25-Nov-2023

ବଲାଙ୍ଗୀର(ପ୍ରେରଣା ଖବର)- ସଦାଇପାଲି ସ୍ଥିତ ରାମଜୀ ଯୁବକ ସଂଘ ଆନୁକୂଲ୍ୟରେ ତଥା ଜେ.ଏସ୍‌.ଏମ୍‌. ମହାବିଦ୍ୟାଳୟ ସହଯୋଗରେ ରାମଜୀ ଯୁବକ ସଂଘର ସମ୍ପାଦକ ଡା. ନାରାୟଣ ମିଶ୍ରଙ୍କ ଆହ୍ୱାନ କ୍ରମେ ଏକ ଯୁବ ନେତୃତ୍ୱ ବିକାଶ ତାଲିମ ଶିବିର ଜେ.ଏସ୍‌.ଏମ୍‌. ମହାବିଦ୍ୟାଳୟ ପରିସରରେ ଆୟୋଜିତ ହୋଇଯାଇଛି । ତାଲିମ ଶିବିର ପ୍ରାରମ୍ଭରେ ମହାବିଦ୍ୟାଳୟର ଅଧ୍ୟାପିକା କୁ. ଶାସ୍ୱତୀ ପୁରୋହିତଙ୍କ ଦ୍ୱାରା ସ୍ୱାଗତ ଭାଷଣ ପ୍ରଦାନ ପରେ ମହାବିଦ୍ୟାଳୟର ପ୍ରିନ୍‌ସିପାଲ ବିନୋଦ ପାଢ଼ୀ ତାଙ୍କର ସଂକ୍ଷିପ୍ତ ଭାଷଣ ପ୍ରଦାନ କରିଥିଲେ । ଛାତ୍ରଛାତ୍ରୀଙ୍କୁ ରାମଜୀ ଯୁବକ ସଂଘର କ୍ରୀଡ଼ା ସଂଯୋଜକ ଶ୍ରୀ ସୁନିଲ ବିଶ୍ୱାଲ ସରକାରଙ୍କ ବିଭିନ୍ନ ବିକାଶମୂଳକ କାର୍ଯ୍ୟକ୍ରମରେ ସାମିଲ ହେବା ପାଇଁ ଛାତ୍ର/ଛାତ୍ରୀଙ୍କୁ ଆହ୍ୱାନ ଦେଇଥିଲେ । ତାଲିମରେ ସାଧନକର୍ମୀ ଭାବରେ ଯୋଗଦାନ କରିଥିଲେ ଅଶୋକ କୁମାର ମେହେର, ପ୍ରକଳ୍ପ ସଂଯୋଜକ ରାମଜୀ ଯୁବକ ସଂଘ ଏବଂ ସେ ଯୁବ ନେତୃତ୍ୱ ବିକାଶର ବିଭିନ୍ନ ଦିଗ ଉପରେ ଆଲୋଚନା କରି ସମସ୍ତ ଛାତ୍ରଛାତ୍ରୀଙ୍କୁ ଶୃଙ୍ଖଳାର ସହିତ ଦେଶର ହିତ ପାଇଁ କାର୍ଯ୍ୟ ସମ୍ପାଦନ କରିବା  ନିମିତ ଉତ୍ସାହିତ କରିଥିଲେ ।

ନିଜର ବାର୍ତ୍ତା  ମାଧ୍ୟମରେ ସାଇଟ୍ ର ପ୍ରତିଷ୍ଠାତା ଡା. ଶ୍ରୀକର ମିଶ୍ର ଛାତ୍ରଛାତ୍ରୀଙ୍କ ଉଜ୍ଜ୍ୱଳ ଭବିଷ୍ୟତ କାମନା କରି ତାଙ୍କୁ ଶୁଭେଚ୍ଛା ଜଣାଇଥିଲେ । କାର୍ଯ୍ୟକ୍ରମକୁ ସଫଳ କରିବା ପାଇଁ ଜେ.ଏସ୍‌.ଏମ୍‌. ମହାବିଦ୍ୟାଳୟର ଅଧ୍ୟକ୍ଷ ସି ଏ ଶ୍ରୀ ଶ୍ରୀକାନ୍ତ ଶର୍ମା ଏବଂ ପରିଚାଳିକା ଶ୍ରୀମତୀ ସୁମନ ଶର୍ମା ସମସ୍ତ ପ୍ରକାର ସହଯୋଗ ପ୍ରଦାନ କରିଥିଲେ । ଶେଷରେ ଅଧ୍ୟାପିକା ଅଙ୍କିତା ମିଶ୍ର ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମକୁ ସଂଯୋଜନା କରିଥିଲେ ଜେ ଏସ୍ ଏମ୍  ମହାବିଦ୍ୟାଳୟର ସଂଯୋଜିକା ଶ୍ରୀମତୀ ହିମାନୀ ତ୍ରିପାଠୀ । କାର୍ଯ୍ୟକ୍ରମକୁ ସଫଳ କରିବାରେ ତନୁଜା ମିଶ୍ର, ଅନସୂୟା ଚାନ୍ଦ, ଗାର୍ଗୀ ଏବଂ ଦିପ୍ତିରେଖା ସହଯୋଗ କରିଥିଲେ । ତାଲିମରେ ପ୍ରାୟ ୭୦ ଜଣ ଛାତ୍ରଛାତ୍ରୀ  ଉପସ୍ଥିତ ଥିଲେ ।