15-Jan-2021

ବଲାଙ୍ଗୀର,(ସନ୍ତୋଷ କୁମାର ଠାକୁର)-  ଆଜି ପୂର୍ବାହ୍ନ ଲିଟିରାରି ଏଣ୍ଡ ସୋସିଆଲ କ୍ଲବ ଠାରେ ଏକ ସାମୁହିକ ଶ୍ରଦ୍ଧାଞ୍ଜଳି ସମାରୋହ ପୂଜ୍ୟପୂଜା ସେବା ସଂଗଠନ ତରଫରୁ ଡ. ଅଶୋକ କୁମାର ସେଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଏ ସମାରୋହରେ ପଣ୍ଡିତ ଅଚ୍ୟୁତାନନ୍ଦ ଉଦ୍‌ଗାତା ପରିବାରର ୧୫ଜଣ ଦିବଂଗତଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା । ଏ ପାର୍ବଣରେ ରାଜେନ୍ଦ୍ର ସ୍ୱୟଂ ଶାସିତ କଲେଜର ପୂର୍ବତନ ଅଧ୍ୟକ୍ଷ ସତ୍ୟବନ୍ତ ବେଦ୍‌ବାକ୍ ମୁଖ୍ୟ ଅତିଥି, ଅଖିଳ ଭାରତୀୟ ବ୍ରାହ୍ମଣ ମହାସଭାର ସଭାପତି ପଣ୍ଡିତ ଜୟକୃଷ୍ଣ ଦାସ ଶର୍ମା ମୁଖ୍ୟବକ୍ତା ଭାବେ ଓ ପୂଜ୍ୟପୂଜା ସେବା ସଂଗଠନର ସଂପାଦକ ମଦନ ମୋହନ ରଥ ସମ୍ମାନିତ ଅତିଥି ଭାବରେ ଯୋଗଦେଇ ପୂର୍ବପୁରୁଷମାନଙ୍କୁ ଶ୍ରଦ୍ଧାରେ ଶ୍ରାଦ୍ଧ ଅର୍ପଣ ପୂର୍ବକ ଓ ଜିବିତ ଆତ୍ମୀୟ ସ୍ୱଜନମାନଙ୍କୁ ସେବାଯତ୍ନ କରି ସନ୍ତୁଷ୍ଟ କରାଯାଇପାରିବ ଏବଂ ଏହି କାର୍ଯ୍ୟ ଦ୍ୱାରା ପୂର୍ବପୁୁରୁଷଙ୍କ ଆତ୍ମୀୟ ସ୍ୱଜନଙ୍କ ଆଶିର୍ବାଦ ମିଳି ପାରିବ ବୋଲି ବକ୍ତାମାନେ ମତବ୍ୟକ୍ତ କରିଥିଲେ । ଏହି ସଭାରେ ଅଚ୍ୟୁତାନନ୍ଦ ଉଦ୍‌ଗାତା ଓ ଶିକ୍ଷାବିତ୍ ବିକ୍ରମ ମିଶ୍ର ମଧ୍ୟ ମତବ୍ୟକ୍ତ କରିଥିଲେ । ସଭା ଆରମ୍ଭରେ କବି ରତ୍ନମୟ ତ୍ରିପାଠି ଅତିଥି ପରିଚୟ କରିଥିବା ବେଳେ ସଭାକୁ ସଂଯୋଜନା କରିଥିଲେ କସ୍ତୁରୀ ରଥ । ବେଦ ପଠନ କରିଥିଲେ ପଣ୍ଡିତ ବ୍ରଜ ବିହାରୀ ତ୍ରିପାଠୀ, ଭଜନ ପରିବେଷଣ କରିଥିଲେ କବିତା ମିଶ୍ର ଓ ଧିରେନ୍ଦ୍ର ନାରାୟଣ ସିଂଦେଓ । ଏହି କାର୍ଯ୍ୟକ୍ରମକୁ  ସହଯୋଗ କରିଥିଲେ ମାଳତି ଉଦ୍‌ଗାତା, ଆଶିଷ ରଂଜନ ଉଦ୍‌ଗାତା, ଆଲୋକ ରଂଜନ ଉଦ୍‌ଗାତା, ଚିନ୍ମୟୀ ଉଦ୍‌ଗାତା, ସରିତା ଉଦ୍‌ଗାତା, ଚୁଡେନ୍ଦ୍ର କୁମାର ବେହେରା, ପ୍ରଦୀପ ପଶାୟତ, ଦୁର୍ଗା ଚରଣ ସାହୁ, ରାଜେଶ ସାହୁ ଓ ଧୃବ ଚରଣ ସାହୁ ଓ ଶେଷରେ ଅରୁଣ କୁମାର ଖୁଆସ ଧନ୍ୟବାଦ ଅର୍ପଣ କରିଥିଲେ ।