13-Jan-2021

ବଲାଙ୍ଗିର,(ପ୍ରେରଣା ଖବର ବ୍ୟୁରୋ) :ବଲାଙ୍ଗିର ଜିଲ୍ଲା ତୁଷୁରା ଡାକ୍ତରଖାନାରେ ଏକ ଅଭାବନୀୟ ଘଟଣା ଘଟଣା ଘଟିଛି ।

    ସୂଚନାନୁଯାୟୀ  ଡାକ୍ତର ବଦଳରେ ନର୍ସ ଙ୍କ ଦ୍ୱାରା ପ୍ରସବ ପରେ ଛୁଆ ଜନ୍ମ ହେବା ଓ ପରେ ପ୍ରସୂତି ମହିଳାଙ୍କ ମୃତ୍ୟୁ ଘଟିଛି । ଉକ୍ତ  ନର୍ସଙ୍କ ଅବହେଳା ଯୋଗୁଁ ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ପରିବାର ଲୋକେ । ପ୍ରକାଶ ଯେ, ତୁଷୁରା ସହରର ରାମ ପଟ୍ଟନାୟକଙ୍କ ସ୍ତ୍ରୀ ସୁନିତା ପଟ୍ଟନାୟକ (୩୦)ଙ୍କୁ ଗତକାଲି ସକାଳ ପ୍ରାୟ ୧୦ଟା ସମୟରେ  ପ୍ରସବ ବେଦନା ଯୋଗୁଁ ତାଙ୍କୁ ତୁଷୁରା ଡ଼ାକ୍ତରଖାନକୁ ପରିବାର ଲୋକେ ନେଇ ଭର୍ତ୍ତି କରିଥିଲେ । ହେଲେ ଡ଼ାକ୍ତରଖାନାରେ ଡ଼ାକ୍ତର ନଥିବାରୁ ସେଠି ଥିବା  ନର୍ସ ମାନେ ଆମେ ସ୍ୱାଭାବିକ ଭାବେ ପ୍ରସବ କରେଇବୁ ଓ ଆମେ କରୁ ବୋଲି କହିଥିଲେ । ଡାକ୍ତର କେବଳ ଔଷଧ ଲେଖନ୍ତି କହି ପ୍ରସବ କରେଇଥିଲେ । ଏହାପରେ ସକାଳ ପ୍ରାୟ ୧୨ଟାରେ ସୁନୀତା ଏକ ଝିଅକୁ ଜନ୍ମ ଦେଇଥିଲେ । ଏହାର ଏକ ଘଣ୍ଟା ପରେ ସୁନୀତାଙ୍କୁ ପରିବାର ଲୋକ ଦେଖିବା ପାଇଁ ଭିତରକୁ ଯାଇଥିଲେ । ପରିବାର ଲୋକେ ଭିତରକୁ ଯାଇ ପ୍ରଚୁର ମାତ୍ରାରେ ରକ୍ତସ୍ରାବ ହେଉଥିବା ଦେଖିଥିଲେ ।  ଏହା ପରେ ନର୍ସ କହିଲେ ଯେ, ଅତ୍ୟଧିକ ରକ୍ତଶ୍ରାବ ହେଉଛି । ତେଣୁ ବଲାଙ୍ଗିର ନେଇଯାଆନ୍ତୁ । ଏହା କହିବାର ପ୍ରାୟ ୨ ଘଣ୍ଟା ପରେ ବଲାଙ୍ଗିର ସ୍ଥାନାନ୍ତର କରିଥିଲେ । କିଛି ଉପାୟ ନପାଇ ପରିବାର ଲୋକେ ତୁରନ୍ତ ବଲାଙ୍ଗିର ଡ଼ାକ୍ତରଖାନାକୁ ନେଇଥିଲେ । ସେଠାରେ ପହଂଚିବା ପରେ ଡ଼ାକ୍ତର କହିଥିଲେ ଯେ ପ୍ରଚୂର ପରିମାଣ ରେ ରକ୍ତଶ୍ରାବ ହୋଇଯାଇଛି ଏବେ ଆଉ କିଛି କରିହେବ ନାହିଁ, ଆମେ କିଛି କରି ପାରିବୁ ନାହିଁ । ଏହାର କିଛି ସମୟ ପରେ ସୁନୀତାଙ୍କ ମୃତ୍ୟୁ ହୋଇଥିଲା । ମୃତ ସୁନୀତାର ନବଜାତ କନ୍ୟା ସହ ଆଉ ଗୋଟିଏ ଝିଅ ରହିଛି । ରକ୍ତଶ୍ରାବ ହେଉଥିବା ଜାଣି ମଧ୍ୟ ୨ ଘଂଟା ବିଳମ୍ବରେ ବଲାଙ୍ଗିର ପଠାଇବା ଯୋଗୁଁ ମହିଳାଙ୍କ ମୃତ୍ୟୁ ହୋଇଥିବା ତାଙ୍କ ସ୍ୱାମୀ ରାମ ପଟ୍ଟନାୟକ ଅଭିଯୋଗ କରିଛନ୍ତି । ଏଠାରେ ସୂଚନାଯୋଗ୍ୟ ଯେ, ଡ଼ାକ୍ତରଙ୍କ ବିନା ଉପସ୍ଥିତିରେ କିପରି ଜଣେ ପ୍ରସବ  ମହିଳା ଙ୍କୁ ଡ଼ାକ୍ତରଖାନାରେ ଭର୍ତ୍ତି କରି ଜଣେ ମହିଳାର ଜୀବନ ସହ ଖେଳ ଖେଳିଲେ ବୋଳି ଜନସାଧାରଣରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି । ସେହିପରି ପୁଅ ଜନ୍ମ ହେଲେ ପାଞ୍ଚଶହ ଓ ଝିଅ ଜନ୍ମ ହେଲେ ତିନି ଶହ ଓ ଅପରେସନ କଲେ ଦୁଇ ହଜାର ଟଙ୍କା   ନେବା ଘଟଣା ଏହି ତୁଷୁରା ଡ଼ାକ୍ତରଖାନା ରେ ସବୁ ସମୟରେ ଚର୍ଚ୍ଚିତ ଥାଏ । ଏହି ମହିଳା ଙ୍କ ଠାରୁ ଟଙ୍କା ଲୋଭ ରେ ବିନା ଡାକ୍ତର ରେ ନର୍ସ ନିଜେ ଡାକ୍ତର ପାଲଟିବା ଯୋଗୁଁ ଏପରି ଅଭାବନୀୟ ଘଟଣା ଘଟିଛି ବୋଲି ଚର୍ଚ୍ଚା ଜୋର ଧରିଛି ।   ଅନ୍ୟପକ୍ଷରେ ମହିଳାଙ୍କୁ ଡ଼ାକ୍ତରଖାନାରେ ଭର୍ତ୍ତି କରିବା ପରେ ମଧ୍ୟ ରୋଗୀ ରେଜିଷ୍ଟରରେ ଏଣ୍ଟ୍ରି ନକରିବାର କାରଣ କ’ଣ ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି । ପ୍ରସବ ସମୟରେ ସୁପ୍ରଭା ନାଗ, ସ୍ୱାଧୀନବାଳା ଦେଇ ଓ ବର୍ଷାରାଣୀ ଛତ୍ରିୟା  ନର୍ସ ଦାୟିତ୍ୱରେ ଥିଲେ । ଏ ନେଇ ଡ଼ାକ୍ତରଖାନା ଦାୟିତ୍ୱରେ ଥିବା ଫାରମାସିଷ୍ଟ ଗୋପେଶ୍ୱର ସାହାଣୀ କହନ୍ତି ଯେ, ଏ ବିଷୟରେ ମୁଁ କିଛି ଜାଣି ନାହିଁ କି ନର୍ସମାନେ ମୋତେ ଜଣାଇ ନାହାନ୍ତି ଏବଂ ସେମାନେ ତାଙ୍କ ମର୍ଜିରେ କାର୍ୟ୍ୟ କରିଛନ୍ତି । ଏଠାରେ ସୂଚନାଯୋଗ୍ୟ ଯେ, ଗତ ତିନି ଦିନ ହେଲା ଡ଼ାକ୍ତର ଛୁଟିରେ ଥିବାବେଳେ କେବଳ ଜଣେ ଫାର୍ମାସିଷ୍ଟ ଭରସାରେ ତୁଷୁରା ଚିକିତ୍ସାଳୟ ଚାଲିବା ଘଟଣା ରୁ ସ୍ପଷ୍ଟ ଅନୁମେୟ ଯେ ସ୍ୱାସ୍ଥ୍ୟ ସେବା କିପରି ଚାଲିଛି ।   ଏ ନେଇ ଗୁଡ଼ଭେଲା ଗୋଷ୍‌ଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଡ଼ା.ସୁମୀତ ମେହେର କହନ୍ତି ଯେ, ମୁଁ ଘଟଣାର ତଦନ୍ତ କରୁଛି, ଯଦି ଘଟଣାଟି ସତ୍ୟ ହୋଇଛି ତେବେ ଦାୟୀତ୍ୱରେ ଥିବା ନର୍ସଙ୍କ ପ୍ରତି ଦୃଢ଼ କାର୍ୟ୍ୟନୁଷ୍ଠାନ  ଗ୍ରହଣ କରାଯିବ । ଅନ୍ୟପକ୍ଷରେ ଅବହେଲା କରିଥିବା ନର୍ସମାନଙ୍କ ଉପରେ ଦୃଢ଼ କାର୍ୟ୍ୟାନୁଷ୍ଟାନ ଗ୍ରହଣ କରିବା ପାଇଁ ଲୋକେ ଦାବୀ କରିଛନ୍ତି । ସରକାରୀ ଭାବେ କୋଟି, କୋଟି ଟଙ୍କା ସରକାର ବ୍ୟୟ ବରାଦ କରୁଥିବା ବେଳେ ସବୁ କାଗଜ କଲମ ରେ ସୀମିତ ରହିଛି । ଏପରି କି ଏହି କର୍ମଚାରୀ ନିଜ ମନଇଚ୍ଛା କାହାରିକୁ ଖାତିର ନ କରି ଖୋଲା, ଖୋଲି ଏହି ବେଆଇନ କାରବାର ରେ ଲିପ୍ତ ରହିବା ନେଇ ରାଜ୍ୟ ମୁଖ୍ୟ ଶାସନ ସଚିବ ଦୃଷ୍ଟି ଦେବାକୁ ଜନସେବା ସଙ୍ଘ ଉପଦେଷ୍ଟା ସତ୍ୟଜିତ ଷଡ଼ଙ୍ଗୀ ଲିଖିତ ଅଭିଯୋଗ ପତ୍ର ପ୍ରେରଣ କରିଛନ୍ତି । ଦୁଃଖ ର ବିଷୟ ଏହା ଯେ ଟିଟିଲାଗଡ ବିଧାୟିକା ଶ୍ରୀମତୀ ଟୁକୁନି ସାହୁ ନିଜେ ମହିଳା ଓ ମିଶନ ଶକ୍ତି ମନ୍ତ୍ରୀ ଥାଇ ଏହି ଅଞ୍ଚଳ ରେ ଯଦି ଏପରି ଦାଇତ୍ୱହୀନ ବ୍ୟବସ୍ଥା ତେବେ ସାଧାରଣ ଗୁହାରି କରିବେ କାହାକୁ ?