20-Jun-2024

କଣ୍ଟାମାଲ(ଜୟ କୁମାର ମହାରଣାଙ୍କ ରିପୋର୍ଟ): ରାଜ୍ୟରେ ବିଜେପି ଦାଦନମୁକ୍ତ ଓଡ଼ିଶା ଗଠନ କରିବାକୁ ନିର୍ବାଚନ ସମୟରେ ଅନେକ ଘୋଷଣା କରିଥିଲେ | ହେଲେ ସରକାର ଗଠନ ହେବା ପରଠାରୁ ଦାଦନ ଶ୍ରମିକ ଯିବା ଆରମ୍ଭ ହୋଇ ଥିବା ଦେଖିବାକୁ ମିଳିଛି | ସରକାର ଗରିବ ଲୋକଙ୍କୁ ନିଜ ଅଞ୍ଚଳରେ କାମ ଯୋଗାଇ ଦେବାକୁ କୋଟି କୋଟି ଟଙ୍କା ଖର୍ଚ୍ଚ ହେଉଛି ହେଲେ ଗରିବ ଶ୍ରମିକମାନେ କାମ ନ ପାଇ ଦାଦନ ଖଟି ଯିବାକୁ ବାଧ୍ୟ ହେଉଛନ୍ତି | ଏଭଳି ଏକ ବିକଳ ଚିତ୍ର ଦେଖିବାକୁ ମିଳିଛି ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକରେ | ସୂଚନା ଅନୁସାରେ କଣ୍ଟାମାଳ ବ୍ଲକ ପଲସା ଗୋରା ପଞ୍ଚାୟତ ଝୀଙ୍କର ପାଲି ଗ୍ରାମର ୪ ପରିବାର ଆଜି କାମଧନ୍ଦା ଅଭାବରୁ ସୁଦୂର ତାମିଲନାଡୁ କୁ ଦାଦନ ଖଟି ଯାଉଥିବା ଦେଖିବାକୁ ମିଳିଛି | ଏକ ଅଟୋ ସାହାଯ୍ୟରେ ଉକ୍ତ ୪ ପରିବାରର ପାଖାପାଖି ୧୫ ସଦସ୍ୟ ବଲାଂଗୀର ଯାଇ ସେଠାରୁ ଟ୍ରେନ ଯୋଗେ ତାମିଲନାଡୁ ଯିବେ ବୋଲି ଗ୍ରାମବାସୀ କହିଛନ୍ତି | ଏମାନଙ୍କ ସହିତ ଛୋଟ ଛୋଟ ଛୁଆ ମଧ୍ୟ ଯାଉଥିବା ଦେଖିବାକୁ ମିଳିଛି | କୌଣସି ସର୍ଦ୍ଦାର ମାଧ୍ୟମରେ ଅଗ୍ରୀମ ଟଙ୍କା ଆଣି ଯାଉଥିବା ଗ୍ରାମବାସୀ ସୂଚନା ଦେଇଛନ୍ତି | ସବୁଠୁ ଆଶ୍ଚର୍ଯ୍ୟ କଥା ଯେ ଦାଦନ ପ୍ରବଣ କଣ୍ଟାମାଳ ଅଞ୍ଚଳରେ ଲଗାତାର ଭାବରେ ଶ୍ରମିକ ବାହାର ରାଜ୍ୟ ସହ ବିଦେଶକୁ ଯାଉଥିବା ବେଳେ ଜିଲ୍ଲା ପ୍ରଶାସନ, ଜିଲ୍ଲା ଶ୍ରମ ବିଭାଗ କି ସ୍ଥାନୀୟ ପୋଲିସ କେହି ବି ଜାଣି ପାରୁ ନାହାନ୍ତି | ଅନ୍ୟପଟେ ଜିଲ୍ଲା ଶ୍ରମ ବିଭାଗର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି | ଅନେକ ଦାଦନ ଶ୍ରମିକ ବାହାର ରାଜ୍ୟକୁ ଯାଇ ମାଲିକର ନିର୍ଯାତନାର ଶିକାର ହୋଇ ଉଦ୍ଧାର ପାଇଁ ପ୍ରଶାସନ ନିକଟରେ ଆକୁଳ ନିବେଦନ କରୁଥିବା ବେଳେ ପ୍ରଶାସନ ପକ୍ଷରୁ ତାଙ୍କୁ ଉଦ୍ଧାର କରାଯାଇଥିବା ଅନେକ ଉଦାହରଣର ନଜିର ରହିଛି | ଏତେ ଗୁଡିଏ ଶ୍ରମିକ ଯାଉଥିଲେ ସୁଦ୍ଧା ଜିଲ୍ଲା ଶ୍ରମ ବିଭାଗ ନିକଟରେ କୌଣସି ଖବର ନ ଥିବା ପରିତାପର ବିଷୟ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି | ତେବେ ବିଜେପି ସରକାର ଘୋଷଣା କରିଥିବା ଦଦନମୁକ୍ତ ଓଡ଼ିଶା କଣ୍ଟାମାଳ ଭଳି ଅବହେଳିତ ଓ ଉପାନ୍ତ ଅଞ୍ଚଳରେ କେତେ କାର୍ଯ୍ୟକାରୀ ହେଉଛି ଓ ଦାଦନ ରୋକିବାରେ ସରକାର କେତେ ସଫଳ ହେଉଛନ୍ତି ତାହା ଦେଖିବାକୁ ବାକି ରହିଲା | ଜିଲ୍ଲା ପ୍ରଶାସନ ଓ ଶ୍ରମ ଏ ଦିଗରେ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ବୁଦ୍ଧିଜୀବୀ ମହଲରେ ଦାବି ହେଉଛି |