21-Apr-2024

ବାଲାଙ୍ଗୀର(ପ୍ରେରଣା ଖବର )-ନୂତନ କରି ଗଠନ ହୋଇଥିବା ରାଜେନ୍ଦ୍ର ବିଶ୍ୱବିଦ୍ୟାଳୟର ଏନଏସଏସ ବ୍ୟୁରୋର ପ୍ରଥମବୈଠକ ଅନୁଷ୍ଠିତ ହୋଇଯାଇଛି । ଶନିବାର ଦିନ ରାଜେନ୍ଦ୍ର ବିଶ୍ୱବିଦ୍ୟାଳୟଠାରେ କାର୍ଯ୍ୟକ୍ରମ ସଂଯୋଜକ ଶ୍ରୀମତୀ ପ୍ରିୟଙ୍କା ଚକ୍ରବର୍ତ୍ତିଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ଏନଏସଏସ ବ୍ୟୁରୋର ବଲାଙ୍ଗୀର ଜିଲ୍ଲାଅଧିକାରୀ ଡ.ଅଜିତ କୁମାର ଭୋଇ ଓ ସୋନପୁର ଅଧିକାରୀ ଡ.ମନୋରଂଜନ ଘଡେଇ ଯୋଗଦେଇଥିଲେ । ରାଜେନ୍ଦ୍ର ବିଶ୍ୱବିଦ୍ୟାଳୟର କାର୍ଯ୍ୟକ୍ରମ ଅଧିକାରୀ ଦିପ୍ତିମୟୀ ନାୟକ ଓ ମନୋରଂଜନ ପଟେଲ ବିବରଣୀପ୍ରଦାନ କରିଥିଲେ । ଏହି ବୈଠକରେ ଜେଡବିଏସଏ ଆକାଉଣ୍ଟ,ନୂତନ ୟୁନିଟ ସ୍ଥାପନ ତଥା ଆଗାମୀ ସମୟରେ ଔପଚାରିକ ଭାବରେ ଏନଏସଏସ ବ୍ୟୁରୋ ସ୍ଥାପନ ନିମିତ୍ତ ଏକ ଉତ୍ସବ ପାଳନ କରାଯିବାକୁ ସ୍ଥିର କରାଗଲା । ପ୍ରକାଶ ଯେ,ପୂର୍ବରୁ ବଲାଙ୍ଗୀର ଓ ସୋନପୁର ଜିଲ୍ଲାର କଲେଜ ଗୁଡିକ ସମ୍ବଲପୁର ବିଶ୍ୱବିଦ୍ୟାଳୟ ଅଧିନରେ ରହୁଥିଲା । ଏବେ ଉଭୟ ଜିଲ୍ଲାର କଲେଜଗୁଡିକ ରାଜେନ୍ଦ୍ର ବିଶ୍ୱବିଦ୍ୟାଳୟ ଅଧିନକୁ ଆସିବାରୁ ରାଜ୍ୟସାରକାରଙ୍କ କ୍ରୀଡା ଓ ଯୁବବ୍ୟାପାର ବିଭାଗ ଅନୁକୂଲ୍ୟରେ ରାଜେନ୍ଦ୍ର ବିଶ୍ୱବିଦ୍ୟାଳୟରେ ଏନଏସଏସ ବ୍ୟୁରୋ ଆରମ୍ଭ କରାଗଲା । ଏବେ ଉଭୟ ବଲାଙ୍ଗୀର ଓ ସୋନପୁର ଜିଲ୍ଲାର ଛାତ୍ରଛାତ୍ରୀ ଏହା ଫଳରେ ଉପକୃତ ହେବେ ବୋଲି ଆଲୋଚନା ହେଉଛି ।