12-Aug-2023

ବଲାଙ୍ଗୀର/ଲୋଇସିଂହା(ପ୍ରେରଣା ଖବର), ଅର୍ଥ ଲାଳଶାରେ ବିଭିନ୍ନ ମାଇକ୍ରୋ ଫାଇନାନ୍ସରୁ ଟଙ୍କା ଉଠାଇ ଶେଷରେ ଠକାମୀର ଶିକାର ହୋଇଛନ୍ତି ଗାଁ ର ଏସ୍‌ଏସ୍‌ଜି ମହିଳା ମାନେ । ଲୋଇସିଂହା ବ୍ଲକ ରତାଖଣ୍ଡି ଗାଁ ର ୱାର୍ଡ ମେମ୍ବର ଓ ପଂଚାୟତର ପିଅନ ଏହି ମହିଳା ମାନଙ୍କ ଠାରୁୁ ଆଧାର କାର୍ଡ ନେଇ ଏମାନଙ୍କ ନାଁ ରେ ବିଭିନ୍ନ ମାଇକ୍ରୋ ଫାଇନାନ୍ସରୁ ଲକ୍ଷାଧିକ ଟଙ୍କ ଉଠାଇ ଫେରାର ମାରିବା ଘଟଣା ଏଠାରେ ମୁଖ୍ୟ ଚର୍ଚ୍ଚାର ବିଷୟ ହୋଇଛି । ଏବେ ମାଇକ୍ରୋ ଫାଇନାନ୍ସର ଏଜେଣ୍ଟ ମାନେ ଏହି ମହିଳା ମାନଙ୍କ ଠାରୁ ରୁଣ ଟଙ୍କା ଅସୁଲି କରିବା ପାଇଁ ତାଙ୍କ ଉପରେ ଜବରଦସ୍ତ ଜୁଲୁମ୍ କରୁଥିବା ଜୋଗୁଁ ମହିଳା ମାନେ ବର୍ତ୍ତମାନ ମାନସିକ ଦୁଠଶ୍ଚିନ୍ତା ମଧ୍ୟରେ ରହିଛନ୍ତି । 

   ସୂଚନାରୁ ପ୍ରକାଶ ଯେ ଲୋଇସିଂହା ବ୍ଲକ ରତାଖଣ୍ଡି ପଂଚାୟତର ୱାର୍ଡ ମେମ୍ବର ଡୋଳାମଣି ମେହେର ଓ ପିଅନ ଡୁଗୁରୁ ଉଦୁରକୁଲିଆ ଗାଁ ର ମହିଳା ମାନଙ୍କୁ ଟଙ୍କାର ପ୍ରଲୋଭନ ଦେଖାଇ ଏମାନଙ୍କୁ  ଋଣ କରାଇ ଦେବା ପାଇଁ କହି ଏମାନଙ୍କ ଠାରୁ ଆଧାରକାର୍ଡ ଓ ଅନ୍ୟାନ୍ୟ କାଗଜପତ୍ର ନେଇ ଏହି ମହିଳା ମାନଙ୍କ ଅଜାଣତରେ  ବିଭିନ୍ନ ମାଇକ୍ରୋ ଫାଇନାନ୍ସ କଂପାନୀରୁ ଲକ୍ଷାଧିକ ଟଙ୍କାର ଋଣ ଉଠାଇ ଥିଲେ ।  ରତାଖଣ୍ଡି ଗାଁ ର ୱାର୍ଡ ମେମ୍ବର ଡୋଳାମଣି ଓ ପିଅନ ଡୁଗୁରୁ ଗାଁ ର ପ୍ରାୟ ୩ଠ ଜଣ ମହିଳାଙ୍କ ନାଁ ରେ ଜଣ ପିଛା ୫ଠ ହଜାରରୁ ଲକ୍ଷେ ଟଙ୍କା ଋଣ ମୋଟ୍ ୩ଠ ଲକ୍ଷ ଟଙ୍କା ଧରି ଦୀର୍ଘ ୮ ଦିନ ହେଲା କେଉଁଆଡେ ଫେରାର୍ ମାରିଛନ୍ତି ।

ଏ ନେଇ ଗାଁ ର ମିହିଳା ମାନେ ବର୍ତ୍ତମାନ ଘୋର ମାନସିକ ଦୁଃଶ୍ଚିନ୍ତା ମଧ୍ୟରେ ରହିଛନ୍ତି ।  ଅନ୍ୟ ପକ୍ଷରେ ମାଇକ୍ରୋ ଫାଇନାନ୍ସର କର୍ମଚାରୀ ମାନେ ଏହି ମହିଳା ମାନଙ୍କୁ ଟଙ୍କା ଫେରାଇବା ପାଇଁ ଅଡି ବସିବା ସହ ସହ ମହିଳା ମାନଙ୍କୁ ନାନା ପ୍ରକାର ଗାଳିଗୁଳଜ କରୁଥିବା ମହିଳା ମାନେ ଅଭିଯୋଗ କରିଛନ୍ତି । ମାଇକ୍ରୋ ଫାଇନାନ୍ସର ଏହି ଏଜେଣ୍ଟ ମାନଙ୍କ ଭୟରେ ମହିଳା ମାନେ ଘର ଭିତରେ ଲୁଚି ରହୁଛନ୍ତି । ତେବେ ଟଙ୍କା ନେବ କିଏ ଓ ମାନସିକ ନିର୍ଯ୍ୟାତନା ସହିବ କିଏ ?  ମାଇକ୍ରୋ ଫାଇନାନ୍ସର ଏହି କର୍ମଚାରୀ ମାନେ ପ୍ରକୃତ ଚୋର କୁ ଧରିବା ପରିବର୍ତ୍ତେ ବର୍ତ୍ତମାନ ଏହି ଗରିବ ନିରୀହ ମହିଳା ମାନଙ୍କୁ ଟଙ୍କ ନ ଦେଲେ ଛାଡିବୁ ନାହିଁ ବୋଲି ଧମକ ଦେଉଛନ୍ତି । ଆସନ୍ତୋଷ ଗ୍ରାମବାସୀ ଓ କ୍ଷତି ସହିଥିବା ମହିଳା ମାନେ ବଲାଙ୍ଗୀର ଏସ୍‌ପିଙ୍କ ସାକ୍ଷାତ କରିବା ପାଇଁ  ସଜବାଜ ହେଉଛନ୍ତି । ଫେରାର  ୱାର୍ଡ ମେମ୍ବର ଓ ପଂଚାୟତ ପିଅନକୁ ଗିରଫ କରିବା ଦିଗରେ ପୋଲିସର ବିଫଳତାକୁ ନେଇ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଏଠାରେ ସୂଚନାଯୋଗ୍ୟ ଯେ, ଫେରାର୍ ଥିବା ୱାର୍ଡ ମେମ୍ବର ଙ୍କ ନାମରେ ପୂର୍ବରୁ ମଧ୍ୟ ଅନେକ ଅପରାଧିକ ଘଟଣାରେ ସଂପୃକ୍ତ ଥିବା ନେଇ ସଦର ଥାନା ରେ ଅଭିଯୋଗ ହୋଇ ସାରିଛି ।