19-Jan-2023

ବଲାଙ୍ଗୀର,-ପ୍ରଧାନମନ୍ତ୍ରୀ ଆବାସଗୃହ ଆବଣ୍ଟନକୁ ନେଇ କେନ୍ଦ୍ର ଓ ରାଜ୍ୟସରକାରଙ୍କ ମଧ୍ୟରେ ଟଣାଓଟରା ଚାଲିଥିବା ବେଳେ ଏପଟେ ହିତାଧିକାରୀ ତାଲିକାକୁ ନେଇ ଲୋକପ୍ରତିନିଧି ଅସନ୍ତୋଷ ବ୍ୟକ୍ତ କରୁଛନ୍ତି । ଆଜି ବଲାଙ୍ଗୀର ସଦରବ୍ଲକ ଅଞ୍ଚଳର ୨୫ଟି ପଞ୍ଚାୟତରେ ହିତାଧିକାରୀ ତାଲିକାକୁ ନେଇ ସରପଞ୍ଚ,ସମିତିସଭ୍ୟ ଓ ଜିଲ୍ଲାପରିଷଦ ସଦସ୍ୟାମାନେ ଅସନ୍ତୋଷ ବ୍ୟକ୍ତ କରି ଧାରଣା ଦେଇଛନ୍ତି । ଏପରିକି ବ୍ଲକର ଅଧ୍ୟକ୍ଷା ତଥା ଅନ୍ୟାନ୍ୟ ନିର୍ବାଚିତ ପ୍ରତିନିଧିଙ୍କ ଅଗୋଚରରେ ହିତାଧିକାରୀ ତାଲିକା ପ୍ରକାଶ କରାଯାଇଥିବା ଅଭିଯୋଗ ଉଠିଛି । ବିଡିଓ କାହାକୁ ନପଚାରି ତାଙ୍କ ମନମୁଖି ଭାବରେ ପୂର୍ବତାଲିକାରୁ ହିତାଧିକାରୀଙ୍କୁ ବାଦ ଦେଇ ନୂତନ ତାଲିକା ପ୍ରକାଶ କରିଥିବା ଅଭିଯୋଗ ହୋଇଛି । ସେଥିପାଇଁ ବ୍ଲକର ଅଧ୍ୟକ୍ଷା ସରିତା ବାଗ,ଉପାଧ୍ୟକ୍ଷା ସଦାଇପାଲି ସମିତିସଭ୍ୟ ଗୁଲାପ ବାଗ,ଜିଲ୍ଲାପରିଷଦ ସଭ୍ୟା ସଂଗୀତା ସୁନା,ଅନାମିକା ହୋତା,ରାଜ୍ୟସଭା ସାଂସଦ ପ୍ରତିନିଧି ପାଲେଶ୍ୱର ଭୋଇଙ୍କ ନେତୃତ୍ୱରେ ସମସ୍ତ ଲୋକପ୍ରତିନିଧି ଧାରଣାରେ ବସିଥିଲେ । ଏହି ଅବସରରେ ତାଲିକାରୁ ବାଦ ପଡିଥିବା ଯୋଗ୍ୟହିତାଧିକାରୀଙ୍କୁ ତୁରନ୍ତ ସାମିଲ କରାଯିନବାକୁ ଦାବି କରି ବିଡିଓ ପ୍ରୀତମକୁମାର ତନ୍ତୀଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା । ଏନେଇ ବିଡିଓ ଶ୍ରୀ ତନ୍ତୀଙ୍କୁ ପଚାରିବାରୁ ସେ ଆସିବା ପୂର୍ବରୁ ଏହି ତାଲିକା ପ୍ରସ୍ତୁତ କରାଯାଇଛି । ଏବେ ଯଦି ନୂଆ ନୀୟମ ଆସେ ତାହେଲେ ଯୋଗ୍ୟ ହିତାଧିକାରୀ ଥିଲେ ତାଙ୍କୁ ସାମିଲ କରାଯାଇପାରିବ ବୋଲି କହିଥିଲେ । ତେବେ ଖବର ନେବାରୁ ଜଣାଯାଇଛି ଯେ,ବଲାଙ୍ଗୀର ଜିଲ୍ଲାରେ ପୂର୍ବରୁ ୩୮୦୦୦ ହିତାଧିକାରୀଙ୍କ ତାଲିକା ରହିଥିଲା । ସେଥିରୁ ଏବେ ୩୦୦୦୦ ଲୋକଙ୍କ ନାମ ପ୍ରକାଶ ପାଇଛି । ଅନ୍ୟମାନଙ୍କୁ ବାଦ ଦିଆଯାଇଛି । ବଲାଙ୍ଗୀର ସଦର ବ୍ଲକରେ ମାତ୍ର ୭୬୬ଜଣଙ୍କ ନାମ ତାଲିକାରେ ପ୍ରକାଶ ପାଇଛି ।