26-Sep-2023

ବଲାଙ୍ଗିର (ପ୍ରେରଣା ଖବର ): ସଂସ୍କୃତି ଆମର ପରିଚୟ।ଭାରତର ସାଂସ୍କୃତିକ ବୈଚିତ୍ର ହିଁ ଆମର ବିଶେଷତ୍ବ। ଭାରତ ସରକାରଙ୍କ  ଉଦ୍ୟମ ରହିଛି ସାରା ଭାରତର ସାଂସ୍କୃତିକ ବିଶେଷତ୍ବକୁ ପ୍ରୋତ୍ସାହନ ଦେବା।ଲୋକକଳା ଉତ୍ସବ  ପରି ସର୍ବଭାରତୀୟ କାର୍ଯ୍ୟକ୍ରମ ବଲାଙ୍ଗୀରରେ ହେବା ଏହାର  ପରିଚୟ ବୋଲି କହିଛନ୍ତି ବଲାଙ୍ଗୀର ଲୋକସଭା ସାଂସଦ ଶ୍ରୀମତୀ ସଂଗୀତା କୁମାରୀ ସିଂଦେଓ । ବଲାଙ୍ଗୀର ଟାଉନହଲ ଠାରେ  ଅନୁଷ୍ଠିତ ଅଷ୍ଟମ ଲୋକକଳା ଉତ୍ସବ ର ଉଦଯାପନୀ ଉତ୍ସବରେ 

 ସେ ଏହି ମତ ଦେଇଛନ୍ତି।  ଦୁଲଦୁଲି କଳା ପରିଷଦ ଦ୍ବାରା ଆୟୋଜିତ ଏହି ସର୍ବଭାରତୀୟ ଲୋକନୃତ୍ଯ ଓ ସଂଗୀତ ସମାରୋହରେ ବରେଣ୍ଯ ଅତିଥି ଭାବରେ ଯୋଗ ଦେଇଥିଲେ ବଲାଙ୍ଗୀର ଲୋକସଭା ସାଂସଦ ଶ୍ରୀମତୀ ସଂଗୀତା କୁମାରୀ ସିଂଦେଓ, ସଂସ୍କୃତି ଗବେଷକ ରଂଜନ ସାହୁ, ସଂସ୍କୃତି  ଗବେଷକ ଅଧ୍ୟାପକ ଡକ୍ଟର ସଞ୍ଜୟ କୁମାର ମିଶ୍ର ଓ 
ସଭାପତିତ୍ବ କରିଥିଲେ ପ୍ରଭାସ କୁମାର ପାଣିଗ୍ରାହୀ ।ଦୁଲଦୁଲି କଳା ପରିଷଦ ର ଉପସଭାପତି ଦୀନେଶ ଶର୍ମା ମଂଚାସୀନ ହୋଇଥିଲେ ।
ସନ୍ଦୀପ କୁମାର କୁଅଁରଙ୍କ ମଂଚ ସଂଯୋଜନାରେ ଅନୁଷ୍ଠିତ ଏହି ସାଂସ୍କୃତିକ ସଭାରେ ଯୁବ ପ୍ରତିଭା ପ୍ରଶାନ୍ତ କୁମାର ବଡମାଳିଙ୍କୁ ମାନପତ୍ର, ଅଙ୍ଗବସ୍ତ୍ର ଓ ପୁଷ୍ପଗୁଚ୍ଛ ଦେଇ ଅତିଥିମାନେ ସମ୍ବର୍ଦ୍ଧିତ କରିଥିଲେ । ଦୁଲଦୁଲି କଳା ପରିଷଦର  ସଂପାଦକ ବାସୁଦେବ ସା ମଂଚାସୀନ ଅତିଥିମାନଙ୍କୁ ସମ୍ବର୍ଦ୍ଧିତ କରିଥିଲେ। ଏହି ଅବସରରେ ତିନିଦିନ ଧରି ସାଂସ୍କୃତିକ କାର୍ଯ୍ୟକ୍ରମକୁ ସଂଯୋଜନା କରିଥିବା ଅର୍ଜୁନ ସାହୁ ଓ ମାନସୀ ସାହୁଙ୍କୁ  ଉତ୍ସବ ସ୍ମାରକୀ ଦେଇ ସମ୍ମାନିତ କରାଯାଇଥିଲା।

ଶେଷରେ ସୁଦାମ ବିଶି ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।
ପରେ ପରେ ସଢେ଼ଇକଳା ଛଉ ର ବର୍ଷା ଝମଝମ, ଆସାମର ବୋଦୋ, ନାଟୁଆ ଝାରଖଣ୍ଡ, ରାଜସ୍ଥାନର କାଲବେଲିଆ, ପଡିହାଡି, ପଶ୍ଚିମବଙ୍ଗର ଝୁମର ,ଗଞ୍ଜାମର ଯୋଡିଶଂଖ, ପ୍ରତିଭା-ଭବାନୀପାଟଣାର  ସିଂହାରୀ, ଜୁଲୁ ସାହୁଙ୍କ ଏକକ ନୃତ୍ଯ  ଡାଲଖାଇ ଉପସ୍ଥିତ ଦର୍ଶକମାନଙ୍କୁ ମନ୍ତ୍ରମୁଗ୍ଧ କରିଥିଲା।
ସଭା ପୂର୍ବରୁ ଗୀତିକାର ବ୍ରହ୍ମାନନ୍ଦ ବନଛୋର , କଣ୍ଠଶିଳ୍ପୀ ନବୀନ କିଶୋର କୁଅଁରଙ୍କ  ପରିଚାଳନାରେ ଲୋକଗୀତ ପରିବେଷଣ କରିଥିଲେ ରାଜ୍ୟର ବହୁ ପ୍ରତିଷ୍ଠିତ କଣ୍ଠଶିଳ୍ପୀ ମାନେ।