18-Aug-2024

ଆଗଲପୁର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ଆଗଲପୁର ବ୍ଲକର ବିଭିନ୍ନ ଗ୍ରାମରେ ଛତୁ ଫୁଟିଲା ଭଳି ଅବୈଧ ସାର ଓ ବିହନ ଦୋକାନ ବଢିବାରେ ଲାଗିଛି l ଏମାନଙ୍କ ଯୋଗୁଁ ଲାଇସେନ୍ସପ୍ରାପ୍ତ ସାର ଦୋକାନୀ ମାନେ ଅନେକ କ୍ଷତି ସହୁଛନ୍ତି l ଏମାନେ ସରକାରଙ୍କୁ ଜି ଏସ୍ ଟି ଦେଉଛନ୍ତି, ସମସ୍ତ ସରକାରୀ ନିୟମ କାନୁନ୍ ଅନୁସାରେ ସାର ବିକ୍ରୟ କରୁଥିବା ବେଳେ ତାଙ୍କ ଆଗରେ ବିନା ଲାଇସେନ୍ସଧାରୀ ସାର ଦୋକାନୀ ମାନେ ଦିନଦ୍ୱିପହରରେ ଶହ ଶହ ବସ୍ତା ସାର ବିକ୍ରି କରିଦେଉଛନ୍ତି l ଏପରି କିଛି କାରବାର ବ୍ୟାପକ ଭାବରେ ଚାଲିଛି ଆଗଲପୁର ବ୍ଳକ ର ଭରସୁଜା ଅଂଚଳରେ l ଭରସୁଜା ଅଞ୍ଚଳରେ ଏପରି ଏକାଧିକ ସାର ଦୋକାନ ପ୍ରଶାସନର ଦୃଷ୍ଟି ଆଢୁଆଳରେ ନିଜର ବ୍ୟବସାୟ କରିଚାଲିଛନ୍ତି l ସବୁଠାରୁ ଦୁଃଖର ବିଷୟ ଯେ,  ଏ ସମ୍ପର୍କରେ ଜିଲ୍ଲା କୃଷି ଅଧିକାରୀ ଓ ବ୍ଲକ ସହ କୃଷି ଅଧିକାରୀଙ୍କୁ ବାରମ୍ବାର ଅଭିଯୋଗ କରାଯାଇଥିଲେ ମଧ୍ୟ ସେମାନେ ଦେଖିବା, କରିବା କହି ଲୋକଙ୍କୁ ଭୁଆଁ ବୁଲେଇବା ଦେଖା ଯାଉଛି l ଅନୁସନ୍ଧାନରୁ ଜଣାପଡ଼ିଛି ଯେ, ଭରସୁଜା ଗ୍ରାମର ପାତ୍ର ବିହନ ଭାଣ୍ଡର (ପ୍ରୋ:ବିଶ୍ୱରଞ୍ଜନ ପାତ୍ର) ଲାଇସେନ୍ସ ନଥାଇ ମଧ୍ଯ ଟ୍ରକ୍ ଟ୍ରକ୍ ସାର ନିଜ ଗୋଦାମରେ ଅନଲୋଡ୍ କରୁଥିବା ଦେଖାଯାଉଛି l ବିଭିନ୍ନ ସମୟରେ ସନ୍ଧ୍ୟାରେ ଏଠାକୁ ଟ୍ରକରେ ସାର ଓ ବିହନ ଆସି ଗୋଦାମ୍ ମାଲିକଙ୍କ ଘରେ ଅନଲୋଡ୍ ହୋଇଥାଏ l ସୁଦୂର ଛତିଶଗଡ଼ ଓ  ବିହାର ଆଦି ରାଜ୍ୟର ନକଲି କୀଟନାଶକ ସାମଗ୍ରୀ ଆଦି ବିକ୍ରୟ କରିବା ନେଇ ମଧ୍ୟ ଏହି ଗୋଦାମର ମାଲିକଙ୍କ ନାମରେ ଗୁରୁତର ଅଭିଯୋଗ ରହିଛି l ଏହି ଗୋଦାମ ଉପରେ ପ୍ରଶାସନ ତରଫରୁ ଦୁଇ ଦୁଇ ଥର ଚଢାଉ ମଧ୍ୟ ହୋଇସାରିଲାଣି l ଗୋଦାମ୍ ମାଲିକ ବିଶ୍ୱରଞ୍ଜନ ପାତ୍ରଙ୍କ ନାମରେ ଏଫ୍ ଆଇ ଆର୍ ମଧ୍ୟ ହୋଇସାରିଛି କିନ୍ତୁ ଏହି ଚତୁର ସାର ବ୍ୟବସାୟୀ ଜଣଙ୍କ କାହାକୁ ଖାତିର୍ ନକରି ନିଜର କାମ କରିଚାଲିଛନ୍ତି l କେବଳ ପାତ୍ର ବିହନ ଭଣ୍ଡାର ନୁହଁ  ଭରସୁଜା ଅଞ୍ଚଳର ଏକାଧିକ ସାର ଦୋକାନ ଏପରି ଢଙ୍ଗରେ ତାଙ୍କର ବେପାର ଚଳାଇଛନ୍ତି l ଏମାନଙ୍କ ଉପରେ ନା ଅଛି ସରକାରଙ୍କ ଲଗାମ୍ ନା ଏମାନଙ୍କ ପାଇଁ ସରକାରୀ ଆଇନର ବିଧିବ୍ୟବସ୍ଥା l ଏ ସମ୍ପର୍କରେ ଆମେ ଆଗଲପୁର ବ୍ଲକ କୃଷି ଅଧିକାରୀଙ୍କ ପ୍ରତିକ୍ରିୟା ନେଇଥିଲୁ l ପୋଲିସ, ବ୍ଲକ  ଏନଫୋର୍ସମେଣ୍ଟ ଟିମ୍ ଓ ଡିଷ୍ଟ୍ରିକ୍ଟ ଲେଭେଲ ଅଧିକାରୀଙ୍କ ଦ୍ଵାରା ତୁରନ୍ତ ଅବୈଧ ସାର ବେପାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି କୃଷି ଅଧିକାରୀ l ଅନ୍ୟପକ୍ଷରେ ପ୍ରଶାସନର ଜ୍ଞାତସାରରେ ଏହି ସାର ବେପାରୀ ମାନେ ଲୋକଙ୍କୁ ଠକି ଚାଲିଥିବା ଅଭିଯୋଗ ହୋଇଛି l ଏପରି ଅସାଧୁ  ବ୍ୟବସାୟୀ ମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଭରସୁଜା ଅଞ୍ଚଳର ଚାଷୀ ଓ ସାର ବେପାରୀ ମାନେ ଦାବି କରିଛନ୍ତି l