15-Aug-2023

ବଲାଙ୍ଗିର (ପ୍ରେରଣା ଖବର ): ଇଲେକ୍ଟ୍ରି ଖୁମ୍ବରେ ଲାଗିଥିବା ଆଲୁମନିୟମ ତାର ଓ ଟ୍ରାନ୍ସଫର୍ମର ଭାଙ୍ଗି ସେଥିରେ ଥିବା ଏଙ୍ଗଲ ଓ ଜେଇ ତାରକୁ ଚୋରି କରିଥିବା ଅଭିଯୋଗରେ ୬ଜଣ ଯୁବକଙ୍କୁ ଗିରଫ କରିଛି ବଲାଙ୍ଗୀର ସଦର ପୋଲିସ । ଏଥିସହ ଏହି ଯୁବକଙ୍କ ଦ୍ୱାରା ବ୍ୟବହୃତ ୬ଟି ବାଇକ୍ କୁ ଜବତ୍ କରିଛି ପୋଲିସ । ଏପରି କିଛି ଘଟଣା ଘଟିଛି ବଲାଙ୍ଗୀର ସଦର ବ୍ଲକ କନା ଘାଟ ଠାରୁ ପୋଢ଼ମୁଣ୍ଡକୁ ଯାଇଥିବା ରାସ୍ତା ମଧ୍ୟରେ । ସୂଚନାରୁ ପ୍ରକାଶ ଯେ , ଆଜି ଭୋର ୪ଟା ସମୟରେ କନା ଘାଟ ଠାରୁ ପୋଢ଼ମୁଣ୍ଡ ରାସ୍ତାରେ ସଂଯୋଗ ହୋଇଥିବା ୬ଟି ବିଦ୍ୟୁତ ଖୁଣ୍ଟକୁ ଭାଙ୍ଗି ଏହି ଦୃର୍ବୃତ୍ତ ମାନେ ଖୁମ୍ବର ମୂଲ୍ୟବାନ ବିଦ୍ୟୁତ ତାର ଓ  ଟ୍ରାନ୍ସଫର୍ମରରେ ବ୍ୟବହୃତ ଲୁହା ଏଙ୍ଗଲ, ଜେଇ ତାର ଇତ୍ୟାଦିକୁ ଚୋରି କରି ନେଇଥିଲେ । ତେବେ କିଛି ଗ୍ରାମବାସୀ ଏହା ଦେଖିବା ପରେ ଚୋର ମାନଙ୍କ କାବୁ କରି ପୋଲିସକୁ ଖବର ଦେଇଥିଲେ । ସଦର ବ୍ଲକ ଅନ୍ତର୍ଗତ ଅନନ୍ତପାଲି ଗାଁ ର ଚେତୁରାମ ରାଜପୁତ ଙ୍କ ଅଭିଯୋଗକୁ ଭିତ୍ତି କରି  ବଲାଙ୍ଗୀର ସଦର ପୋଲିସ ଘଟଣାସ୍ଥଳରେ ପହଂଚି  ଏହି ୬ଜଣିଆ ଚୋର ଗେଙ୍ଗ୍ କୁ ଗିରଫ କରିବା ସହ ସେମାନଙ୍କ ୬ଟି ବାଇକ୍ କୁ ଜବତ କରିଛି । ଏମାନଙ୍କ ଠାରୁ ଲକ୍ଷାଧିକ ଟଙ୍କାର ଚୋରୀ ସାମଗ୍ରୀ ଉଦ୍ଧାର ହୋଇଛି ।  ଗିରଫ ଅଭିଯୁକ୍ତ ମାନଙ୍କ ମଧ୍ୟରେ ୫ଜଣ  ହେଲେ ଲାଲୁ ସାହୁ, ବୀରବଲ ସାହୁ, ସରୋଜ ସାହୁ, ଗୋକୁଳ ସାହୁ ଓ ମହିନ ସାହୁ ବରଗଡ଼ ଜିଲ୍ଲା ମେଲଛାମୁଣ୍ଡା ଥାନା ଟୁର୍ଚ୍ଚା ଗାଁ ର ହୋଇଥିବା ବେଳେ ଜଣେ କାମଦେବ ସାହୁ ବଲାଙ୍ଗୀର ସଦର ଥାନା ଅନ୍ତର୍ଗତ ତାଲଜୁରୀ ଗାଁ ର ବୋଲି ଜଣାପଡିଛି । ଏହି ଅଭିଯୁକ୍ତ ମାନଙ୍କ ବର୍ତ୍ତମାନ ସଦର ପୋଲିସ ଅଟକ ରଖି ଅଧିକ ପଚରାଉଚୁରା କରୁଛି ।