23-Nov-2023

ସୁବର୍ଣ୍ଣପୁର(ମନୋରଞ୍ଜନ ତ୍ରିପାଠୀ ): ଲୀଳାମୟ ଠାକୁର ହେଉଛନ୍ତି ପ୍ରଭୁ ଜଗନ୍ନାଥ । ତାଙ୍କର ଲୀଳା ବିଶ୍ୱ ବିଦିତ । କେବଳ ଚକା ଆଖି ଟିକିଏ ଦର୍ଶନ ପାଇଁ ଶହ ଶହ କିଲୋମିଟର ଦୂରରୁ  ଶ୍ରୀକ୍ଷେତ୍ରକୁ ଛୁଟି ଯାଉଛି ଭକ୍ତ । କାଳିଆର ସାନ୍ନିଧ୍ୟ ଲାଭ ପାଇଁ ଆତୁର ଭକ୍ତର ମନ । ତେଣୁ ଅତି ନିକଟରୁ ଶ୍ରୀଜିଉଙ୍କୁ ଦର୍ଶନ କଲା ଭଳି ହୃଦବୋଧ ହେବ

ବୋଲି ସୁବର୍ଣ୍ଣପୁରର କିଛି ଜଗନ୍ନାଥ ପ୍ରେମୀ ଗୋଟିଏ ରଥ ଚକ ସୋନପୁର ଆଣିଛନ୍ତି ଯାହାକି ଜିଲ୍ଲା ପାଇଁ ଏକ ସୌଭାଗ୍ୟ ର ବିଷୟ । ପାତାଳୀ ଶ୍ରୀକ୍ଷେତ୍ର ସୁବର୍ଣ୍ଣପୁରରୁ ତୁଳସୀ ରଥ ସହ ପୁରୀ ଯାଇଥିବା ଶ୍ରୀଜଗନ୍ନାଥ ସଂସ୍କୃତିର କର୍ମକର୍ତ୍ତା ମାନେ ମା ସୁଭଦ୍ରାଙ୍କ ରଥ ଦେବଦଳନର ଏକ ଚକ ଆଣି ସୋନପୁର ଆସିଛନ୍ତି । ଏହି ରଥ ଚକ ଶ୍ରୀଜିଉଙ୍କ ପବିତ୍ର ଲୀଳା କ୍ଷେତ୍ର ଭାବେ ଖ୍ୟାତ ପାତାଳୀ ଶ୍ରୀକ୍ଷେତ୍ରରେ ସ୍ଥାପନ କରାଯିବ । ତେବେ ଆଜି ମଧ୍ୟାହ୍ନରେ ସୋନପୁର ରଥ ଚକ ପହଞ୍ଚିଲା ପରେ ବିଭିନ୍ନ ସ୍ଥାନରେ ରଥଚକକୁ ବନ୍ଦାପନା ଓ ପୂଜାର୍ଚ୍ଚନା କରାଯାଇ ଥିଲା । କୁଞ୍ଜଛକଠାରେ ଜିଲ୍ଲାପାଳ ବିମଳେନ୍ଦୁ ରାୟ ଓ ଏଡିଏମ ସୂର୍ଯ୍ୟ ନାରାୟଣ ଦାଶ ଙ୍କ ସମେତ ଶହ ଶହ ଭକ୍ତ ଶ୍ରଦ୍ଧାଳୁ ଉପସ୍ଥିତ ରହି ଫୁଲ, ଧୂପ, ଚନ୍ଦନ ଦେଇ ସ୍ୱାଗତ କରିଥିଲେ । ପରେ ଏକ ବାଇକ ରାଲି ରେ ରଥ କୁ ସୋନପୁର ସହର ପରିକ୍ରମା କରଯାଇଥିଲା । ପଞ୍ଚରଥ ମନ୍ଦିର, ସତ୍ୟନାରାୟଣ ମନ୍ଦିର, ଗୁଣ୍ଡିଚା ମନ୍ଦିର, ଟିକ୍ରିପଡା, ଗଡଭିତର, ପାଲେସ ଲାଇନ, ଘୋଡାଘାଟପଡା ସୋମନାଥ ମନ୍ଦିର ଓ ବ୍ଲକ ଛକ ଠାରେ ଶହ ଶହ ମହିଳା ଭକ୍ତ ରଥ ଚକ କୁ ଦର୍ଶନ ଓ ପ୍ରଭୁକୃପା ଲାଭ କରି ଭାବବିହ୍ୱଳ ହୋଇ ପଡିଥିଲେ ଓ ତୁଳସୀ ଟିକିଏ ପାଇ ରଥ ଚକ କୁ ଛୁଇଁ ନିଜକୁ ଭାଗ୍ୟବାନ ମନେ କରିଥିଲେ । ହରିବୋଲ, ହୁଳହୁଳି ସହ ଜୟ ଜଗନ୍ନାଥ ଧ୍ୱନିରେ ସାରା ସହର ପ୍ରକମ୍ପିତ ହୋଇଥିଲା । ଚନ୍ଦ୍ରଶେଖର ଓତା,

ଶ୍ରୀବତ୍ସ ମଲ୍ଲିକ, ସୁରେଶ ମିଶ୍ର, ଗଦାଧର ବାରିକ, ବେଣୀମାଧବ ବେଦବାକ, ମନୋରଞ୍ଜନ ତ୍ରିପାଠୀ, ଧରଣୀଧର ମିଶ୍ର, ପ୍ରକାଶ ବେବର୍ତ୍ତା, ମନୋଜ ପଣ୍ଡା, ଲଡୁ କିଶୋର ମଲ୍ଲିକ, ନନ୍ଦୁ କମାଣି ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ । ପରେ ବିନିକା ଜଗନ୍ନାଥ ମନ୍ଦିର ଦେଇ ପାତାଳି ଶ୍ରୀକ୍ଷେତ୍ରକୁ ଏହି  ଆଧ୍ୟାତ୍ମିକ ଯାତ୍ରା ଅନୁଷ୍ଠିତ ହୋଇଥିଲା ।