02-Jul-2024

ରେଢ଼ାଖୋଲ ( ଅନିଲ ପୃଷ୍ଟି ) ସମ୍ବଲପୁର ଜିଲ୍ଲା ଯୁଯୁମୁରା ଥାନା ଅନ୍ତର୍ଗତ ଜରାସିଂଗା ଗ୍ରାମରେ ଭୋଟର କାର୍ଡ ଜାଲିଆତି କରି ଜମି ବିକ୍ରି କରିଥିବା ଅଭିଯୋଗରେ ମଙ୍ଗଳବାର ଅପରାହ୍ନ ୧ ଟା ସମୟରେ ୨ ଜଣଙ୍କୁ ଗିରଫ କରିଛି ଯୁଯୁମୁରା ପୋଲିସ । ଗିରଫ ମାନେ ହେଲେ ମୁଖ୍ୟ ଅଭିଯୁକ୍ତ ସମ୍ବଲପୁର ସହରର ନକ୍ସାପାଲି ସୁଧିର ବେହେରା ଓ ଚାରମାଳ 
ଥାନା ଅନ୍ତର୍ଗତ ମୁଗପାଲ ଗ୍ରାମର ଦିଗାମ୍ବର ମିର୍ଦ୍ଧା ।  ସୂଚନାଯୋଗ୍ୟ ଯେ ଅଭିଯୁକ୍ତ ମାନେ ଯୁଯୁମୁରା ତହସିଲ ଅନ୍ଧାରୀ ଗ୍ରାମର ପ୍ରଫୁଲ୍ଲ ରାଣାଙ୍କ ଜରାସିଙ୍ଗା ମୈାଜା ଖାତା ନଂ ୪ ରେ ୪ ଏକର ୫୩ ଡିସିମିଲ ଜମିକୁ ସମ୍ବଲପୁରର ଜଗଦିଶ ପଣ୍ଡା ନାମକ ଜଣେ ବ୍ୟକ୍ତିଙ୍କ ଠାରେ ଜାଲ କାଗଜପତ୍ର କରି ବିକ୍ରି କରିଛନ୍ତି ।  ଏନେଇ ଜମି ମାଲିକ ପ୍ରଫୁଲ୍ଲ ରଣା ଗତ ମେ ମାସରେ ଯୁଯୁମୁରା ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୋଲିସ ତଦନ୍ତ କରି  ଜାଣିବାକୁ ପାଇଲା ଯେ ଜମିର ମାଲିକ ପ୍ରଫୁଲ୍ଲ ରାଣା ଙ୍କ ନାମରେ ଦିଗାମ୍ବର ମିର୍ଦ୍ଧା ନାମକ ଜଣେ ବୃଦ୍ଧ ବ୍ୟକ୍ତି ଜାଲ ଭୋଟର କାର୍ଡ ଓ ଅନ୍ୟ ସବୁ କାଗଜପତ୍ର ବାହାର କରି ନିଜେ ସେହି ଜମିର ମାଲିକ ଦର୍ଶାଇ ଗତ ୨୦୨୨ ମସିହା ନଭେମ୍ବର ମାସ ୨୨ ତାରିଖରେ ସମ୍ବଲପୁର ରେଜେଷ୍ଟ୍ରି ଅଫିସରେ ଜଗଦିଶ ପଣ୍ଡା ନାମକ ଜଣେ ବ୍ୟକ୍ତିଙ୍କୁ ବିକ୍ରି କରିଥିଲା ଏନେଇ ପୋଲିସ ତଦନ୍ତ କରି ଏହି ଘଟଣାର ମୁଖ୍ୟ ଅଭିଯୁକ୍ତ ନକ୍ସାପାଲିର ସୁଧିର ବେହେରା ନାମକ ଜଣେ ଜମି ଦଲାଲ ଏହି ଜମି ଜାଲିଆତିର ମାଷ୍ଟର

ମାଇଣ୍ଡ ବୋଲି ଜାଣିବାକୁ ପାଇ ଛାନଭିନ କରି  ଦୁଇ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଉକ୍ତ ଜମିକୁ ଦଲାଲ ମାନେ ୫୦ ଲକ୍ଷ ୨୦ ହଜାର ଟଙ୍କାରେ ବିକ୍ରି କରିଛନ୍ତି । ସେଥିରୁ ସମ୍ବଲପୁର ଡିସିବି ବ୍ୟାଙ୍କ ରେ ଦିଗାମ୍ବର ମିର୍ଦ୍ଧାଙ୍କ ନାମରେ ୬ ଲକ୍ଷ ୫୦ ହଜାର ଟଙ୍କା ଫିକ୍ସ ଡିପୋଜିଟ କରିଥିବା ବେଳେ ସୁଧିର ବେହେରା ମୁଥୁଡ ଫାଇନାନ୍ସ କମ୍ପାନୀରେ କିଛି ସୁନା କିଣି ବନ୍ଧା ଦେଇଛି ଏବଂ ଏକ ବୁଲେଟ ମଧ୍ୟ କିଣିଥିବା ଜଣାପଡିଛି ଯାହା ପୋଲିସ ଉକ୍ତ ବୁଲେଟ କୁ ଜବତ କରିଛି । ଏଥିରେ ଅନ୍ୟ ସହଯୋଗୀ କେଉଟିବାହାଲି ଗ୍ରାମର ଜ୍ଞାନେନ୍ଦ୍ର ପଣ୍ଡା ୩ ଲକ୍ଷ ଟଙ୍କା ନେଇ ଥିବା ବେଳେ ଭଗବାନ ସବର ୧ ଲକ୍ଷ ୫୦ ହଜାର ଟଙ୍କା ଭାଗ ନେଇଥିବା ଜଣାପଡିଛି । ତେବେ ଜ୍ଞାନେନ୍ଦ୍ର ପଣ୍ଡା ଓ ଭଗବାନ ସବର ଫେରାର ଥିବାବେଳେ ସେମାନଙ୍କୁ ଖୁବ ଶୀଘ୍ର ଗିରଫ କରାଯିବ ବୋଲି ପୋଲିସ ଏସଡିପିଓ ପ୍ରଶାନ୍ତ ମେହେର ସୂଚନା ଦେଇଛନ୍ତି ।