27-Dec-2020

ବଲାଙ୍ଗୀର, (ପ୍ରେରଣା ଖବର)- ଆଜି ବଲାଙ୍ଗୀର ଜିଲ୍ଲା ଓକିଲ ସଂଘ ପକ୍ଷରୁ ସ୍ଥାନୀୟ ତହସିଲ କୋର୍ଟ ପରିସରରେ ବୃକ୍ଷରୋପଣ କରାଯାଇ ଥିଲା । ପରେ ତହସିଲ କୋର୍ଟର ବିଭିନ୍ନ ସମସ୍ୟା ଓ ଏହାର ସମାଧାନ ପାଇଁ ଏଠାରେ କାର୍ଯରତ ତହସିଲଦାର ମଘବାନ ବାଗଙ୍କ ସହ ଓକିଲ ମାନେ ବିସ୍ତ୍ରୁତ ଆଲୋଚନା କରିଥିଲେ । ଏହି ଅବସରରେ ତହସିଲ କୋର୍ଟ ଠାରେ ଏକ ସଭାର ଆୟୋଜନ କରାଯାଇଥିଲା । ଜିଲ୍ଲା ଓକିଲ ସଂଘର ସଭାପତି ପ୍ରବୀଣ କୁମାର ମିଶ୍ର  ଓ ସମ୍ପାଦକ ବସୁଦେବ ରଥଙ୍କ ମିଳିତ ପରିଚାଳନାରେ  ଅନୁଷ୍ଠିତ ଏହି ସଭାରେ ନିମନ୍ତ୍ରିତ ଅତିଥି ଭାବରେ ବଲାଙ୍ଗୀର ତହସିଲଦାର ମଘବାନ ବାଗ ଯୋଗ ଦେଇଥିଲେ । ତହସିଲ ଅଫିସରେ ଚାଲିଥିବା ଦଲାଲି ରାଜ ଏବଂ ଷ୍ଟାମ୍ପ ପେପରର କଳାବଜାରୀକୁ କିପରି ରୋକାଯାଇ ପାରିବ ସେ ନେଇ ତହସିଲଦାରଙ୍କ ସହ  ଆଲୋଚନା ହୋଇଥିଲା । ତହସିଲ ଅଫିସରେ ମ୍ୟୁଟେସନ କାମ ଓ ଅନ୍ୟାନ୍ୟ ଜମିବାଡି ସଂକ୍ରାନ୍ତୀୟ କାମରେ ତହସିଲ ଅଫିସର କିଛି ଅସାଧୁ କର୍ମଚାରୀ ଓକିଲ ମାନଙ୍କ ଅଯଥାରେ ହଇରାଣ କରି କାମ ବିଳମ୍ବ କରୁଥିବା ବେଳେ ଲାଞ୍ଚ ଦେଲେ ତୁରନ୍ତ କାମ ହୋଇଯାଉଥିବା ଓକିଲ ମାନେ ତହସିଲଦାରଙ୍କୁ ଅଭିଯୋଗ କରିଥିଲେ । ପୁଣି ତହସିଲ ଅପିସରେ କିଛି କର୍ମଚାରୀ ବର୍ଷ ବର୍ଷ ଧରି ଏଠାରେ ରହି ନିଜର ମନମୁଖୀ କାରବାର ଚାଳାଇ ଆସିଥିବା ଅଭିଯୋଗ ହୋଇଛି । ଏ ନେଇ ସଂପୃକ୍ତ କର୍ମଚାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରୀ ବାଗ ପ୍ରତିଶୃତି ଦେଇଛନ୍ତି । ଜିଲ୍ଲା ଓକିଲ ସଂଘର ସଂପାଦକ ବାସୁଦେବ ରଥଙ୍କ ପରିଚାଳନାରେ ଆୟୋଜିତ ଏହି ଆଲୋଚନାରେ ଅନ୍ୟ ମାନଙ୍କ ମଧ୍ୟରେ ଏଡ୍‌ଭୋକେଟ ରବି ନାରାୟଣ ବହିଦାର, ମାଧବ ପୁରୋହିତ, ସୁରେନ୍ଦ୍ର ମିଶ୍ର, ନୋଟାରୀ କରୁଣାକର ଷଡଙ୍ଗୀ, ଓଁକାର ନାୟକ, ରୁଦ୍ର ଥନାପତି, ସଂଜୀବ ହୋତା, ବାବୁ ପାଣ୍ଡେ, ଲତାଶ୍ରୀ ରାଓ, ସ୍ମିତା ମହାପାତ୍ର, ହରିଶଙ୍କର ପଣ୍ଡା ପ୍ରମୁଖ ଅଂଶଗ୍ରହଣ କରିଥିଲେ ।