22-Apr-2024

ବଲାଙ୍ଗିର(ପ୍ରେରଣା ଖବର):ଟିଟିଲାଗଡ ଉପଖଣ୍ଡରେ ପାନୀୟ ଜଳଯୋଗାଣ ବ୍ୟବସ୍ଥା ଫେଲ୍ ମାରିଥିବା ନେଇ ଅଭିଯୋଗ ହୋଇଛି।ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ଅନ୍ତର୍ଗତ ବିଭିନ୍ନ ପ୍ରକଳ୍ପ ଏ ଯାଏ ସମ୍ପୂର୍ଣ ହୋଇ ନ ଥିବା ବେଳେ ବିଭିନ୍ନ ପଞ୍ଚାୟତରେ ଜଳ କଷ୍ଟ ଚରମ ସୀମାରେ ପହଞ୍ଚିଛି।ଟିଟିଲାଗଡ ବ୍ଲକ ଅନ୍ତର୍ଗତ କୁଶକେଲା ପଞ୍ଚାୟତରେ ୪ ମାସରୁ ଉର୍ଦ୍ଧ୍ୱ ଧରି ଜଳ ଯୋଗାଣ ବ୍ୟବସ୍ଥା ବନ୍ଦ ହୋଇ ପଡ଼ିଛି।ସେହିପରି ବ୍ଲକ ଅନ୍ତର୍ଗତ ଡୁମେରବାହାଲ, ସିକୁଆଁ, ସିଲୁଆଁରେ ମଧ୍ୟ ଅନୁରୂପ ସ୍ଥିତି ଲାଗି ରହିଛି।ସଇଁତଳା ବ୍ଲକ ଟିକ୍ରାପଡା ପଞ୍ଚାୟତ ଅନ୍ତର୍ଗତ କୁଡ଼ାସିଙ୍ଗାରେ ଗତ ୨୦୨୧ ମସିହାରୁ ଜଳ ଯୋଗାଣ ପ୍ରକଳ୍ପ କାମ ସରିଥିଲେ ସୁଦ୍ଧା ଏ ଯାଏ ଜଳ ଯୋଗାଣ ଆରମ୍ଭ ହୋଇ ପାରି ନାହିଁ। ରାଜ୍ୟ ତଥା ଦେଶର ଉତ୍ତପ୍ତ ଅଞ୍ଚଳ ଭାବରେ ପରିଚିତ ଏହି ଉପଖଣ୍ଡରେ ପାରଦ ବୃଦ୍ଧି ସାଙ୍ଗକୁ ଜଳ କ୍ଳିଷ୍ଟ ଅଞ୍ଚଳବାସୀଙ୍କ ପ୍ରତି ବୋଝ ଉପରେ ନଳିତାବିଡା ସଦୃଶ ହୋଇଛି।ରାଜ୍ୟ ତଥା କେନ୍ଦ୍ର ସରକାର ସାଧାରଣ ଲୋକଙ୍କୁ ପାନୀୟ ଜଳ ଯୋଗାଣ ପାଇଁ କୋଟି କୋଟି ଟଙ୍କା ଖର୍ଚ୍ଚ କରି ବିଭିନ୍ନ ଯୋଜନା ଅନ୍ତର୍ଗତ ପ୍ରକଳ୍ପ ଆରମ୍ଭ କରିଥିବା ବେଳେ ସଂପୃକ୍ତ ବିଭାଗର ଅପାରଗତା ଯୋଗୁଁ ଅଞ୍ଚଳବାସୀ ମୌଳିକ ସୁବିଧାପାଇବାରୁ ବଞ୍ଚିତ ହେଉଛନ୍ତି। ଅଞ୍ଚଳବାସୀଙ୍କ ଅଭିଯୋଗ ପରେ ବିଭାଗୀୟ ଏସ.ଡି.ଓ ଓମ ପ୍ରକାଶ ଦେହୁରୀଙ୍କୁ ଦୃଷ୍ଟି ଆକର୍ଷଣ କରାଯାଇଥିବା ବେଳେ ସେ କେତେକ ସ୍ଥାନରେ ବିଦ୍ୟୁତ୍ ସରୋବରାହ ସମସ୍ୟା ଥିବା ଓ ଖୁବ୍ ଶୀଘ୍ର ଏହାର ସମାଧାନ କରାଯିବ ବୋଲି କହିଥିଲେ।ସେହିପରି ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ଅତିରିକ୍ତ କାର୍ଯ୍ୟ ନିର୍ବାହୀ ଯନ୍ତ୍ରୀ ରୋପ୍ୟ ରଞ୍ଜନ ବେହେରାଙ୍କୁ ଯୋଗାଯୋଗ କରାଯିବାରୁ ସେ ନୂତନ ଭାବରେ ଆସିଥିବା ଏବଂ ସମସ୍ତ ଅଭିଯୋଗ ଉପରେ ଦୃଷ୍ଟି ଦେଇ ସମାଧାନ ପାଇଁ ପଦକ୍ଷେପ ନେବେ ବୋଲି କହିଥିଲେ। ତେବେ ଗ୍ରୀଷ୍ମ ଋତୁରେ ପିଇବା ପାଣି ପାଇଁ ଅଞ୍ଚଳ ବାସି ଡ଼ହକବିକଳ ହେଉଥିବା ବେଳେ ବିଭାଗୀୟ ଅଧିକାରୀଙ୍କ ଉଦାସୀନତା ଯୋଗୁଁ ସରକାରୀ ଯୋଜନା ଫେଲ ମାରିଥିବା ସାଧାରଣ ରେ ଅଭିଯୋଗ ହେଉଛି l