26-Apr-2025

ବଲାଙ୍ଗୀର(ପ୍ରେରଣା ଖବର): ସ୍ଥାନୀୟ ସରକାରୀ ମହାବିଦ୍ୟାଳୟ, ବଲାଙ୍ଗିରର ଇତିହାସ ବିଭାଗ ସହକାରୀ ପ୍ରାଧ୍ୟାପକ ଓ ବିଭାଗ ମୁଖ୍ୟ ଡ଼. ଅମୃତ ସିଂ ବରିହାଙ୍କ( ୫୨) ଅକାଳ ବିୟୋଗ ବୁଧୁବାର ରାତି ୧.୧୫ମିନିଟରେ  ଘଟିଥିଲା | ଗତ କେତେ ଦିନ ହେଲା ସେ ଭୁବନେଶ୍ଵରସ୍ଥିତ ଏକ ଘୋରୋଇ ଡାକ୍ତରଖାନାରେ ପେଟ ଜନିତ ରୋଗର ଚିକିତ୍ସା ହେଇ ଘରକୁ ଫେରିଥିଲେ | କିନ୍ତୁ ରାତିରେ ହଠାତ୍ ତାଙ୍କ ଦେହ ଅସୁସ୍ଥ ହେବାରୁ ବଲାଙ୍ଗିର ଭୀମଭୋଇ ମେଡ଼ିକାଲ ଓ ହସ୍ପିଟାଲରେ ଭର୍ତ୍ତି ହୋଇଥିଲେ, ସେଠାରେ ଡାକ୍ତର ମୃତ ଘୋଷଣା କରିଥିଲେ | ସେ ବରଗଡ଼ ଜିଲ୍ଲା, ପଦମପୁର ନିକଟସ୍ଥ କମ୍ ସିଂହାରେ ଜନ୍ମ ଲାଭ କରି ସମ୍ବଲପୁର ବିଶ୍ଵବିଦ୍ୟାଳୟରୁ ଇତିହାସ ବିଷୟରେ ଏମ.ଏ. ଏମ. ଫିଲ୍ ତଥା ପିଏଚ. ଡି. ଡିଗ୍ରୀ ଗ୍ରହଣ କରିଥିଲେ  | ଜୟପୁର ସ୍ଥିତ ବିକ୍ରମ ଦେବ ମହାବିଦ୍ୟାଳୟରେ ନିଜର ଅଧ୍ୟାପନା ବୃତ୍ତି ଆରମ୍ଭ କରି ଗତ ୨୦୧୬ ମସିହାରେ ସହକାରୀ ପ୍ରାଧ୍ୟାପକ ଭାବରେ ସରକାରୀ ମହାବିଦ୍ୟାଳୟ ବଲାଙ୍ଗିର ଠାରେ ଅବସ୍ଥାପିତ ହୋଇଥିଲେ। | ସେ ଏକାଧାରରେ ଜଣେ ଅମାୟିକ, ସରଳ,ଉତ୍ତମ ଓ ଛାତ୍ର ବାତ୍ସଳ ଶିକ୍ଷକ ଥିଲେ | ବନ୍ଧୁତ୍ଵପୂର୍ଣ୍ଣ ବ୍ୟବହାର ତଥା ହସ ହସ ମୁଖ ସମସ୍ତଙ୍କୁ ଆକର୍ଷିତ କରୁଥିଲା |ବଲାଙ୍ଗୀର ଜିଲ୍ଲା ଯୁବ ରେଡ୍ କ୍ରସ୍ ଆବାହକ ସମ୍ପାଦକ ଭାବେ ଦାୟିତ୍ଵ ନିର୍ବାହ କରି ବିଭିନ୍ନ ମହାବିଦ୍ୟାଳୟରୁ ଉଚ୍ଚ ପ୍ରଶଂସିତ ହୋଇଥିଲେ | ତାଙ୍କ ଅକାଳ ବିୟୋଗରେ ମହାବିଦ୍ୟାଳୟରେ ଶୋକର ଛାୟା ଖେଳି ଯାଇଛି |