05-Dec-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ବଲାଙ୍ଗୀର ବନଖଣ୍ଡର କଣ୍ଟାବାଞ୍ଜି ରେଞ୍ଜ୍ ଲର୍କି ସେକ୍ସନ୍ ରେ ଥିବା ଜଣେ ନକଲି ବନକର୍ମଚାରୀଙ୍କର ହାତୀ ଆକ୍ରମଣରେ ମୃତ୍ୟୁ ଘଟଣା ପରେ ଉକ୍ତ ନକଲି ବନକର୍ମଚାରୀ ଜଣଙ୍କର ପ୍ରକୃତ ପରିଚୟ ସାମ୍ନାକୁ ଆସିଛି ।

ଗତ ୨୦ ତାରିଖରେ ଢୋଲମାନ୍ଦଲ ସେକ୍ସନ୍ ଅନ୍ତର୍ଗତ ବାନ୍ଧନପାଲି ଜଙ୍ଗଲ ନିକଟରେ ବନକର୍ମଚାରୀଙ୍କ ସହ ଏକ ବଣୁଆ ଦନ୍ତାହାତୀକୁ ଘଉଡାଉଥିଲା ବେଳେ ଉକ୍ତ ଦନ୍ତାର ଆକ୍ରମଣରେ ଦେଓଗାଁ ଡଙ୍ଗରପଡା ନିବାସୀ ରୂପେଶ ଛତ୍ରିଆ ଗୁରୁତର ଆହତ ଅବସ୍ଥାରେ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହାସପାତାଳରେ ଭର୍ତ୍ତି ହେବାପରେ ଚିକିତ୍ସିତ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ପ୍ରଥମେ ତାଙ୍କୁ ଜଣେ ଗଜସାଥୀ, ବନକର୍ମଚାରୀ ଓ ପରେ ଡିଏଫଓ ସୁଦର୍ଶନ ବେହେରା ତାଙ୍କୁ ଜଣେ ସାଧାରଣ ଲୋକ ବୋଲି ସ୍ପଷ୍ଟ କରିଛନ୍ତି ।  ଜଣାଯାଇଛି ଯେ ସେ ତାଙ୍କ କକାପୁଅ ଭାଇ ଲର୍କିର ଫରେଷ୍ଟର ସୁନୀଲ ଛତ୍ରିଆଙ୍କ ସହିତ ଗତ ପ୍ରାୟ ୮ ବର୍ଷ ହେଲା ସାଙ୍ଗରେ ରହି ଜଙ୍ଗଲରେ ବୁଲିବା ସହିତ ବିଭିନ୍ନ ବନବିଭାଗର କାର୍ଯ୍ୟକ୍ରମରେ ଯୋଗ ଦେଇ ଆସୁଥିଲେ। ଏପରିକି ସେ ନିଜ ହ୍ବାଟ୍ସଅପ୍ ଷ୍ଟାଟସ୍ ରେ ନିଜକୁ ବନକର୍ମଚାରୀ ଭାବରେ ଦର୍ଶାଇ ଆସୁଥିବା ପ୍ରକାଶ। ତେଣୁ ତାଙ୍କର ଏହି ଦୁର୍ଘଟଣାରେ ମୃତ୍ୟୁ ପରେ ସେ ଜଣେ ବନକର୍ମଚାରୀ ବା ଗଜସାଥୀ ଥିଲେ ବୋଲି ଭ୍ରମ ସୃଷ୍ଟି ହୋଇଥିଲା। ତେବେ ଖୋଦ୍ ଡିଏଫଓ ମଧ୍ୟ ପ୍ରଥମେ ତାଙ୍କୁ ବନକର୍ମଚାରୀ ବୋଲି କହିବା ଓ ପରେ ସେ କୌଣସି ବିଭାଗୀୟ କର୍ମଚାରୀ ନ ଥିବା ଜାଣି କଥା ସୁଧୁରାଇବାରୁ ତାଙ୍କୁ ସମାଲୋଚନାର ଶିକାର ହେବାକୁ ପଡିଥିଲା। ଏଣୁ ଏଠାରେ ପ୍ରଶ୍ନ ଉଠୁଛି ଯେ, ସେ କୌଣସି ବିଭାଗୀୟ କର୍ମଚାରୀ ବା ଗଜସାଥୀ ନଥିବା ଜାଣିଥିଲେ ହେଁ ତାଙ୍କୁ ଦୀର୍ଘ ପ୍ରାୟ ୮ ବର୍ଷକାଳ ବନକର୍ମଚାରୀ ଭାବରେ ଦେଖାଯାଇ ଆସୁଥିବା ନିମନ୍ତେ କିଏ ଦାୟୀ ?  ସେ ନିଜ କକାପୁଅ ଭାଇ ସାଙ୍ଗରେ ରହି ବିଭିନ୍ନ ବନବିଭାଗ କାମରେ ସହଯୋଗୀ ପାଲଟିଥିବା ସହିତ ହାତୀ ଘଉଡାଉଥିବା କାମରେ ନିୟୋଜିତ ହୋଇଥିଲେ ।  ଏକଥା ତାଙ୍କ ଭାଇ ଫରେଷ୍ଟର ସୁନୀଲ ଛତ୍ରିଆ ଓ କଣ୍ଟାବାଞ୍ଜି ରେଞ୍ଜର ସିଦ୍ଧାନ୍ତ ସାହୁ ଭଲଭାବେ ଜାଣି ସୁଦ୍ଧା ତାଙ୍କୁ ଏ ସବୁଥିରେ ଲଗାଇଥିବାରୁ ସେମାନେ ହିଁ ତାଙ୍କର ଏପରି ମୃତ୍ୟୁ ନିମନ୍ତେ କାହିଁକି ଦାୟୀ ନ ହେବେ ବୋଲି ଲୋକେ ପ୍ରଶ୍ନ କରିଛନ୍ତି ?  ସେ ବନବିଭାଗର କେଉଁ କେଉଁ କାମରେ କିଭଳି ନିୟୋଜିତ ରହିଥିଲେ, ତାହାର ତଥ୍ୟପ୍ରମାଣ ଖୋଜି ବାହାର କରିବାକୁ ଡିଏଫଓଙ୍କୁ ଜନସାଧାରଣଙ୍କ ପକ୍ଷରୁ ଦାବି କରା ଯାଇଛି। ଜଣେ ସାଧାରଣଲୋକ ଫରେଷ୍ଟରଙ୍କ ପଛୁଆଳ ପାଲଟି କି କି ବିଭାଗୀୟ ସରକାରୀ କାମ କରୁଥିଲେ ଓ ଏଥିପାଇଁ ଏତେବର୍ଷ ଧରି ତାଙ୍କୁ କିଏ ପାରିଶ୍ରମିକ ଦେଉଥିଲା କି ନାହିଁ, ଏହାର ମଧ୍ୟ ତଦନ୍ତ ଜରୁରୀ। ସର୍ବୋପରି ଡିଏଫଓ ଏତେଦିନ ହେଲା, ତାଙ୍କ ଡିଭିଜନରେ କେଉଁଠି କିଏ କିଏ  ଗଜସାଥୀ ବା କି କି ଦାୟିତ୍ୱରେ ରହିଛନ୍ତି, ନ ଜାଣିବା ଗୁରୁତର ଦାୟିତ୍ୱହୀନତା ନୁହେଁ କି ? ଏଥିପାଇଁ ବିଭାଗୀୟ ବରିଷ୍ଠ ଅଧିକାରୀଙ୍କର ମଧ୍ୟ ଦୃଷ୍ଟି ଆକର୍ଷଣ କରାଯାଇଛି। 

ବଲାଙ୍ଗୀର ବନଖଣ୍ଡରେ ଇତିମଧ୍ୟରେ ଅଳ୍ପସମୟର ବ୍ୟବଧାନରେ ଏକାଧିକ ବିରଳ ବନ୍ୟପ୍ରାଣୀ ହାତୀଙ୍କର ମୃତ୍ୟୁ ସହିତ ହାତୀ ଆକ୍ରମଣରେ ହାତୀଘଉଡାଇବାରେ ଜଣେ ଅଣତାଲିମପ୍ରାପ୍ତ ସାଧାରଣଲୋକଙ୍କୁ ବିଭାଗୀୟ ଅଧିକାରୀ ମାନେ ନିୟୋଜିତ କରିବାରୁ ତାଙ୍କର ଅମୂଲ୍ୟ ଜୀବନହାନୀ ଘଟିବା ଜଙ୍ଗଲ ବିଭାଗର ଚରମ ବିଶୃଙ୍ଖଳା ବୋଲି ଏଠାରେ ଚର୍ଚ୍ଚା ହେଉଛି ।