02-Dec-2020

(ପ୍ରେରଣା ଖବର): ରାଜ୍ୟରେ କେବେ ଖୋଲିବ ଶିକ୍ଷାନୁଷ୍ଠାନ ଓ କେବେ ଆରମ୍ଭ ହେବ ପାଠପଢା, ତାକୁ ନେଇ ଏବେ ଚିନ୍ତାରେ ଛାତ୍ରଛାତ୍ରୀ । କରୋନା ପରିସ୍ଥିତି ଦେଖି ଆସାମ ସହ ଅନେକ ରାଜ୍ୟ ସ୍କୁଲ ଖୋଲି ପାଠ ପଢେଇବା ଆରମ୍ଭ କରିଥିବା ବେଳେ ଓଡିଶାରେ ଏବେ ବି ଦ୍ୱନ୍ଦ ଲାଗି ରହିଛି । ଡିସେମ୍ବର 31 ପର୍ଯ୍ୟନ୍ତ ସମସ୍ତ ଶିକ୍ଷାନୁଷ୍ଠାନ ବନ୍ଦ ରଖିବା ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଥିବା ବେଳେ ଗତକାଲି ଠାରୁ ରାଜ୍ୟରେ ମେଡିକାଲ ଖୋଲିବା ପାଇଁ ଅନୁମତି ଦେଇଛନ୍ତି ସରକାର । ସେପଟେ ତୁରନ୍ତ ସ୍କୁଲ ଖୋଲି ପାଠ ପଢେଇବାର ଆବଶ୍ୟକତା ରହିଛି ଛାତ୍ରଛାତ୍ରୀ ଓ ଶିକ୍ଷକ ସଂଘ କହିଛନ୍ତି ।*କରୋନା ଯୋଗୁ ଦୀର୍ଘ 8 ମାସରୁ ଶିକ୍ଷାନୁଷ୍ଠାନ ବନ୍ଦ ହେବା କାରଣରୁ ଘରେ ରହି ଅନଲାଇନରେ ପାଠ ପଢୁଛନ୍ତି ଛାତ୍ରଛାତ୍ରୀ । ସେମାନଙ୍କ ପାଇଁ 30 ପ୍ରତିଶତ ପାଠ୍ୟକ୍ରମ ମଧ୍ୟ ହ୍ରାସ କରାଯାଇଛି । ଏହା ସତ୍ୱେ ରାଜ୍ୟର 69 ପ୍ରତିଶତ ଛାତ୍ରଛାତ୍ରୀ ଅନଲାଇନ ଶିକ୍ଷାରୁ ବଞ୍ଚିତ ।  ଯାହାର ସିଧା ପ୍ରଭାବ ସେମାନଙ୍କ କ୍ୟାରିଅର ଉପରେ ପଡୁଛି । ଗୋଟିଏ ପଟେ ରାଜ୍ୟ ସରକାର ସମସ୍ତ ଶିକ୍ଷାନୁଷ୍ଠାନକୁ ଡିସେମ୍ବର 31 ପର୍ଯ୍ୟନ୍ତ ବନ୍ଦ ରଖିବା ପାଇଁ ନିର୍ଦ୍ଦେଶ ଦେଇଥିବା ବେଳେ ଅନ୍ୟପଟେ ଡିସେମ୍ବର 1 ରୁ ରାଜ୍ୟରେ ଖୋଲିଛି ମେଡିକାଲ କଲେଜ । ଖାଲି ଏତିକି ନୁହେଁ ଡିସେମ୍ବର ମାସ ପାଇଁ ସରକାରଙ୍କ ପକ୍ଷରୁ ଜାରି କରାଯାଇଥିବା ଗାଇଡଲାଇନରେ ଶିକ୍ଷାନୁଷ୍ଠାନ ଖୋଲିବା ପାଇଁ ଶିକ୍ଷା ବିଭାଗ ନିଷ୍ପତ୍ତି ନେଉ ବୋଲି କହିଛନ୍ତି ସରକାର । ସେପଟେ ଅନଲାଇନ ପାଠ ସଠିକ ଭାବେ ବୁଝି ହୋଇପାରୁ ନଥିବା ବେଳେ କୋଭିଡ ଗାଇଡଲାଇନ ମଧ୍ୟରେ ସ୍କୁଲ ଖୋଲି ପାଠ ପଢାଇବା ପାଇଁ କହିଛନ୍ତି ଛାତ୍ରଛାତ୍ରୀ । ଅନ୍ୟପଟେ ଜାନୁୟାରୀ 1 ରୁ ଆସାମରେ ସମସ୍ତ ସ୍କୁଲ ଖୋଲିବା ପାଇଁ ନିର୍ଦ୍ଦେଶ ଦେଇଛନ୍ତି ଆସାମ ଶିକ୍ଷାମନ୍ତ୍ରୀ ହେମନ୍ତବିଶ୍ୱ ଶର୍ମା । ସେପଟେ ଓଡିଶାରେ କରୋନା ଗ୍ରାଫ ହ୍ରାସ ପାଉଥିବା ବେଳେ କେବେ ଖୋଲିବ ଶିକ୍ଷାନୁଷ୍ଠାନ ତାକୁ ନେଇ ଏବେ ବି ଦ୍ୱନ୍ଦ ଲାଗି ରହିଛି । ସ୍କୁଲ ଖୋଲି ନବମରୁ ଦ୍ୱାଦଶ ପର୍ଯ୍ୟନ୍ତ କ୍ଲାସ କରିବା ପାଇଁ ଅଭିଭାବକ ସଂଘ ଦାବି କରିଛି । କାରଣ ରାଜ୍ୟର ଶିକ୍ଷା ବିଭାଗ ଏପର୍ଯ୍ୟନ୍ତ ବୋର୍ଡ ପରୀକ୍ଷା ପାଇଁ କୌଣସି ତାରିଖ ଘୋଷଣା କରିନଥିବା ବେଳେ ନୂଆଶିକ୍ଷା ବର୍ଷ ମଧ୍ୟ ଘୋଷଣା କରାଯାଇ ନାହିଁ । ତେବେ ପରିସ୍ଥିତି ଦେଖି ସ୍କୁଲ ଖୋଲି ପିଲାଙ୍କୁ ପାଠ ପଢେଇବାର ଆବଶ୍ୟକତା ରହିଛି ବୋଲି ଶିକ୍ଷକ ସଂଘ କହିଛି ।