14-Dec-2022

ସମ୍ବଲପୁର,( ସଂଜୀବ ପାଣିଗ୍ରାହୀ)
ଓକିଲଙ୍କ ଆନ୍ଦୋଳନ ବେଳେ କୋର୍ଟ ଭିତରେ ବ୍ୟାପକ ଭଙ୍ଗାରୁଜା ଘଟଣାକୁ ନେଇ ସୁପ୍ରିମକୋର୍ଟ କଠୋର ଆଭିମୁଖ୍ୟ ଗ୍ରହଣ କରିବା ପରେ ପଶ୍ଚିମ ଓଡ଼ିଶା ଓକିଲ ସଂଘ ମଙ୍ଗଳବାର ହାଇକୋର୍ଟର ସ୍ଥାୟୀ ବେଞ୍ଚ୍‌ ସ୍ଥାପନ ଦାବିରେ ଚାଲିଥିବା ଆନ୍ଦୋଳନକୁ ସ୍ଥଗିତ ରଖିଛି I ଓକିଲ ସଂଘ ସମୂହର କେନ୍ଦ୍ରୀୟ କ୍ରିୟାନୁଷ୍ଠାନ କମିଟି(ସିଏସି)  ଏହା ଘୋଷଣା କରିଛି I ଅପରପଟେ ସୁପ୍ରିମକୋର୍ଟଙ୍କ କଡ଼ା ଆଦେଶ ପରେ ସମ୍ବଲପୁର ଟାଉନ ଥାନା ପୋଲିସ ମଧ୍ୟ ତତ୍ପରତା ଦେଖାଇଛି I ୨ ଜଣ ମହିଳା ଆଇନଜୀବୀଙ୍କ ସମେତ ମୋଟ୍‌ ୧୫ ଜଣ ଆଇନଜୀବୀଙ୍କୁ ଗିରଫ କରି କୋର୍ଟଚାଲାଣ କରିଛି I ଜାମିନ ନମିଳିବାରୁ ସମସ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ସୁପ୍ରିମକୋର୍ଟଙ୍କ ଆଦେଶ ପରେ ମଙ୍ଗଳବାର ଅପରାହ୍ନରେ ସିଏସି ପକ୍ଷରୁ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଥିଲା। ପଶ୍ଚିମ ଓଡ଼ିଶା ଓକିଲ ସଂଘ ସମୂହର କେନ୍ଦ୍ରୀୟ କ୍ରିୟାନୁଷ୍ଠାନ କମିଟି ଅଧୀନରେ ଥିବା ସବୁ ଓକିଲ ସଂଘ ସହିତ ଆଲୋଚନା କରାଯିବା ପରେ ବର୍ତ୍ତମାନ ଚାଲିଥିବା ଆନ୍ଦୋଳନକୁ ସ୍ଥଗିତ ରଖିବାକୁ ନିଷ୍ପତ୍ତି ନିଆଯାଇଥିଲା। ବୈଠକରେ ପଶ୍ଚିମ ଓଡ଼ିଶାର ସମ୍ବଲପୁରରେ ହାଇକୋର୍ଟର ସ୍ଥାୟୀ ବେଞ୍ଚ୍‌ ସ୍ଥାପନ ଦିଗରେ ସିଏସି ଏବଂ ସମ୍ବଲପୁର ଓକିଲ ସଂଘ କେନ୍ଦ୍ର ସରକାର, ରାଜ୍ୟ ସରକାର ଓ ଓଡ଼ିଶା ହାଇକୋର୍ଟଙ୍କ ଉପରେ ଉଚ୍ଚ ଆଶା ପୋଷଣ କରିଥିଲା। ସବୁ ସାମ୍ବିଧାନିକ ବ୍ୟବସ୍ଥା ଉପରେ ଆସ୍ଥା ପ୍ରକଟ କରାଯାଇଥିଲା। ସୁପ୍ରିମକୋର୍ଟଙ୍କ ଉପରେ ମଧ୍ୟ ସଂପୂର୍ଣ୍ଣ ଆସ୍ଥା ପ୍ରକଟ କରାଯାଇ ଆନ୍ଦୋଳନ ସ୍ଥଗିତ ରଖିବାକୁ ପ୍ରସ୍ତାବ ନିଆଯାଇଥିବା ସିଏସିର ସହ-ଆବାହକ ପ୍ରମୋଦ ଦାଶ ସୂଚନା ଦେଇଛନ୍ତି I ଅନ୍ୟପକ୍ଷରେ ସୋମବାରର ଅଭାବନୀୟ ଘଟଣାକୁ କେନ୍ଦ୍ରକରି ୩ ଜଣ ପୋଲିସ ଅଧିକାରୀ ଟାଉନ ଥାନାରେ ଏତଲା ଦେଇଥିଲେ। କୋର୍ଟ ପରିସରକୁ ଧ‌ସେଇ ପଶିବା, ବିଚାରପତିମାନଙ୍କୁ କୋର୍ଟ ଭିତରୁ ବାହାର କରିଦେବା, ଭଙ୍ଗାରୁଜା କରିବା, ପୋଲିସ ସହିତ ଧସ୍ତାଧସ୍ତି ହେବା ଆଦି ଘଟଣାକୁ ନେଇ ଟାଉନ ଥାନାରେ ୩ଟି ମାମଲା ରୁଜୁ ହୋଇଥିଲା। ଏହି ଘଟଣା ନେଇ ବିଳମ୍ବିତ ରାତିରେ ପୋଲିସ ଗିରଫ ଅଭିଯାନ ଆରମ୍ଭ କରିଥିଲା। ମଙ୍ଗଳବାର ଦିନସାରା ପୋଲିସ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଥିଲା। ସମ୍ବଲପୁର ଏସ୍‌ପି ବି.ଗଙ୍ଗାଧର ଓ ସୋନପୁର ଏସ୍‌ପି ଅମରେଶ ପଣ୍ଡା, ରାଉରକେଲାର ଅତିରିକ୍ତ ଏସ୍‌ପି ସଂଗ୍ରାମ ବେହେରା ଓ ସମ୍ବଲପୁରର ଅତିରିକ୍ତ ଏସ୍‌ପି ତପନ ମହାନ୍ତି, ଡିଏସ୍‌ପି ପ୍ରଦୀପ ସାହୁଙ୍କ ତତ୍ତ୍ବାବଧାନରେ ବହୁ ସଂଖ୍ୟକ ଇନ୍‌ସପେକ୍ଟର, ଏସ୍‌ଆଇ ଏବଂ ଏଏସ୍‌ଆଇଙ୍କ ସହିତ ୨୨ ପ୍ଲାଟୁନ୍ ‌ଫୋର୍ସ ନିୟୋଜିତ କରାଯାଇଥିଲା I ପୋଲିସ ସୋମବାର ବିଳମ୍ବିତ ରାତିରୁ ମଙ୍ଗଳବାର ସନ୍ଧ୍ୟା ସୁଦ୍ଧା ୧୫ ଜଣ ଆଇନଜୀବୀଙ୍କୁ ଗିରଫ କରିଥିବା ସୂଚନା ଦେଇଛି। ସେମାନେ ‌ହେଲେ, ପ୍ରମୋଦ ସରାଫ, ପ୍ରଦ୍ୟୋତ କୁମାର ଶର୍ମା, ଦୀପକ କୁଅଁର, ପ୍ରବୀଣ ସିଂହଦେଓ, ମହେନ୍ଦ୍ର ବଢ଼େଇ, ସିଲୁ ମହାପାତ୍ର, ମହମ୍ମଦ ମୁସ୍ତାକ୍ ଅନ୍‌ସାରୀ, ବିଜୟ କୁମାର ଜେନା, ରତନଲାଲ ଅଗ୍ରୱାଲ, ସୂରଜ ବିଶ୍ବାଳ, ସୁରଂଗିନୀ ବାରିକ, ଅଫ୍‌ସାନା ଅଂଜୁମ୍‌, ମଧୁସୂଦନ ମିତ୍ର, ଶଶାଙ୍କ ଷଡ଼ଙ୍ଗୀ ଓ ବିଦ୍ୟାଧର ପଣ୍ଡା। ସମସ୍ତଙ୍କୁ କୋର୍ଟଚାଲାଣ କରାଯାଇଥିଲା। କୋର୍ଟରେ ଜାମିନ ନମିଳିବାରୁ ସମସ୍ତଙ୍କୁ ‌ଜେଲ୍‌ ହାଜତକୁ ପଠେଇ ଦିଆଯାଇଥିବା ପୋଲିସ ପକ୍ଷରୁ ସୂଚନା ଦିଆଯାଇଛି।