ୨୭ ବର୍ଷ ତଳେ ରାସନ ବିତରଣ କେନ୍ଦ୍ର ଥିବା ବେଳେ ଏହି ନିକଟରେ ଏହି କେନ୍ଦ୍ରରୁ ପାଉଥିବା ମୋଟ ୨୩୫ ଜଣ ହିତାଧିକାରୀଙ୍କୁ ନିକଟସ୍ଥ ବାରସିଂଗା ଗ୍ରାମକୁ ଯାଇ ସେଠାରୁ ରାସନ ସାମଗ୍ରୀ ଆଣିବାକୁ ସ୍ପଷ୍ଟ ସୂଚନା ଦେଇଛି ପ୍ରଶାସନ । ଫଳରେ ହିତାଧିକାରୀଙ୍କ ମନରେ ଅସନ୍ତୋଷ ପ୍ରକାଶ ପାଇଛି। ବାରସିଂଗା ଡିଲର ପଏଣ୍ଟଟି ବାରସିଂଗା ଗ୍ରାମଠାରୁ ପାଖାପାଖି ୨କିମି ହୋଇଥିବା ବେଳେ ବରିଷ୍ଠ ଵୟୋବୃଦ୍ଧ, ଦିବ୍ୟାଙ୍ଗ ଓ ଅସୁସ୍ଥ ନାଗରିକମାନେ ଏତେ ଦୂରରୁ ରାସନ ସାମଗ୍ରୀ ଆଣିବା କଷ୍ଟ କର ହୋଇ ପଡ଼ିବ ବୋଲି କହିଛନ୍ତି। ଗ୍ରାମରେ ବହୁ ଦିବ୍ୟାଙ୍ଗ ଥିବାବେଳେ ଆଉ କେତେକ ଛୋଟ ପରିବାରରେ କମ୍ ସଦସ୍ୟ ଥିବାବେଳେ ରାସନ ସାମଗ୍ରୀର ମୂଲ୍ୟ ଠାରୁ ଅଟୋ ଭଡା ଅଧିକା ହୋଇଯିବ। ସେହିଭଳି ଅସରଡ଼ାରୁ ବାରସିଂଗା କୁ ଯିବାକୁ ହେଲେ ଛୋଟ ଜଙ୍ଗଲ ଟିଏ ପଡୁଥିବାରୁ ଏଠାରେ ହାତୀ,ସାପ ଓ ହିଂସ୍ର ବନ୍ୟଜନ୍ତୁ ଭୟ ରହିଛି। ଏ ସମସ୍ତ ସମସ୍ୟାକୁ ନେଇ ଚଳିତ ମାସରେ ହିତାଧିକାରୀ ମାନେ ବାରସିଂଗା ଡିଲର ପଏଣ୍ଟରୁ ରାସନ ସାମଗ୍ରୀ ଗ୍ରହଣ କରି ନାହାନ୍ତି। ଅସରଡ଼ା ଗ୍ରାମର କୁନି ନାଏକ, ସାବିତ୍ରୀ ନାଏକ, ଚନ୍ଦ୍ରମଣି ନାଏକ, ବନ ବେହେରା, ଦିଗାମ୍ବର ସାହୁ,  ପ୍ରମିଳା ନାଏକ , ରବି ନାଏକ, ଗୁରୁବାରି ନାଏକ, ଅଭିରାମ ନାଏକ, କୋଇଲି ନାଏକ, ଜୁଆଣି ବେହେରା ପ୍ରମୁଖ କୁହନ୍ତି ଭୋକ ଉପବାସରେ ରହିବୁ ପଛେ ଏତେ ଦୂର ଯାଇ ରାସନ ସାମଗ୍ରୀ ଆଣିବା ଆମ ପକ୍ଷେ ସମ୍ଭବପର ନୁହଁ। ଏ ସମସ୍ୟା ନେଇ ହିତାଧିକାରୀ ମାନେ ହିନ୍ଦୋଳ ଉପଜିଲ୍ଲାପାଳ, ହିନ୍ଦୋଳ ବିଡ଼ିଓ, ଓ ଯୋଗାଣ ଅଧିକାରୀ ହିନ୍ଦୋଳଙ୍କୁ ଲିଖିତ ଭାବେ ଜଣାଇ ଥିବା କହିଛନ୍ତି।