13-Jun-2023

ସମ୍ବଲପୁର (ସଂଜୀବ ପାଣିଗ୍ରାହୀ )
 ଲରମ୍ଭା ନାରୀ ଶିକ୍ଷା ଟ୍ରଷ୍ଟ ପକ୍ଷରୁ ଆଜି ସ୍ଥାନୀୟ ଓଡିଶା ସାଂସ୍କୃତିକ ସମାଜର ସ୍ୱାଧୀନତା ସଂଗ୍ରାମୀ ସ୍ମୃତି ଭବନଠାରେ ବରିଷ୍ଠ ସାମ୍ବାଦିକ ଅର୍ଜୁନ ରଞ୍ଜନ ପଣ୍ଡାଙ୍କ ଅଧ୍ଯକ୍ଷତାରେ ଆୟୋଜିତ ସଭାରେ  ଜନସେବୀ କବି ବ୍ରଜମୋହନ ପଣ୍ଡାଙ୍କ ଜନ୍ମୋତ୍ସବ ଓ ତାଙ୍କ ଜୀବନ ଚରିତ “ହୀରାଖଣ୍ଡ ମୋହନ ଆଶା-କିଶୋର ପାଦପ କବି ବ୍ରଜମୋହନ” ପୁସ୍ତକ ଉନ୍ମୋଚିତ ହୋଇଯାଇଅଛି।ଏହି ସଭାରେ ମୁଖ୍ୟଅତିଥି ଭାବରେ ଯୋଗଦେଇ ଡା. ରାସେଶ୍ୱରୀ ପାଣିଗ୍ରାହୀ କହିଥିଲେ ଯେ, ବ୍ରଜମୋହନ  ଜଣେ ଜାତୀୟବାଦୀ କବି ଥିଲେ ବ୍ରଜମୋହନ ପଣ୍ଡା ନଥିଲେ ଗଙ୍ଗାଧର ମେହେର ବଣର ମଲ୍ଲୀ ପରି ଲୋକଲୋଚନକୁ ଆସି ପାରିନଥାନ୍ତେ,ସେ ଥିଲେ ଜଣେ ବହୁମୁଖୀ ପ୍ରତିଭାର ବ୍ୟକ୍ତି ବୋଲି ଅବିହିତ କରି ସେ କହିଥିଲେ ଯେ ସାହିତ୍ୟ ଓ ଜନସେବା ଉଭୟକୁ ସେ ତାଙ୍କ ଜୀବନରେ ଗୁରୁତ୍ୱ ଦେଇଥିଲେ। ପୁସ୍ତକର ସମୀକ୍ଷକ ପ୍ରଫେସର ଡ. କାମଦେବ ସାହୁ କହିଥିଲେ ଯେ କବି ବ୍ରଜମୋହନ ପଣ୍ଡାଙ୍କ ନିଶା ଥିଲା ଶିକ୍ଷାର ପ୍ରସାର। ତେଣୁ ସେ ବାଲ୍ୟ କଳରୁ ସେଥିପାଇଁ ପ୍ରୟାସିତ ରହିଥିଲେ। ଜନସେବା କରିବୀ ନିମନ୍ତେ ହିଁ ସେ କୃଷି ପ୍ରତି ଆକର୍ଷିତ ହୋଇଥିଲେ ଓ ପଶ୍ଚିମ ଓଡିଶାରେ ଶିକ୍ଷାର ପ୍ରସାର ପାଇଁ ସେ ତାଙ୍କ ସମୟ ଜ୍ଞାନ ଓ ଶ୍ରମ ଦେଇ ଏକ ବିରଳ ଦୃଷ୍ଟାନ୍ତ ସୃଷ୍ଟି କରିଯାଇଛନ୍ତି। ସ୍ୱଭାବ କବି ଗଙ୍ଗାଧରଙ୍କୁ ମଧ୍ୟ ସେ ଦେବଦୂତ ସମ ସହଯୋଗ କରିଛନ୍ତି ଗଙ୍ଗାଧର ଓ ବ୍ରଜମୋହନଙ୍କ ଭଳି ଯୁଗଲବନ୍ଦି ସମଗ୍ର ଓଡିଶାରେ ନାହିଁ ବୋଲି ସେ ମତ ଦେଇଥିଲେ। ସଭା ପୂର୍ବରୁ ବିଶିଷ୍ଟ ସଙ୍ଗୀତ ନିର୍ଦେଶକ ବ୍ରଜେନ୍ଦ୍ର ନାୟକଙ୍କ ନିର୍ଦ୍ଦେଶନାରେ ବ୍ରଜମୋହନଙ୍କ ରଚିତ 'ଆମେ ସମ୍ବଳବାସୀ’ ଗୀତର ସିଡି ଶୁଣାଯାଇ ପରିବେଷିତ ହୋଇଥିଲା। ପୁସ୍ତକର ଲେଖକ ଦୀପ୍ତି ରଞ୍ଜନ ସେଠ ପୁସ୍ତକର କେତେକ ମୁଖ୍ୟ ପ୍ରସଙ୍ଗକୁ ଉପସ୍ଥାପନ କରିଥିଲେ। ପ୍ରକାଶକ ତଥା କବି ବ୍ରଜମୋହନଙ୍କ ପୁତ୍ର ପଦ୍ମଲୋଚନ ପଣ୍ଡା ତାଙ୍କ ବକ୍ତବ୍ୟ ରଖି କହିଥିଲେ ଯେ,କବି ବ୍ରଜମୋହନଙ୍କ ବିଷୟରେ ଲୋକେ ଯେପରି ଆହୁରି ଜାଣିପାରିବେ ଏହି ପୁସ୍ତକ ପ୍ରକାଶନ ତାହାର ଏକ ପ୍ରୟାସ ମାତ୍ର।ଲରମ୍ଭା ନାରୀ ଶିକ୍ଷା ଟ୍ରଷ୍ଟର ସଭାପତି ସୁଧୀର କୁମାର ପଣ୍ଡା ବ୍ରଜମୋହନଙ୍କ  ଶିକ୍ଷାର ପ୍ରସାରର ମାନସିକତାକୁ ପାଥେୟ କରି ତାଙ୍କ ଟ୍ରଷ୍ଟ ଗଠିତ ବୋଲି କହିଥିଲେ। ଡ. ସିଦ୍ଧାର୍ଥ ପଣ୍ଡା ପ୍ରାରମ୍ଭିକ ସୂଚନା ସହ ଅତିଥି ପରିଚୟ ପ୍ରଦାନ କରିଥିବା ବେଳେ ଟ୍ରଷ୍ଟର ବରିଷ୍ଠ ସଦସ୍ୟ ଅଭେଦାନନ୍ଦ ପାଣିଗ୍ରାହୀ ଧନ୍ୟବାଦ ଅର୍ପଣ କରିଥିଲେ। ସଭାରେ ସମ୍ବଲପୁରର ବହୁ ମାନ୍ୟଗଣ୍ୟ ବକ୍ତି ଉପସ୍ଥିତ ଥିଲେ।