16-Jan-2023

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ଜିଲ୍ଲାପାଳ ଚଞ୍ଚଳ ରାଣାଙ୍କ ମନମୁଖୀ କାର୍ଯ୍ୟକଳାପ ବିରୁଦ୍ଧରେ କଣ୍ଟାବାଞ୍ଜି ବିଧାୟକ ଖୁଲ୍ଲମଖୁଲ୍ଲା ଯୁଦ୍ଧଂଦେହୀ ଡାକରା ଦେଇଛନ୍ତି । ଗତ ୧୨ ତାରିଖର ଜିଲ୍ଲାପରିଷଦ ବୈଠକରେ କଣ୍ଟାବାଞ୍ଜି ନିର୍ବାଚନମଣ୍ଡଳି ଅଧିନସ୍ଥ ବ୍ଲକମାନଙ୍କର ବିଜୁକେବିକେ ଅନୁଦାନ କାଟିଦିଆଯାଇଥିବା ଅଭିଯୋଗ କରି କଣ୍ଟାବାଞ୍ଜି ବିଧାୟକ ସନ୍ତୋଷସିଂ ସାଲୁଜା(କୁକୁସିଂ) ତୁମ୍ବିତୁଫାନ କରିଥିଲେ । ସେହି ଦିନର ବୈଠକରେ ବିଧାୟକ ଜିଲ୍ଲାପାଳ ରାଣା ସରକାରୀ ନୀୟମର ଉଲଂଘନ କରିଥିବା ଅଭିଯୋଗ ଉଠାଇଥିଲେ ଓ ଅନୁଦାନ ତମର ବାପାର କି ବୋଲି ପ୍ରଶ୍ନକରି ଥିଲେ । ଏପରିକି ଜିଲ୍ଲାରୁ ଅନେକ ଜିଲ୍ଲାପାଳ ମାଡଖାଇ ଯାଇଛନ୍ତି ବୋଲି ଚେତାବନୀ ଦେଇଥିଲେ । ଏହି ଘଟଣାକୁ ଜିଲ୍ଲାପାଳ ସେହିଦିନ ହାଲୁକା ଭାବରେ ନେଇଥିଲେ ଓ ଏହା ବୈଠକର ଆଲୋଚନାର ଅଂଶବିଶେଷ ବୋଲି ଗଣମାଧ୍ୟମ ଆଗରେ କହିଥିଲେ । କିନ୍ତୁ ପରଦିନ ଜିଲ୍ଲା ଓଏଏସ ଅଫିସରସଂଘ ଓ କିଛି କର୍ମଚାରୀସଂଘ ଏହି ଘଟଣାକୁ ନିନ୍ଦାକରି ବିଧାୟକଙ୍କ ଅଭଦ୍ରୋଚିତ ବ୍ୟବହାର କରିଥିବା ଅଭିଯୋଗ କରି ୧୬ରୁ ୧୮ ତାରିଖ ପର୍ଯ୍ୟନ୍ତ କଳାବ୍ୟାଚ ପିନ୍ଧିବାକୁ ନିସ୍ପତ୍ତି ନେଇଥିଲେ । ଫଳରେ ଘଟଣାଟି ଗଣ୍ଡଗୋଳିଆ ହୋଇଥିଲା । ସେପଟେ ବିଧାୟକ କୁକୁ ସିଂ ମଧ୍ୟ ଜିଲ୍ଲାପାଳଙ୍କ ମନମୁଖି କାର୍ଯ୍ୟଧାରା ବିରୁଦ୍ଧରେ ଜନତାଙ୍କୁ ନେଇ ବ୍ଲକ ଘେରାଉ ସହିତ ୧୮ ତାରିଖରେ ଜିଲ୍ଲାପାଳ କାର୍ଯ୍ୟାଳୟ ଘେରାଉ କରିବାକୁ ଘୋଷଣା

କରିଥିଲେ । ଆଜି ଅଧିକାରୀ ଓ କର୍ମଚାରୀମାନେ ଅଫିସ ସମୟରେ କଳାବ୍ୟାଚ ପରିଧାନ କରିଥିଲେ । ସେପଟେ ବିଧାୟକ ଶ୍ରୀ ସାଲୁଜାଙ୍କ ସମର୍ଥକମାନେ ବଙ୍ଗୋମୁଣ୍ଡା,ତୁରେକେଲା ଓ ମୁରିବାହାଲ ବ୍ଲକ କାର୍ଯ୍ୟାଳୟକୁ ଘେରାଉ କରିଥିଲେ । ସମସ୍ତେ ନିଜ ନିଜ ଜିଦରେ ଅଟଳ ରହିଛନ୍ତି ।  ଜିଲ୍ଲାପାଳଙ୍କ ପ୍ରତି ବିଧାୟକଙ୍କ ବ୍ୟବହାର ଉଚିତ ହୋଇନଥିବା କହି ଅଧିକାରୀମାନେ କଳାବ୍ୟାଚ ପିନ୍ଧିଥିବା ସେପଟେ ସାଧାରଣ ଜନତା ଜିଲ୍ଲାପାଳଙ୍କ ପାଣ୍ଠି ଆବଣ୍ଟନକୁ ଖୋଲାଖୋଲି ବିରୋଧ କରୁଥିଲେ । ବ୍ଲକମାନଙ୍କୁ ଅନୁଦାନ କଟାଯିବା ନେଇ ବେନୀୟମ କାମ ହୋଇଛି ବୋଲି ସ୍ଥାନୀୟ ନେତାଗଣ ଅଭିଯୋଗ ଉଠାଉଥିଲେ । ଫଳରେ ଜିଲ୍ଲାରେ ଏହି ଘଟଣାକୁ ନେଇ ଏକ ଅପ୍ରିତିକର ପରିସ୍ଥିତି ସୃଷ୍ଟି ହୋଇଛି । ଅଧିକାରୀ ଭର୍ସେସ ଜନତା ଲଢେଇରେ କିଏ କାହାକୁ ମାତ ଦେବେ ତାହା ଦେଖିବାର ରହିଲା । ଶାସକଦଳର ମନ୍ତ୍ରୀ ଟୁକୁନୀ ସାହୁ,ଜିଲ୍ଲାପରିଷଦ ସଭାପତି ଦେବକୀ ସାହୁ ଓ କଣ୍ଟାବାଞ୍ଜିର ବିଜେଡିନେତା ଖୋଲାଖୋଲି ଭାବରେ ବିଧାୟକ କୁକୁସିଂଙ୍କ ବ୍ୟବହାରକୁ ସମାଲୋଚନା କରିଥିବା ବେଳେ ସେପଟେ ପୂର୍ବତନ ସାଂସଦ ବାଳଗୋପାଳ ମିଶ୍ର,କୋସଲରାଜ୍ୟ ସମନ୍ୱୟ ସମିତିର ଅଧ୍ୟକ୍ଷ ପ୍ରମୋଦକୁମାର ମିଶ୍ର ଜିଲ୍ଲାପାଳ ଜଣେ ସରକାରୀ କର୍ମଚାରୀ ହୋଇ ଲୋକପ୍ରତିନିଧିଙ୍କୁ ଅଣଦେଖା କରିବା ଘଟଣାକୁ ନୀନ୍ଦା କରିଛନ୍ତି । ଆସନ୍ତା ୧୮ ତାରିଖ ପର୍ଯ୍ୟନ୍ତ ଅଧିକାରୀ ଓ କର୍ମଚାରୀ କଳାବ୍ୟାଚ ପିନ୍ଧିବେ ବୋଲି ସୂଚନା ମିଳିଛି । ସେପଟେ ୧୮ ତାରିଖରେ ହେବାକୁ ଥିବା ଜିଲ୍ଲାପାଳ କାର୍ଯ୍ୟାଳୟ ଘେରାଉରେ କଣ୍ଟାବାଞ୍ଜି ବିଧାୟକ ସନ୍ତୋଷସିଂ ସାଲୁଜାଙ୍କ ସମର୍ଥକଙ୍କ ସହିତ କିଛି ସଂଗଠନ ମଧ୍ୟ ସାମିଲ ହୋଇପାରନ୍ତି ବୋଲି ଆଲୋଚନା ହେଉଛି ।