15-Jan-2021

ବଲାଙ୍ଗୀର (ସନ୍ତୋଷ କୁମାର ଠାକୁର ): ଲର୍କିପାଲି ସ୍ଥିତ ଓଡ଼ିଶା ସରକାରଙ୍କ କୃଷି ଓ କୃଷକ ସଶକ୍ତିକରଣ ବିଭାଗ ଆନୁକୁଲ୍ୟରେ ଜିଲ୍ଲାସ୍ତରୀୟ ମୁଖ୍ୟମନ୍ତ୍ରୀ ଅଭିନବ କୃଷି ଯନ୍ତ୍ରପାତି ସମ୍ମାନ ଚୟନ ଆୟୋଜିତ ହୋଇଯାଇଛି। ବଛା ଯାଇଥିବା ୬ ଜଣ ଚାଷୀମାନଙ୍କ ଦ୍ବାରା ନିଜସ୍ବ ଅଭିଜ୍ଞତା ଓ ଜ୍ଞାନ କୌଶଳ ପ୍ରୟୋଗ ଦ୍ୱାରା ନିର୍ମିତ ଅଭିନବ କୃଷି ଯନ୍ତ୍ରପାତି ଗୁଡିକୁ ଲର୍କିପାଲି ସରକାରୀ କୃଷି ଫାର୍ମ, ବଲାଙ୍ଗୀର ଠାରେ ଜିଲ୍ଲାସ୍ତରୀୟ ବିଚାରକ ମଣ୍ଡଳୀ ଉପସ୍ଥିତିରେ ପ୍ରଦର୍ଶନ କରାଯାଇଥିଲା । ଏହି କାର୍ଯ୍ୟକ୍ରମରେ ବଲାଙ୍ଗୀର ଜିଲ୍ଲାପାଳ ଶ୍ରୀଯୁକ୍ତ ଚଞ୍ଚଲ୍ ରାଣା ମୁଖ୍ୟ ଅତିଥି ରୂପେ ଯୋଗ ଦେଇ ମୁଖ୍ୟମନ୍ତ୍ରୀ ଅଭିନବ କୃଷି ଯନ୍ତ୍ରପାତି ସମ୍ମାନ କାର୍ଯ୍ୟକମ ଉପରେ ସମସ୍ତଙ୍କୁ ଅବଗତ କରାଇଥିଲେ । ଜିଲ୍ଲା ମୁଖ୍ୟ କୃଷି ଅଧିକାରୀ ଶ୍ରୀ ଅଶୋକ କୁମାର ମହାନ୍ତି, ଜିଲ୍ଲା କୃଷି ନିର୍ବାହୀ ଯନ୍ତ୍ରୀ ଶ୍ରୀ ଚୌଧୁରୀ ଦେବବ୍ରତ ଦାଶ, ଏହି କାର୍ଯ୍ୟକ୍ରମର ଗୁରୁତ୍ବ ଉପରେ ଚାଷୀ ମାନଙ୍କୁ ଆଲୋକପାତ କରାଇଥିଲେ । ଉକ୍ତ କାର୍ଯ୍ୟକ୍ରମରେ ଜିଲ୍ଲା କୃଷି ବିଭାଗର ଅନ୍ୟାନ୍ୟ ଅଧିକାରୀ , କୃଷି ବିଜ୍ଞାନ କେନ୍ଦ୍ରର ବରିଷ୍ଠ ବୈଜ୍ଞାନିକ ଓ ମୁଖ୍ୟ, ଜିଲ୍ଲାର ସମସ୍ତ ସହକାରୀ କୃଷି ନିର୍ବାହୀ ଯନ୍ତ୍ରୀ, ସହକାରୀ କୃଷିଯନ୍ତ୍ରୀ ଏବଂ ଅନ୍ୟ ବିଭାଗର ଜିଲ୍ଲାସ୍ତରୀୟ ବିଚାରକ ମଣ୍ଡଳୀର ସଭ୍ୟମାନେ ଯୋଗଦାନ କରିଥିଲେ।