08-Jan-2025

କଣ୍ଟାମାଳ(ଜୟ କୁମାର ମହାରଣା):  କଣ୍ଟାମାଳ ବ୍ଲକ ଘଣ୍ଟାପଡା ପଞ୍ଚାୟତର ରେକଡୋଲ ଗ୍ରାମରେ ମା’ ଖଜୁରଗୁରେନ ପର୍ବ ଅନୁଷ୍ଠିତ ହୋଇଯାଇଛି l ଦେବୀ ପୂଜକ ଝାଙ୍କର ଲକ୍ଷ୍ମଣ ଭୋଇ ଓ ଦେହେରୀ ପ୍ରେମରାଜ ଭୋଇ ନିଷ୍ଠାର ସହିତ ଉପବାସ ରହି ରୀତିନୀତି ଅନୁଯାୟୀ ପୂଜାର୍ଚ୍ଚନା କରିଥିଲେ l ମା’ଙ୍କ ନିକଟରେ ମୁଆଁ, ନଡ଼ିଆ, ଅରୁଆ ଚାଉଳ,

ମନ୍ଦାର, ଧୋପ, ଦୀପ ଅର୍ପଣ କରାଯାଇ ପୂଜାର୍ଚ୍ଚନା କରାଯାଇଥିଲା l ବରୁଆ କପିଳ ରଣା, ଦିଲେଶ୍ଵର ଭୋଇ ଏବଂ ମୁରଲୀ ଭୋଇଙ୍କ ଦେହରେ ଦେବୀ ସବାର ହୋଇଥିଲେ l ବିଭିନ୍ନ ଅଞ୍ଚଳରୁ ଆସିଥିବା ଶ୍ରଦ୍ଧାଳୁ ଭକ୍ତ ମାନେ ଦେବୀଙ୍କୁ ଗୁହାରୀ ଜଣାଇ ପରିବାରର ମଙ୍ଗଳ କାମନା କରିଥିଲେ l

ମନସ୍କାମନା ପୂର୍ଣ୍ଣ ହୋଇଥିବା ଶ୍ରଦ୍ଧାଳୁ ମାନେ ଆଣିଥିବା କୁକୁଡ଼ା ଓ ବୋଦା ମା’ଙ୍କ ନିକଟରେ ବଳି ଦିଆଯାଇଥିଲା l ଜମିଦାର ଅରୁଣ ଭୋଇ, ଗୌନ୍ତିଆ କରୁଣାକର ପାତ୍ର ଏବଂ ଗ୍ରାମବାସୀ ସହଯୋଗ କରିଥିଲେ l ରାତିରେ ମନୋରଞ୍ଜନ ପାଇଁ ଦଣ୍ଡ ନୃତ୍ୟ ପରିବେଷଣ ହୋଇଥିଲା l ତୁର୍କା ପ୍ରଗଣାର ଏହି ଆଦିବାସୀ ପର୍ବ ଗ୍ରାମବାସୀଙ୍କ ମଧ୍ୟରେ ଭାଇଚାରା ବଜାୟ ରଖିଛି l