11-Sep-2023

ସିନ୍ଧେକେଲା (ଅନୀଲ କୁମାର ତ୍ରିପାଠୀ ): ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ବ୍ଲକ ର ସିନ୍ଧେକେଲା ମୁଖ୍ୟ ସଡ଼କରେ ଭାରିଯାନ ଅହରହ ଚଳାଚଳ ଯୋଗୁଁ ଟ୍ରାଫିକ ସମସ୍ୟା ଦୈନନ୍ଦିନ ଲାଗିରହିଛି । ବିଶେଷ କରି ପଶ୍ଚିମ ଓଡିଶାର କୃଷିଭିତ୍ତିକ ଗଣପର୍ବ ନୂଆଖାଇ କିଛିଦିନ ପୂର୍ବରୁ ଏହି ସମସ୍ୟା ଆହୁରି ଜଟିଳ ହୋଇଥାଏ । ବଲାଙ୍ଗୀର, ନୁଆପଡା ଓ କଳାହାଣ୍ଡି ଜିଲ୍ଲାର ସୀମାନ୍ତରେ ଥିବା ଯୋଗୁଁ ସୀମାନ୍ତ ଅଞ୍ଚଳର ଆଖପାଖ ଲୋକେ କିଣାବିକା ପାଇଁ ହଜାର ହଜାର ସଂଖ୍ୟାରେ ଆସିଥାନ୍ତି। ସିନ୍ଧେକେଲା ଏକ ଛୋଟିଆ ବ୍ୟବସାୟିକ ପେଣ୍ଠସ୍ଥଲୀ ଥିବାରୁ ଲୋକେ ଏଠାକୁ କିଣାବିକା ପାଇଁ ଆସିଥାନ୍ତି। କିନ୍ତୁ ସ୍ଥିତି ଏପରି ହୋଇଯାଏ ଯେ ମୁଖ୍ୟ ରାସ୍ତା ପାର କରି ଯିବାକୁ ହେଲେ ରାସ୍ତା ଜାମ ଯୋଗୁଁ ଘଣ୍ଟା ଘଣ୍ଟା ସମୟ ଲାଗିଥାଏ । ଏଭଳି ସ୍ଥିତିରେ ସ୍କୁଲ ଛାତ୍ରଛାତ୍ରୀ, ସରକାରୀ ବେସରକାରୀ କାମ, ଡାକ୍ତରଖାନା କୁ ଆସୁଥିବା ରୋଗୀମାନଙ୍କ ସହ ରାସ୍ତାରେ ଜରୁରୀ କାମରେ ଯାତାୟାତ କରୁଥିବା ଲୋକେ ବହୁତ ହଇରାଣ ରେ ପଡ଼ିଥାନ୍ତି । ଏହାକୁ ନଜରରେ ରଖି ଟ୍ରାଫିକ ନିୟନ୍ତ୍ରଣ ପାଇଁ ବଣିକ ସଙ୍ଘ ପକ୍ଷରୁ କିଛିଦିନ ତଳେ ଟିଟିଲାଗଡ଼ ଉପ ଜିଲ୍ଲାପାଳ ଦୟାମୟ ପାଢୀଙ୍କ ନିକଟରେ ଭାରିଯାନ କୁ ନୂଆଖାଇ ପୂର୍ବରୁ ବନ୍ଦ କରିବା ପାଇଁ ଲିଖିତ ଆବେଦନ କରାଯାଇଥିଲା । ଏହା କୁ ଭିତ୍ତିକରି ଉପ ଜିଲ୍ଲାପାଳ ଆଜି ସେପ୍ଟେମ୍ବର ୧୦ ତାରିଖ ରୁ ୨୦ ତାରିଖ ନୂଆଖାଇ ପର୍ବ ସରିବା ପର୍ଯ୍ୟନ୍ତ ୧୦ ଦିନ ପାଇଁ ସକାଳ ୯ ଘଣ୍ଟା ସମୟରୁ ଅପରାହ୍ନ ୨ଟା ଓ ଅପରାହ୍ନ ୪ଟା ରୁ ରାତି ୮ଟା ପର୍ଯ୍ୟନ୍ତ ଭାରିଯାନ ଚଳାଚଳ କୁ ବନ୍ଦ ରଖିବା ତଥା ସକାଳ ୯ ଟା ରୁ ରାତ୍ରି ୮ଟା ପର୍ଯ୍ୟନ୍ତ ଦୋକାନ ସମ୍ମୁଖରେ ଭାରିଯାନ ଲୋଡିଂ ଅନ ଲୋଡିଂ ବନ୍ଦ ରଖିବା ପାଇଁ ସିନ୍ଧେକେଲା ପୋଲିସ କୁ ନିର୍ଦ୍ଦେଶ ଦେଇଥିଲେ । ଏଣୁ ନୂଆଖାଇ ପର୍ଯ୍ୟନ୍ତ ବସ ଓ ଆମ୍ବୁଲାନ୍ସ କୁ ଛାଡି ସିନ୍ଧେକେଲାରେ ଭାରିଯାନ ଚଳାଚଳ ବନ୍ଦ ରହିବା ପାଇଁ ପୋଲିସ ପକ୍ଷରୁ ସୂଚନା ମିଳିଛି । ଉକ୍ତ ପଦକ୍ଷେପ କୁ ତୁରନ୍ତ ଗ୍ରହଣ କରିଥିବାରୁ ଉପ ଜିଲ୍ଲାପାଳ ଦୟାମୟ ପାଢ଼ୀ ଓ ସିନ୍ଧେକେଲା ଥାନା ଅଧିକାରୀ ଙ୍କୁ ଗ୍ରାମବାସୀ ଓ ବଣିକ ସଙ୍ଘ ପକ୍ଷରୁ କୃତଜ୍ଞତା ଜ୍ଞାପନ କରାଯାଇଛି ।