01-Apr-2025

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ ଜିଲ୍ଲା ବିଜେପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଗୋଷ୍ଠୀ ଜନସ୍ୱାସ୍ଥ୍ୟ ଅଧିକାରୀ ଡ଼ା.ସୁଶାନ୍ତ ମେହେରଙ୍କ ପ୍ରତ୍ୟକ୍ଷ ତତ୍ବାବଧାନରେ ଫାଇଲେରିଆ ରୋଗର ନିରାକରଣ ପାଇଁ ସାମୂହିକ ଭାବେ ଔଷଧ ସେବନ ପୂର୍ବରୁ ରାତିରେ ରକ୍ତ ନମୁନା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି।ପ୍ରଥମ ପର୍ଯ୍ୟାୟରେ ଅର୍ଡା ଗ୍ରାମରେ ରକ୍ତ ନମୁନା ସଂଗ୍ରହ ଓ ସାମୂହିକ ଔଷଧ ସେବନ ହୋଇ ସାରିଥିବାବେଳେ, ଦ୍ୱିତୀୟ ପର୍ଯ୍ୟାୟରେ ତା ୩୧.୦୩.୨୦୨୫ ରିଖ ରାତ୍ର ସମୟରେ ବିଜେପୁର ନିକଟସ୍ଥ ବାଉଁଶପଲା ଗ୍ରାମରେ ମୋଟ ୩୦୭ ଜଣଙ୍କ ରକ୍ତ ନମୁନା ସଂଗ୍ରହ କଲାପରେ ସାମୂହିକ ଔଷଧ ସେବନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଠାରେ ପ୍ରକାଶ ଯୋଗ୍ୟ ଯେ, ବରଗଡ଼ ଜିଲ୍ଲାରେ ଫାଇଲେରିଆ ନିରାକରଣ ସକାଶେ ଦିର୍ଘବର୍ଷ ହେବ ଏଇ ପ୍ରକ୍ରିୟା ଚାଲି ଆସୁଅଛି। କାର୍ଯ୍ୟକ୍ରମର ସଫଳତା ତଥା ଆବଶ୍ୟକତା ପରଖିବା ପାଇଁ ପୂର୍ବରୁ ବ୍ଲକର ନିର୍ଦ୍ଧିଷ୍ଟ କିଛି ଅଞ୍ଚଳରୁ ରାତି ସମୟରେ ଏଭଳି ରକ୍ତ ନମୁନା ସଂଗ୍ରହ କରା ଯାଇଥାଏ।ଏହି ଆଧାରରେ ବିଜେପୁର ବ୍ଲକର ସର୍ବମୋଟ ଚାରୋଟି ସ୍ଥାନରେ ରାତିରେ ରକ୍ତ ନମୁନା   ସଂଗ୍ରହ କରିବାର ଯୋଜନା ପ୍ରସ୍ତୁତ କରାଯାଇଛି। ପରବର୍ତ୍ତୀ ପର୍ଯ୍ୟାୟରେ ତା ୦୧.୦୪.୨୦୨୫ ରିଖ ମଙ୍ଗଳବାର ଅର୍ଥାତ୍ ଆଜି ଓ ତା ୦୨.୦୪.୨୦୨୫ ରିଖ ବୁଧବାର ଯଥାକ୍ରମେ ବିଜେପୁର ଓ ପଡ଼ା ଗ୍ରାମରେ ରାତିରେ ରକ୍ତ ନମୁନା ସଂଗ୍ରହ ଅଭିଯାନ ହେବ ବୋଲି ଜନସ୍ବାସ୍ଥ୍ୟ ସଂପ୍ରସାରଣ ଅଧିକାରୀ ଶ୍ରୀଯୁକ୍ତ ସୁଦାମ ଚରଣ ପାଣିଗ୍ରାହୀ ସୂଚନା ପ୍ରଦାନ କରିଛନ୍ତି।ଏଇ ପରିପ୍ରେକ୍ଷୀରେ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର କାର୍ଯ୍ୟରତ କର୍ମଚାରୀ ସୁପରଭାଇଜର ରଣଜିତ ବେହେରା, ଅମିତ କୁମାର ସାହୁ,ଏଲ.ଟି ପଦ୍ମଲୋଚନ ସାହୁ,ଏଲ.ଟି ରାଜେଶ ପ୍ରଧାନ, ମହିଳା ସ୍ୱାସ୍ଥ୍ୟ କର୍ମୀ ଶ୍ରୀମତୀ ପିରବତୀ ମାଝି, ମହିଳା ସ୍ୱାସ୍ଥ୍ୟ କର୍ମୀ କାବ୍ୟାକାନ୍ତୀ ଗିରି, ଆଶାକର୍ମୀ ଭାନୁମତୀ ତୁମନିଆ, ଅଙ୍ଗନବାଡ଼ି କର୍ମୀ ଶାନ୍ତିଲତା ଦାସ ଏବଂ ବିଳାସିନୀ ଷଣ୍ଢ ଆଦି ଯୋଗଦେଇ ସକ୍ରିୟ ଭାବରେ ସହଯୋଗ କରିଥିଲେ।