19-Mar-2024

ବଲାଙ୍ଗୀର(ପ୍ରେରଣା ଖବର)- ବଲାଙ୍ଗୀର ପାରାଡାଇଜ୍ ଜୁଏଲେରୀରୁ ୧ଲକ୍ଷ ୬୪ ହଜାର ୪ଶହ ଟଙ୍କାର ସୁନା କିଣି ଚେକ୍ ପ୍ରଦାନରେ ଜାଣିଶୁଣି ଠକାମୀ କରିଥିବା ଦୋଷରେ ଜନୈକ କ୍ରେତା ବାବୁଲାଲ ମେହେରଙ୍କୁ ଦଫା ଦଫା ୧୩୮ ନେଗୋସିଏବଲ ଇନଷ୍ଟ୍ରୁମେଣ୍ଟ ଆକ୍ଟରେ ବଲାଙ୍ଗୀର ଜେଏମ୍‌ଏଫ୍‌ସି କୋର୍ଟ ୨ ବର୍ଷର ଜେଲଦଣ୍ଡାଦେଶ ଶୁଣାଇଛନ୍ତି । ଗତ ମାର୍ଚ୍ଚ ୧୨ ତାରିଖ ଦିନ ବଲାଙ୍ଗୀର ମାନ୍ୟବର ଜେଏମ୍‌ଏଫ୍‌ସି କୋର୍ଟ ରେ ଏହି ଗୁରୁତ୍ୱପୁର୍ଣ୍ଣ  କେସ୍ ର  ରାୟ ପ୍ରକାଶ ପାଇଛି ।

  ସୂଚନାରୁ ପ୍ରକାଶ ଯେ, ଗତ ୨ଠ୨୧ ଜାନୁୟାରୀ ୨୨ ତାରିଖରେ ବଲାଙ୍ଗୀର ଆୟୁର୍ବେଦିକ କଲେଜ ସମ୍ମୁଖସ୍ଥ ପିଏଚଡି ଅଫିସରରେ କାର୍ଯ୍ୟରତ କର୍ମଚାରୀ ବାବୁଲାଲ ମେହେର ବଲାଙ୍ଗୀର ରମାଇ ଟକିଜ୍ ରୋଡ ସ୍ଥିତ ଏମ୍‌/ଏସ୍ ପାରାଡାଇଜ୍ ଜୁଏଲେରୀରୁ ୧ଲକ୍ଷ ୬୪ହଜାର ୪ଶହ ଟଙ୍କାର ସୁନା ଗହଣା କିଣିଥିଲେ । ସୁନାର ମୋଟ ଟଙ୍କା ରୁ ଶ୍ରୀ ମେହେର ୫ଠ ହଜାର ୪ଶହ ଟଙ୍କା ପ୍ରଦାନ କରି ୬ ମାସ ଭିତରେ ବକେୟା ଟଙ୍କା ୧ ଲକ୍ଷ ୧୪ହଜାର ଟଙ୍କା ଚେକ୍ ଆକାରରେ ପ୍ରଦାନ କରିବାକୁ କହିଥିଲେ । ଶ୍ରୀ ମେହେରଙ୍କ ସାଙ୍ଗରେ ଆସିଥିବା ତାଙ୍କ ବନ୍ଧୁ ବଲାଙ୍ଗୀର  ଆହ୍ଲାବାଦ ବ୍ୟାଙ୍କ କର୍ମଚାରୀ ଦିଗାମ୍ବର ମେହେର ମଧ୍ୟ ନିର୍ଦ୍ଧାରିତ ସମୟ ମଧ୍ୟରେ ଚେକ୍ ଆକାରରେ ସମସ୍ତ ଟଙ୍କା ଫେରସ୍ତ କରିବାକୁ ଦୋକାନ ମାଲିକଙ୍କୁ କଥା ଦେଇଥିଲେ । ଯେହେତୁ ପରାଡାଇଜ୍ ଜୁଏଲେରୀର ସମସ୍ତ ଟଙ୍କା ଲେଣଦେଣ କାରବାର ଆଲହାବାଦ ବେଙ୍କରେ ପରିଚାଳିତ ହେଉଥିଲା, ଦିଗାମ୍ବର ମେହେରଙ୍କୁ ଜୁଏଲେରୀ ଦୋକାନର ମାଲିକ ଭଲ ଭାବରେ ଜାଣିଥିଲେ ତେଣୁ ବନ୍ଧୁତ୍ୱ ଓ ବିଶ୍ୱାସ ଆଧାରରେ ଜୁଏଲେରୀ ଦୋକାନର ମାଲିକ ସଂଜୀବ କୁମାର ବରେଇ ତାଙ୍କୁ ଉଧାରୀ ସୂତ୍ରରେ ସୁନା ଗହଣା ଦେବାକୁ ରାଜି ହୋଇଥିଲେ । । ଗତ ୨୦୨୧ ଜୁଲାଇ ୨ ତାରିଖରେ ସୁନା କିଣିଥିବା ଶ୍ରୀ ମେହେର ଗହଣା ଦୋକାନକୁ ଯାଇ ୫୭ ହଜାର ଟଙ୍କାର ଏକ ଚେକ୍ (ନଂ ୪୨୧୪୭୧) ପ୍ରଦାନ କରିଥିଲେ । ଠିକ୍ ସେହି ଦିନ କ୍ରେତା ଜଣକ ୫୭ହଜାର ଟଙ୍କାର ଆଉ ଏକ ପୋଷ୍ଟ ଡେଟେଡ ଚେକ୍ ପ୍ରଦାନ କରିଥିଲେ । ତେବେ ବ୍ୟାଙ୍କରେ ଚେକ୍ ଡିପୋଜିଟ କଲା ବେଳେ ଇନ୍‌ସଫିସିଏଣ୍ଟ ଫଣ୍ଡସ ଯୋଗୁଁ ଦୁଇ ଟି ଯାକ ଚେକ୍ ବାଉନ୍ସ ହୋଇଥିବା ଜଣାପଡିଥିଲା । ଏ ସଂପର୍କରେ ଜୁଏଲେରୀ ଦୋକାନର ମାଲିକ କ୍ରେତାଙ୍କୁ ଜଣାଇଥିଲେ । କ୍ରେତା ଜଣକ  ଦୋକାନୀ ଙ୍କ କଥା ଶୁଣି ନଥିଲେ l ଠକାମୀର ଶୀକାର ହୋଇଥିବା ଜଣିବାକୁ ପାଇବା ପରେ ଗହଣା ଦୋକାନର ମାଲିକ ଶ୍ରୀ ମେହେରଙ୍କୁ ଡିମାଣ୍ଡ ନୋଟିସ ଜରିଆରେ ବାରମ୍ବାର ବକେୟା ଟଙ୍କା ଦେବା ପାଇଁ ଅନୁରୋଧ କରିଥିଲେ ମଧ୍ୟ ସେ ଦିନ ଗଡ଼ାଇ ଚାଲିଥିଲେ । ଶେଷରେ କୌଣସି ଉପାୟ ନ ପାଇ ଅଭିଯୋଗକାରୀ ସୁନା ଗହଣା ଦୋକାନ ମାଲିକ କୋର୍ଟର ଆଶ୍ରୟ ନେଇଥିଲେ । ମାନ୍ୟବର ଜେ ଏମ୍ ଏଫ୍ ସି କୋର୍ଟ ଆଇ.ସି.ସି କେସ୍ ନଂ ୫ଠ /୨ଠ୨୧ ଅନୁସାରେ ସମସ୍ତ ସାକ୍ଷୀ ଓ କାଗଜପତ୍ରକୁ ଭିତ୍ତି କରି ଦଫା ୧୩୮-ନେଗୋସିଏବଲ ଇନଷ୍ଟ୍ରୁମେଣ୍ଟ ଆକ୍ଟ(ଏନ୍ ଆଇ ଆକ୍ଟ) ରେ କ୍ରେତା ବାବୁଲାଲ ମେହେରଙ୍କୁ ଗୋଟିଏ ମାସ ଭିତରେ ବକେୟା ଟଙ୍କା ୧ଲକ୍ଷ ୪୯ ହଜାର ୯ଶହ ୧ଠ ଟଙ୍କା ପ୍ରଦାନ କରିବା ସହ ଅନାଦେୟ ଦୁଇ ବର୍ଷର ଜେଲ ଦଣ୍ଡଦେଶ ଶୁଣଇଇଛନ୍ତି । ଅଭିଯୋଗକାରୀଙ୍କ ପକ୍ଷରୁ ଆଇନଜୀବୀ ଚନ୍ଦ୍ରଶେଖର ମିଶ୍ର ମୁକଦ୍ଦମା ପରିଚାଳନା କରୁଥିଲେ ।