14-Aug-2023

ବଲାଙ୍ଗୀର, ଗତ ୨ଠ୧୭ ମସିହାରେ ବଲାଙ୍ଗୀର ଜିଲ୍ଲା ତୁଷୁରା ଥାନା ଅନ୍ତର୍ଗତ ପୁରୁନାପାନି ଗାଁ ର ଶୁଲିଆ ମଠରେ ରହୁଥିବା ପୂଜକ ବସନ୍ତ ଭୋଇ ଙ୍କୁ କେହି ଜଣେ ବିଭତ୍ସ ଭାବରେ ହତ୍ୟା କରିଥିଲେ । ହତ୍ୟା ଘଟଣାର ୨୨ ଦିନ ପରେ ମଠରେ ରହୁଥିବା ରାଜୀବ ଭୋଇ ନାମକ ଜଣେ ବ୍ୟକ୍ତିଙ୍କୁ ତରଭା ନିକଟରୁ ତୁଷୁରା ପୋଲିସ ଗିରଫ କରିଥିଲା ।  ମଠରେ ଥିବା ରାଜୀବଙ୍କ ଲୁଗାପଟା  ଓ ଆଧାର  କାର୍ଡ କୁ ଜବତ କରିବା ସହ ହତ୍ୟା ଘଟଣା ପରେ ରାଜୀବ ଫେରାର୍ ଥିବା ଯୋଗୁଁ ପୋଲିସ ସନ୍ଦେହରେ ରାଜୀବକୁ ଗିରଫ କରିଥିଲା । ଦଫା ୩ଠ୨ରେ ମୁଦାଲା ରାଜୀବ ଭୋଇ ୨ଠ୧୭  ମସିହାରୁ ଜେଲଦଣ୍ଡ ଭୋଗୁଥିବା ବେଳେ  ବଲାଙ୍ଗୀର ଏଡିଜେ(ଫାଷ୍ଟ)ଙ୍କ କୋର୍ଟରେ ଏହି ମାମଲାର ଶୁଣାଣି ଚାଲିଥିଲା । ସେସନ୍ସ କେଶ ନମ୍ବର ୮୭/୦୪/୧୮/ ୨ଠ୧୭ ଆଧାରରେ  ଏହି ମାମଲାରେ ପ୍ରାୟ ୧୫ ଜଣ ସାକ୍ଷୀଙ୍କ ଶୁଣାଣି ହୋଇଥିଲା । ତେବେ ହତ୍ୟାକାଣ୍ଡର ବିଭିନ୍ନ   ପାରିପାର୍ଶ୍ବିକ ସ୍ଥିତି, ସାକ୍ଷୀଙ୍କ ବୟାନକୁ ଭିତ୍ତି କରି ଆଜି ମାନ୍ୟବର ଏଡିଜେ (ଫାଷ୍ଟ) ମୁଦାଲା ରାଜୀବ ଭୋଇଙ୍କୁ ପ୍ରମାଣ ଅଭାବରୁ ନିର୍ଦ୍ଦୋଷରେ ଖଲାସ କରିଛନ୍ତି । ମୁଦାଲାଙ୍କ ତରଫରୁ ଆଇନଜୀବୀ ଏସ୍ ଲତାଶ୍ରୀ କେଶ ପରିଚାଳନା କରୁଥିବା ବେଳେ  ସରକାରଙ୍କ ତରଫରୁ ସରକାରୀ ଓକିଲ ପ୍ରଦୀପ ପାଢ଼ୀ ମୁକଦ୍ଦମା ଲଢ଼ୁଥିଲେ ।