03-Dec-2024

ତରଭା(କପିଳାସ ସେଠ): ହ୍ଵାଟ୍ସଆପ ଗ୍ରୁପ ଗଠନ କରି ମେମ୍ବର ମାନଙ୍କୁ ଠକିଥିବା ଅଭିଯୋଗରେ ତରଭା ପୋଲିସ ସନସିତ ସାହୁ ନାମକ ଜଣେ ବ୍ୟକ୍ତିଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାଯାଇଛି।ତରଭା ଥାନା ଆଇଆଇସି ଅନିତା କିଡୋଙ୍କ ଠାରୁ ମିଳିଥିବା ସୂଚନାନୁଯାୟୀ ରନଲିଭ (RUNLVE) ନାମକ ଏକ ହ୍ଵାଟ୍ସଆପ ଗ୍ରୁପ କରାଯାଇଥିଲା ଏହି ଗ୍ରୁପର ୩ ଜଣ ଏଡ଼ମିନ ମଧ୍ୟରୁ ତରଭାର ସନସିତ ସାହୁ ଜଣେ ଥିଲେ।ସନସିତ ଲୋକଙ୍କୁ ପ୍ରବର୍ତ୍ତାଇ ମେମ୍ବର କରୁଥିବା ଅଭିଯୋଗ ହୋଇଥିଲା।ଏହି ଗ୍ରୁପରେ ୪୯୯ ଜଣ ମେମ୍ବର ଥିଲେ।ଏହି ଗ୍ରୁପରେ ଲିଙ୍କ ଆସୁଥିଲା ମେମ୍ବର ମାନେ ଲିଙ୍କ ଓପନ କରି ସ୍କିମ ଅନୁଯାୟୀ ଟଙ୍କା ଜମା କରୁଥିଲେ ଏବଂ ଲାଭ ପାଉଥିଲେ। ସ୍କିମ ଅନେକ ପ୍ରକାର ଥିଲା ମନେ କରନ୍ତୁ ଜଣେ ସଦସ୍ୟ ୧୬ ହଜାର ଟଙ୍କାର ସ୍କିମରେ ୧୬ ହଜାର ଲିଙ୍କ ମାଧ୍ୟମରେ ଜମା କରୁଛନ୍ତି ତେବେ ୨୪ ଘଣ୍ଟା ପରେ ତାଙ୍କର ୱାଲେଟକୁ ୨୫୬୦ ଟଙ୍କା ଲେଖାଏଁ ୩୦ଦିନ ପର୍ଯ୍ୟନ୍ତ ଆସିବ।ତାର ଅର୍ଥହେଲା ଜଣେ ୧୬ ହଜାର ଟଙ୍କା ଜମାକଲେ ୩୦ ଦିନରେ ୭୬ ହଜାର ୮ ଶହ ଟଙ୍କା ପାଇପାରିବେ।ଏଭଳି ଲୋଭର ବଶବର୍ତ୍ତୀ ହୋଇ ଅନେକ ମେମ୍ବର ବିଭିନ୍ନ ସ୍କିମରେ କୋଟି କୋଟି ଟଙ୍କା ଜମା କରିଥିଲେ।ହଠାତ ୩୦ ଅଗଷ୍ଟରେ ଗ୍ରୁପ ବନ୍ଦ ହୋଇଯିବାରୁ ମେମ୍ବର ମାନଙ୍କ ମଧ୍ୟରେ ହଇଚଇ ସୃଷ୍ଟି ହୋଇଥିଲା।ଏହି ଗ୍ରୁପରେ ମେମ୍ବର ହୋଇ ଟଙ୍କା ହରାଇଥିବା ଶ୍ରୀକୁମାର ମହନ୍ତ,ଶିବ ମେହେର ଓ ନୀଳକଣ୍ଠ ଦାସ ଠକେଇର ଶିକାର ହୋଇଥିବା ସମ୍ବନ୍ଧେ ତରଭା ଥାନାରେ ଲିଖିତ ଅଭିଯୋଗ କରିଥିଲେ।ଶ୍ରୀକୁମାର ମହନ୍ତ ୪୮ ହଜାର ୫ଶହ ଟଙ୍କା ,ଶିବ ମେହେର ୩୦ ହଜାର ୮ ଶହ ଟଙ୍କା ଓ ନୀଳକଣ୍ଠ ଦାସ ୧୬ ହଜାର ଟଙ୍କା ହରାଇଥିବା ଅଭିଯୋଗ କରିଥିଲେ।ଏସମ୍ବନ୍ଧେ ଥାନା କେଶ ନମ୍ବର ୨୮୧ ଭାରତୀୟ ନ୍ୟାୟ ସଂହିତାର ଧାରା ୩୧୮(୨),୩୧୯(୨)୩(୫) ୬୬ (ସି)୬୬ (ଡି)ରେ ଏକ ମକଦ୍ଦମା ରୁଜ୍ଜୁ କରି ଆଇଆଇସି ଅନିତା କିଡୋ ତଦନ୍ତ ଦାୟିତ୍ବ ନେଇଥିଲେ।ଆଜି ସୋମବାର ଗ୍ରୁପର ଏଡ଼ମିନ ସନସିତ ସାହୁଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିଲା।କୋର୍ଟରେ ଜାମିନ ମଞ୍ଜୁର ହେବାରୁ ସେ ବାହାରିଥିଲେ।ଏହି ଗ୍ରୁପର ଅନ୍ୟ ଦୁଇ ଜଣ ଏଡ଼ମିନଙ୍କୁ ଶୀଘ୍ର ଧରାଯିବ ବୋଲି ଆଇ ଆଇ ସି ସୂଚନା ଦେଇଛନ୍ତି ।