20-Jun-2024

ସିନ୍ଧେକେଲା(ଦୀନେଶ ଜୈନ)- ବଙ୍ଗୋମୁଣ୍ଡା ବ୍ଲକ ଅନ୍ତର୍ଗତ ସିନ୍ଧେକେଲା ହାଟପଦା ସ୍ଥିତ ଗ୍ରାମର ଜଗତ ଜନନୀ ମାଁ ଦୁର୍ଗା ଦେବୀଙ୍କ ନୂତନ ଭବ୍ୟ ମଣ୍ଡପ  ର ପ୍ରଥମ ବାର୍ଷିକ ପ୍ରତିଷ୍ଠା ଦିବସ ପାଳନ କରାଯାଇଛି । ସାର୍ବଜନୀନ ମାଁ ଦୁର୍ଗା ମଣ୍ଡପ ନିର୍ମାଣ କମିଟି ପକ୍ଷରୁ ଆୟୋଜିତ ବାର୍ଷିକ ଉତ୍ସବରେ ଗତକଲି ସୋମବାର ପ୍ରାତଃ ୬ ଘଣ୍ଟା ସମୟରେ କଳସାଧିବାସ କାର୍ଯ୍ୟକ୍ରମରେ ମଣ୍ଡପ ନିର୍ମାଣ ଓ ଦୁର୍ଗାପୂଜା କମିଟିର ସଦସ୍ୟ ସମେତ ଗ୍ରାମର ଅନେକ ଲୋକ ସ୍ଥାନୀୟ ଦ୍ୱାରସେହ୍ନି ମନ୍ଦିର ନିକଟ ପବିତ୍ର ପୁଷ୍କରିଣୀ ବାଣୀବଘାର ରୁ ବାଦ୍ୟଯନ୍ତ୍ର ସହ କଳସ ଆଣି ପୂଜା ମଣ୍ଡପରେ ସ୍ଥାପନ କରିଥିଲେ ।ସକାଳ ୮ ଘଣ୍ଟା ସମୟରୁ ସନ୍ଧ୍ୟା ୫ ଟା ପର୍ଯ୍ୟନ୍ତ ଚଣ୍ଡୀପାଠ ଯଜ୍ଞ ଆୟୋଜିତ ହୋଇଥିଲା । ଉକ୍ତ ଯଜ୍ଞରେ ମଣ୍ଡପ ନିର୍ମାଣ କମିଟି ସଭାପତି ସରୋଜ ଜୈନ ଓ ତାଙ୍କ ଧର୍ମପତ୍ନୀ ସଞ୍ଜୁ ଜୈନ , ସୁନିଲ ପଣ୍ଡା ଓ ତାଙ୍କ ଧର୍ମପତ୍ନୀ ପ୍ରଭାସିନୀ ପଣ୍ଡା କର୍ତ୍ତା ଦାୟିତ୍ୱ ଗ୍ରହଣ କରିଥିବା ବେଳେ ପୂଜକ ଭାବରେ ପଣ୍ଡିତ ଛନ୍ଦା ଚରଣ ମିଶ୍ର , ଶାନ୍ତ ମଣି ମିଶ୍ର , ରଜନୀକାନ୍ତ ଠାକୁର , ଭରତ ତ୍ରିପାଠୀ ପ୍ରମୁଖ ଯୋଗଦେଇ ପୂଜା କାର୍ୟ ସମ୍ପାଦିତ କରିବା ସହ ମନ୍ତ୍ରପାଠ କରିଥିଲେ । ଏହି ଅବସରରେ ମଣ୍ଡପ ନିକଟରେ ସକାଳୁ ଅଷ୍ଟପ୍ରହରି ହରିନାମ ଯଜ୍ଞ ଅନୁଷ୍ଠିତ ହୋଇଥିଲା । ସେଥିରେ କର୍ତ୍ତା ଦାୟିତ୍ବ ବିଜୟ ପାଣ୍ଡିଆ ଓ ତାଙ୍କ ସହଧର୍ମିଣୀ ତୁଲାଇଥିଲେ । ଆଜି ମଙ୍ଗଳବାର ସକାଳ ସମୟରେ ଦୁହିଁ ଯଜ୍ଞ ସମାପନ ଓ ପୂର୍ଣ୍ଣାହୁତି ହୋଇଥିଲା । ଆୟୋଜକ କମିଟି ସଭାପତି ସରୋଜ ଜୈନଙ୍କ ନେତୃତ୍ୱରେ ଆୟୋଜିତ କାର୍ଯ୍ୟକ୍ରମରେ ମଣ୍ଡପ ନିର୍ମାଣ ଓ ପୂଜା କମିଟିର ସମସ୍ତ ସଦସ୍ୟ ସହ ଗ୍ରାମର ଯୁବଗୋଷ୍ଠୀ ବିଶେଷ ସହଯୋଗ କରିଥିଲେ ।