09-Aug-2024

ବଲାଙ୍ଗୀର(ପ୍ରେରଣା ଖବର): ଜାଲ୍ ସାର୍ଟିଫିକେଟ୍ ର ହବ୍ ପାଲଟିଥିବା ବଲାଙ୍ଗୀର ଜିଲ୍ଲାରେ ଶିକ୍ଷାଗତ ଜାଲିଆତି ସହିତ ଅନ୍ୟାନ୍ୟ କ୍ଷେତ୍ରରେ ବି ଜାଲିଆତି କରି ଚାକିରୀ କରୁଥିବାର କେତେକ ଘଟଣା ଜଣାପଡିଛି ।  ବିଶେଷକରି ଶିକ୍ଷାବିଭାଗରେ ଖୋଦ୍ ବଲାଙ୍ଗୀର ଶିକ୍ଷା ସର୍କଲରେ ଏଭଳି ଜାଲ୍ କୋଟାରେ ଦୁଇଜଣ ହାଇସ୍କୁଲର ପ୍ରଧାନଶିକ୍ଷକ ଭଳି ପଦବୀ ହାତେଇ ସଂପ୍ରତି କାର୍ଯ୍ୟରତ ରହିଥିବା ଅଭିଯୋଗରୁ ପ୍ରକାଶ । ଏପରିକି ଏହି ଠକଶିକ୍ଷକ ମାନଙ୍କୁ ଭେଟି ପଚାରିଲେ ସେମାନେ କିଞ୍ଚିତ୍ ହଡବଡେଇ ଯାଇଥିବା ସତ୍ତ୍ୱେ ମୁହଁଟାଣ ଛାଡୁନାହାଁନ୍ତି । ଏ ସମ୍ପର୍କରେ ଅନୁସନ୍ଧାନ କରିବାକୁ ଗଲେ  ସମ୍ପୃକ୍ତ ବିଭାଗ ପକ୍ଷରୁ ଜାଣିଶୁଣି ତଥ୍ୟ ନଦେଇ ବିଭ୍ରାନ୍ତ କରାଯାଉଛି । ଜିଲ୍ଲା ସଦରମହକୁମାରେ ସ୍ପଷ୍ଟଦିବାଲୋକରେ ବର୍ଷ ବର୍ଷ ଧରି ଏଭଳି ଗୁରୁତର ଜାଲିଆତି ଓ ଠକେଇ ପ୍ରଶାସନ ଓ ବିଭାଗୀୟ ଉଚ୍ଚ ଅଧିକାରୀଙ୍କ ନାକତଳେ ଚାଲିଆସି ଥିଲେ ହେଁ , ସେମାନେ ଏହାର ଟେର୍ ନ ପାଇବା ବା ଚେଇଁ ଶୋଇପଡିଥିବା , ଆଶ୍ଚର୍ଯ୍ୟଜନକ !

ଅଭିଯୋଗରୁ ପ୍ରକାଶ ଯେ ବଲାଙ୍ଗୀର- ସମ୍ବଲପୁର ମୁଖ୍ୟସଡକରୁ ଛୁଇବନ୍ଧରୁ ଜାମଗାଁ ରାସ୍ତାରେ ପଡୁଥିବା ୨ ଟି ହାଇସ୍କୁଲର ପ୍ରଧାନଶିକ୍ଷକ ଏଭଳି ଠକେଇରେ ଜଡିତ ଅଛନ୍ତି । ସେଠାରେ ପାଠ ପଢୁଥିବା କୋମଳମତି ଛାତ୍ରଛାତ୍ରୀଙ୍କ ମନରେ ଆଘାତ ସୃଷ୍ଟି ନ କରିବା କାରଣରୁ ଏବେ ସେମାନଙ୍କ ନାମ ପ୍ରକାଶ କରାଯାଉ ନାହିଁ । ଏଣୁ 'ସାଧୁ ସାବଧାନ ' ନ୍ୟାୟରେ କେବଳ ସେମାନଙ୍କୁ ସତର୍କ କରିଦିଆଯିବା ସହିତ ବିଭାଗ ଓ ପ୍ରଶାସନର ଦୃଷ୍ଟିଆକର୍ଷଣ କରାଯାଉଛି । 

ଏଇ ରାସ୍ତାର ଦୁଇଟି ହାଇସ୍କୁଲ ମଧ୍ୟରେ ଗୋଟିଏ ହାଇସ୍କୁଲର ପ୍ରଧାନଶିକ୍ଷକ ମିଥ୍ୟା ଭିନ୍ନକ୍ଷମ ସାର୍ଟିଫିକେଟ୍ ବଳରେ ଅନ୍ୟ ବ୍ଲକ୍ ରୁ ଏଠାକୁ ବଦଳି ହୋଇ ଆସିଥିବା ସହିତ ଓଇଏସ୍ ପାଇ ପଡୋଶୀ ସୋନପୁର ଜିଲ୍ଲାର ତରଭା ବ୍ଲକ୍ ରେ ବିଇଓ ଚାକିରୀ ପାଇ ମଧ୍ୟ ତଦନ୍ତରେ କଟିଯାଇଥିବା କୁହାଯାଉଛି । ଏ ସଂକ୍ରାନ୍ତୀୟ ତଥ୍ୟପ୍ରମାଣ ରହିଛି । ତେବେ  ଅନୁସୂଚିତ ବର୍ଗର ଏହି ପ୍ରଧାନଶିକ୍ଷକ ଏଠାରେ କିପରି ଅବସ୍ଥାପିତ ରହିଛନ୍ତି , ତଦନ୍ତସାପେକ୍ଷ ।

ସେହିପରି ଦ୍ବିତୀୟ ହାଇସ୍କୁଲର ଭାରପ୍ରାପ୍ତ ପ୍ରଧାନଶିକ୍ଷକ ଜଣକ ଜାତିଗତ ମିଥ୍ୟା ପ୍ରମାଣପତ୍ର ବଳରେ ବିଇଡି ଓ ଏକାସାଙ୍ଗରେ ଏମ ଏସ ସି କରିଥିବା ଅଭିଯୋଗ ହୋଇଛି । ଏହା ନିକଟବର୍ତ୍ତୀ ତାଙ୍କ ଗାଁ'ରେ ପ୍ରଘଟ ହୋଇଯିବାରୁ ସେ ଆଉ ଗା'କୁ ନଯାଇ ଲୋଇସିଂହାରେ ଲୁଚିକି ରହୁଥିବା କୁହାଯାଉଛି । ଏପରିକି ସେ ବାପମାଆ ଓ ଘରର ଅନ୍ୟମାନେ ଗାଁ'ରେ ରହୁଥିବା ବେଳେ ପଶ୍ଚିମଓଡିଶାର ମୁଖ୍ୟପର୍ବ ନୂଆଖାଇକୁ ମଧ୍ୟ ଘରକୁ ଯାଉ ନଥିବା କୁହାଯାଉଛି । ତେବେ ସମ୍ପୃକ୍ତ ଶିକ୍ଷକ ଏଭଳି ଚର୍ଚ୍ଚା ଓ ଅଭିଯୋଗକୁ ଅସ୍ବୀକାର କରନ୍ତି ।

ସେ ଯାହାହେଉ , ସେ ପ୍ରକୃତରେ ଓବିସି ଜାତିର ହୋଇଥିବାବେଳେ ଏକାଭଳି ସମାନ ସାଙ୍ଗିଆ ହୋଇଥିବାର ଫାଇଦା ନେଇ ଏସ ସି କୋଟାରେ ରିହାତି ବଳରେ ବିଇଡି କରିଥିବା ଅଭିଯୋଗ ହୋଇଛି । ତେବେ ସେ କେବେ ବଲାଙ୍ଗୀର ବିଇଡି କଲେଜରେ ସେତେବେଳେ ହେଉଥିବା ବର୍ଷିକିଆ ବିଇଡି ଶିକ୍ଷା ପାଇଁ ଆଡମିଶନ୍ ନେଲେ ଓ କେବେ ପାସ୍ ଆଉଟ୍ ହେଇଥିଲେ , ଏ ସମ୍ପର୍କରେ ଏବେ କୌଣସି ପ୍ରମାଣ ମିଳୁନାହିଁ । ଏପରିକି ବଲାଙ୍ଗୀର ବିଇଡି କଲେଜରେ ୧୯୯୩- ୧୯୯୬ ମଧ୍ୟରେ ଓ ତାପରେ ୧୯୯୭-୧୯୯୮ ବର୍ଷର ଅନୁସନ୍ଧାନ କରି କଲେଜ କର୍ତ୍ତୃପକ୍ଷ ଏଭଳି କେହି ସେହିସମୟ ମଧ୍ୟରେ ଏଠାରେ ବିଇଡି କରି ନଥିବା ସଫେଇ ଦେଇଛନ୍ତି । ତେବେ ସେ କେତେ ସତ କହୁଛନ୍ତି , ଏ ସମ୍ପର୍କରେ ସୂଚନା ଆଇନ ବଳରେ ତଥ୍ୟ ମଗାଯିବାକୁ ପ୍ରସ୍ତୁତ ହେଉଥିବା ଓ ଏଥିରୁ ଏହା ଜଣାପଡିବ ବୋଲି ପ୍ରକାଶ । ତେବେ ସେ ଜଣେ ଭିନ୍ନକ୍ଷମ ଅଟନ୍ତି ଓ ଏଭଳି କୌଣସି ଫାଇଦା ନେଇ ନଥିବା ଅସ୍ବୀକାର କରିବା ସହିତ ଭିନ୍ନକ୍ଷମର ଫାଇଦା ନେଇଥିବା ପ୍ରକାଶ କରିଛନ୍ତି । ତେବେ ସେ କେବେ ବିଇଡି ଓ ଏକାସାଙ୍ଗରେ ଏମଏସ ସି କଲେ ପଚାରିଲେ , ହଡବଡେଇ ଯାଇଥିଲେ ହେଁ , ମନେପକାଇ କହିପାରୁ ନଥିବାରୁ ସନ୍ଦେହ ସୃଷ୍ଟି ହେବା ସ୍ବାଭାବିକ୍ ।

ଏହା ସହିତ ଉକ୍ତ ଶିକ୍ଷକ ଜଣକ ଅନେକଙ୍କୁ ଜାଲ୍ ଶିକ୍ଷାଗତ ସାର୍ଟିଫିକେଟ୍ ଦେବା କାରବାରରେ ଜଡିତ ରହିଥିବା କୁହାଯାଉଛି ।

ତେଣୁ ଅନ୍ତତଃ ଏବେ ବଲାଙ୍ଗୀର ଶିକ୍ଷା ସର୍କଲର ଏଇ ଦୁଇଟି ଘଟଣାର ବିଭାଗୀୟ ତଦନ୍ତ କରାଯିବାକୁ ଜିଲ୍ଲାପାଳ ନିର୍ଦ୍ଦେଶ ଦେବାକୁ ତାଙ୍କର ଦୃଷ୍ଟି ଆକର୍ଷଣ କରାଯାଉଛି ।