02-Jul-2024

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ ) ସୁବର୍ଣ୍ଣପୁର ଜିଲ୍ଲା ଦେଇ ଯାଇଥିବା ବଲାଙ୍ଗୀର-ଖୋର୍ଦ୍ଧା ଜାତୀୟ ରାଜପଥ ବା ସଦର ମହକୁମାର ପ୍ରାଣକେନ୍ଦ୍ର କୁହାଯାଉଥିବା ପୁରୁଣା ଜିଲ୍ଲାପାଳ ଅଫିସ ଚାରି ଛକରେ ଦିନକୁ ଦିନ ଦୁର୍ଘଟଣା ବୃଦ୍ଧି ପାଉଥିବା ଦେଖାଯାଇଛି। ପ୍ରତିଦିନ ଛୋଟବଡ ଦୁର୍ଘଟଣା ଘଟୁଥିବା ବେଳେ ପୂର୍ବରୁ ଏହି ଛକରେ ଅନେକ ଜୀବନ ମଧ୍ୟ ଗଲାଣି।  ଦୁର୍ଘଟଣାରେ ଅନେକ ଲୋକ ଆହତ ତଥା ଗାଡି ମଟର ସହିତ ଲୋକଙ୍କ ଧନଜୀବନ କ୍ଷତିଗ୍ରସ୍ତ ହେଉଥିବା ଦେଖାଯାଇଛି। କିନ୍ତୁ ସହରର ମଧ୍ୟଭାଗ ତଥା ଆଞ୍ଚଳିକ ପରିବହନ ବିଭାଗ କାର୍ଯ୍ୟାଳୟରୁ ମାତ୍ର ୧୦୦ ମିଟର ନିକଟରେ ଥିବା ସହରର ଏହି ପ୍ରମୁଖ ଛକରେ ପ୍ରତିଦିନ ଦୁର୍ଘଟଣା ଘଟୁଥିବା ବିଷୟ ଜିଲ୍ଲା ପ୍ରଶାସନର ଏଥି ପ୍ରତି ଦୃଷ୍ଟି ନ ପଡ଼ିବା ସହରବାସୀଙ୍କୁ ଆଶ୍ଚର୍ଯ୍ୟ କରିଛି l ଗତକାଲି ରାତି ୮  ଟା ବେଳେ ଏହି ଛକରେ କଚେରି ଛକରୁ ପଟାଭାଡିକୁ ସ୍କୁଟିରେ ଝିଅକୁ ଟିଉସନ୍ ରୁ ନେଇ ଫେରୁଥିବା ମା ଝିଅଙ୍କୁ ଏକ ଦ୍ରୁତଗାମୀ ବୋଲେରୋ(ନଂ ଓ ଡି ୩୧ ଡି ୨୮୮୨) ଜୋରରେ ଧକ୍କା ଦେଇଥିଲା। କିନ୍ତୁ ମା ଙ୍କ ଉପସ୍ଥିତ ବୁଦ୍ଧି ବଳରେ ସ୍କୁଟିକୁ ଡାହାଣ ପଟକୁ ହଠାତ୍ ମୋଡ଼ି ଦେବାରୁ ପଛପଟୁ ଧକ୍କା ଦେଇଥିଲା ବୋଲେରୋ। ଝିଅ ଟି ଗୁରୁତର ଆହତ ହୋଇ ଘଟଣାସ୍ଥଳରେ  ଅଚେତ୍ ହୋଇ ଯାଇଥିବା ବେଳେ ସ୍କୁଟି ଚାଳକ ମା ମଧ୍ୟ ନିକଟ ଡ୍ରେନ୍ କୁ ଛିଟିକି ପଡିଥିଲେ ଏବଂ ଅଳ୍ପକେ ବଞ୍ଚି ଯାଇଥିଲେ ଉଭୟ ମା ଓ ଝିଅ l ଏଠି ପ୍ରଶ୍ନ ଉଠେ ଯେ ସର୍ଦ୍ଧlପାଲି ନିକଟରେ ଗଢ଼ି ଉଠୁଥିବା ରାଜ୍ୟର ଜଣେ  ପୁରୁଣା ଟାଣୁଆ ନେତାଙ୍କ ଏହି  ଇଥାନଲ ଫ୍ୟାକ୍ଟ୍ରି ର କର୍ମଚାରୀ ପ୍ରଚୁର ମଦ୍ୟପାନ କରି ସହରରେ କିଭଳି ବେପରୁଆ ଭାବରେ ଗାଡ଼ି ଚଳାଉ ଥିଲେ ଏବଂ  ଲୋକଙ୍କ ଜୀବନ ସହିତ ଖେଳ ଖେଳିଥିଲେ ତାହା ସହରବାସୀ ନିନ୍ଦା କରିଛନ୍ତି l ଏହି ବେପରୁଆ ଗାଡ଼ି ଚାଳକ ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ନେଇ ଏହି ଛକ ସମେତ ସହରର ପ୍ରତ୍ୟେକ ଛକରେ ଟ୍ରାଫିକ ବ୍ୟବସ୍ଥାକୁ କଡାକଡି କରିବାକୁ ଦାବୀ କରିଛନ୍ତି l