16-Aug-2024

ବୀରମହାରାଜପୁର, (ବିନୋଦ ପାଣ୍ଡେ) : ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ କାର୍ଯ୍ୟାଳୟ ସମ୍ମୁଖରେ ଶୁକ୍ରବାର ମହିଳା ସାଂସ୍କୃତିକ ସଙ୍ଗଠନ ପକ୍ଷରୁ ବିଭିନ୍ନ ଦାବି ନେଇ ବିକ୍ଷୋଭ ପ୍ରଦର୍ଶନ କରିବା ସହ  ଦାବି ପତ୍ର ପ୍ରଦାନ କରିଥିବା ଜଣାଯାଇଛି। ସ୍ଥାନୀୟ ବସଷ୍ଟାଣ୍ଡ ଠାରୁ ଏକ ବିରାଟ ଶୋଭାଯାତ୍ରାରେ ବାହାରି ସହର ପରିକ୍ରମା କରିବା ସହ ବ୍ଳକ କାର୍ଯ୍ୟାଳୟ ସମ୍ମୁଖରେ ବିଭିନ୍ନ ନାରାବାଜି ଦେଇ ବିକ୍ଷୋଭ ପ୍ରଦର୍ଶନ କରିଥିଲେ। ଉକ୍ତ ଦାବି ପତ୍ରରେ 
 ମଦ ମାଦକ ଦ୍ରବ୍ୟକୁସମ୍ପୂର୍ଣ ନିଷିଦ୍ଧ କରିବା, ନିତ୍ୟ ବ୍ୟବହାର୍ଯ୍ୟ ଜିନିଷପତ୍ରର ଆକାଶଛୁଆଁ ଦରବୃଦ୍ଧି ବନ୍ଦ କରିବା, ଆର.ଜି. କର ମେଡିକାଲ କଲେଜରେ ଡାକ୍ତରୀ ଛାତ୍ରୀଙ୍କୁ ଗଣଦୁଷ୍କର୍ମ ଓ ହତ୍ୟାଘଟଣାରେ ସମ୍ପୃକ୍ତ ସମସ୍ତ ଦୋଷୀଙ୍କୁ କଠୋର ଶାସ୍ତି ପ୍ରଦାନ କରିବା, ଏସ୍.ସି. ବି ମେଡିକାଲରେ ରୋଗୀଙ୍କୁ ବଳତ୍କାର ଅଭିଯୋଗର ତଦନ୍ତ ଓ ଅପରାଧୀ ଡାକ୍ତରଙ୍କୁ କଠୋରଶାସ୍ତ୍ର ପ୍ରଦାନ କରିବା, ସର୍ବତ୍ର ନାରୀ ଓ ଶିଶୁକନ୍ୟାଙ୍କ ନିରାପତ୍ତା ସୁନିଶ୍ଚିତ କରିବା ପ୍ରମୁଖ ଉଲ୍ଲେଖ ରହିଛି।

ଉଚ୍ଚ ସଂଗଠିକା ବିନୋଦିନୀ ମେହେରଙ୍କ ନେତୃତ୍ବରେ ଅନୁଷ୍ଠିତ ଶୋଭାଯାତ୍ରା ରେ  ଏ.ଆଇ.ଏମ୍.ଏସ୍.ଏସ୍.ର ରାଜ୍ୟ ସମ୍ପାଦିକା ସରୋଜିନୀ ନାୟକ ଯୋଗଦେଇ ଥିଲେ।ଦୀର୍ଘବର୍ଷ ଧରି ରାଜ୍ୟରେ ସର୍ବସ୍ତରର ଶୁଭବୁଦ୍ଧି ସମ୍ପନ୍ନ ଜନସାଧାରଣ ଓ ବିଶେଷ ଭାବେ ନାରୀ ସମାଜ ରାଜ୍ୟକୁ ସମ୍ପୂର୍ଣ ନିଶା ମୁକ୍ତ କରିବା ପାଇଁ ଆନ୍ଦୋଳନ କରି ଆସିଛନ୍ତି। ଏପରିକି ରକ୍ତକ୍ଷୟୀ ସଂଗ୍ରାମ ମଧ୍ୟ କରିଛନ୍ତି। ମାତ୍ର ଜନସାଧାରଣ ଙ୍କ ଏହି ନ୍ୟାର୍ଯ୍ୟ ଦାବି କେବଳ ଉପେକ୍ଷିତ ହୋଇନାହିଁ ପରନ୍ତୁ ମଦ ଓ ନାନାଦି ମାଦକ ଦ୍ରବ୍ୟର ପ୍ରସାର ବହୁଳଭାବେ ବଢିଚାଲିଛି। ଆଜି ରାଜ୍ୟର କୋମଳମତି ଶିଶୁକନ୍ୟା ଠାରୁ ୮୦ ବର୍ଷର ବୃଦ୍ଧା ଦୁଷ୍କର୍ମର ଶୀକାର ହେବାସହ ନାନାଦି ଅପରାଧ ଉଦ୍‌ବେଗଜନକ ଭାବେ ବଢି ଚାଲିଛି।