09-Jan-2025

ବଲାଙ୍ଗିର(ପ୍ରେରଣା ଖବର): ବଲାଙ୍ଗିର ଜିଲ୍ଲା ଟିଟିଲାଗଡ ଉପଖଣ୍ଡରେ କାର୍ଯ୍ୟରତ ତିନିଜଣ ସାମ୍ବାଦିକଙ୍କୁ ବିଦ୍ୟୁତ ବିଭାଗର ଅଧିକାରୀ ଗୋଡାଇ ଗୋଡାଇ ମାଡମାରିବା ଘଟଣାକୁ ନେଇ ଚାରିଆଡେ ପ୍ରତିକ୍ରିୟା ପ୍ରକାଶ ପାଇଛି ।

ମଦ୍ୟପ ଅଧିକାରୀଙ୍କ ଏଭଳି କାର୍ଯ୍ୟକୁ ନିନ୍ଦା କରିବା ସହିତ ତାଙ୍କ ବିରୋଧରେ କଡା କାର୍ଯ୍ୟନୁଷ୍ଠାନ ନେବାକୁ ଦାବି କରି ଜିଲ୍ଲପାଳ, ଏସପି ଓ ବିଦ୍ୟୁତ ବିଭାଗର ଅଧୀକ୍ଷଣ ଯନ୍ତ୍ରୀଙ୍କୁ ଭେଟିଥିଲା ବଲାଙ୍ଗିର ଜିଲ୍ଲା ସାମ୍ବାଦିକ ସଂଘ। ସଂଘର ଉପସଭାପତି ବଳରାମ ମିଶ୍ର ଓ ସାଧାରଣ ସମ୍ପାଦକ ଶିଶିରକାନ୍ତ ଶତପଥୀଙ୍କ ନେତୃତ୍ୱରେ କର୍ମକର୍ତ୍ତା ମାନେ ପ୍ରଶାସନୀକ ଅଧିକାରୀ ମାନଙ୍କୁ ଭେଟି ଘଟଣା ସର୍ମ୍ପକରେ ଅବଗତ କରିଥିଲେ। ସମ୍ପୃକ୍ତ ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଦାବି କରିଥିଲେ ।

ପ୍ରକାଶ ଯେ ଗତ ବୁଧବାର ଦିନ ଟିଟିଲାଗଡ ଥାନା ଅଧିନସ୍ଥ ଟିମନଭାଡି ଗ୍ରାମରେ ବିଦ୍ୟୁତ ଆଘାତ ଲାଗି ଜଣେ ଶ୍ରମିକଙ୍କ ମୃତ୍ୟୁ ହୋଇଥିଲା । ବିଦ୍ୟୁତ ବିଭାଗର ଅଧିକାରୀଙ୍କ ପାଖରୁ ଘଟଣାର ପ୍ରତିକ୍ରିୟା ନେବାକୁ ଟିଟିଲାଗଡର ସାମ୍ବାଦିକ ଅବିନାଶ ନନ୍ଦ, ସଞ୍ଜୟ ବେହେରା ଓ ତରୁଣ ବେହେରା ବିଦ୍ୟୁତ ବିଭାଗ କାର‌୍ୟ୍ୟାଳୟକୁ ଯାଇଥିଲେ । ସେଠାରେ ଅଧିକାରୀଙ୍କୁ ପାଇଲେ ନାହିଁ । କିନ୍ତୁ ସେମାନେ ଖୋଲାନ ଗ୍ରାମ ନିକଟ ଲାନ୍ଥ ନଦୀ ବ୍ରିଜ ତଳେ ଭୋଜି କରୁଥିବା ଖବର ପାଇ ସେଠାକୁ ଯାଇଥିଲେ । ସେଠାରେ ପ୍ରତିକ୍ରିୟା ନେବାକୁ ଚେଷ୍ଟା କରୁଥିବା ବେଳେ ବିଦ୍ୟୁତ ବିଭାଗର ଅଧିକାରୀ ମାନେ ତାଙ୍କୁ ଅତର୍କିତ ଭାବରେ ଆକ୍ରମଣ କରିଥିଲେ ।

ଏହି ଖବର ପ୍ରଚାରିତ ହେବାପରେ ଘଟଣାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଏ ସର୍ମ୍ପକରେ ଟିଟିଲାଗଡ ଥାନାରେ ଏତଲା ହୋଇଥିଲା। ତେବେ ସାମ୍ବାଦିକଙ୍କୁ ଆକ୍ରମଣ କରିଥିବା ବିଦ୍ୟୁତ ବିଭାଗର ଦୁଇଜଣ ଯନ୍ତ୍ରୀ ଜଗନ୍ନାଥ ପତି ଓ ଚିନ୍ମୟ ସାହୁଙ୍କୁ ପୁଲିସ ଗିରଫ କରିଥିବା ଜଣାପଡିଛି । ସେମାନଙ୍କ ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ ପଠାଇଦିଆଯାଇଥିବା ସୂଚନା ରହିଛି । ପ୍ରଶାସନୀକ ଅଧିକାରୀ ମାନଙ୍କୁ ଭେଟିବା ସମୟରେ ଜିଲ୍ଳା ସାମ୍ବାଦିକ ସଂଘର କୋଷାଧ୍ୟକ୍ଷ ସୁନୀଲ ମହାନ୍ତି, ବରିଷ୍ଠ ସାମ୍ବାଦିକ ଗୋପବନ୍ଧୁ ଶତପଥୀ, ଶରତ ମହାକୁର, ବିରେନ୍ଦ୍ର ଝାଙ୍କର, ଚନ୍ଦ୍ରଭାନୁ ମୋଲାନା, ଚିତ୍ତରଞ୍ଜନ ମିଶ୍ର, ଘଟେଶ୍ୱର ମିଶ୍ର, ମହେନ୍ଦ୍ର ଦର୍ଜୀ, ରାଜା ମିଶ୍ର, ରଘୁନନ୍ଦନ ସିଂହ, ପୱନ ଅଗ୍ରୱାଲ, ଶ୍ରୀମନ୍ତ ପଣ୍ଡା ପ୍ରମୁଖ ଉପସ୍ଥିତ ଥିଲେ ।