31-Oct-2022

ବିନିକା(ହିମାଂଶୁ ଶେଖର ପୁଟେଲ) ବୀରମହାରାଜପୁର ବିଧାୟକ ପଦ୍ମନାଭ ବେହେରା ଫୁଲମୁଠି ଗ୍ରାମ ଗସ୍ତରେ ଆସି ଗ୍ରାମର ବିଭିନ୍ନ ସମସ୍ୟା ସମାଧାନ ଦିଗରେ ପ୍ରତିଶ୍ରୁତି ଦେଇଛନ୍ତି ।ପ୍ରାରମ୍ଭରେ ଗାଁ ଉପରପଡ଼ା ମଣ୍ଡପ ଠାରେ ୱାର୍ଡ ସଭ୍ୟ ଆନନ୍ଦ ହୋତାଙ୍କ ନେତୃତ୍ୱରେ ଯୁବ ଗୋଷ୍ଟି ବିଧାୟକ ଶ୍ରୀବେହେରାଙ୍କୁ ସ୍ଵାଗତ ସମ୍ବର୍ଦ୍ଧନା ଜଣାଇ ମାହେଶ୍ୱରୀ ମଣ୍ଡପକୁ ପାଛୋଟି ଆଣିଥିଲେ । ଶ୍ରୀବେହେରା ଗ୍ରାମର ଇଷ୍ଟଦେବୀ ମାହେଶ୍ୱରୀଙ୍କୁ ଦର୍ଶନ କରିବା ପରେ ଗ୍ରାମବାସୀଙ୍କ ତରଫରୁ ଆୟୋଜିତ ସଭାରେ ଉପସ୍ଥିତ ରହି ସମସ୍ୟା ଉପରେ ଅବଗତ ହୋଇଥିଲେ ।ଚାଷୀଙ୍କ ପାଇଁ ରହିଥିବା କେନାଲ ପାଣି ସମସ୍ୟା ନେଇ ବିଭାଗୀୟ ଅଧିକାରୀଙ୍କ ସହ ଯୋଗାଯୋଗ କରି ଆସନ୍ତା କାଲି ସନ୍ଧ୍ୟା ସୁଦ୍ଧା ପାଣି ଆସିବ ବୋଲି ଚାଷୀଙ୍କୁ କହିଥିଲେ । ଗ୍ରାମର ଅବହେଳିତ ମୁଖ୍ୟରାସ୍ତା ନବୀକରଣ,ବଡ଼ବନ୍ଧ,ଦେହେରିମୁଣ୍ଡା ପୁନରୁଦ୍ଧାର ପାଇଁ ପ୍ରତିଶ୍ରୁତି ଦେଇଥିଲେ ।ସେହିପରି ମାହେଶ୍ୱରୀ ମନ୍ଦିର ନିର୍ମାଣ କାର୍ଯ୍ୟ ସମ୍ପୂର୍ଣରେ ପ୍ରତିବନ୍ଧକ ସୃଷ୍ଟି କରୁଥିବା ଅନୁଦାନ ମଞ୍ଜୁର ଦିଗରେ ପଦକ୍ଷେପ ନିଆଯିବ ବୋଲି କହିଥିଲେ ।ଏହି ଅବସରରେ ମାହେଶ୍ୱରୀ ମନ୍ଦିର ପରିଚାଳନା କମିଟି ସଭାପତି ଫଗୁ ପାତ୍ର,ଅବସରପ୍ରାପ୍ତ ଶିକ୍ଷକ ପ୍ରସନ୍ନ ରଥ,ଚରଦା ସରପଞ୍ଚ ବୃନ୍ଦାବତୀ ନାୟକ,ବିଜେଡ଼ି ବ୍ଳକ ସଭାପତି ଦ୍ବାରିକାନାଥ ସାହୁ,ଭୀମସେନ ସାହୁ,ବାବୁଲାଲ ପଣ୍ଡା,ନୀଳାମ୍ବର ସାହୁ,ସାମ୍ବାଦିକ ହିମାଂଶୁ ଶେଖର ପୁଟେଲ,ସଚେତନ ନାଗରିକ ମଠ ମିଶ୍ର,ଅମ୍ବରିଶ ନାୟକ,ମହେଶ୍ୱର ପ୍ରଧାନ,ଭୁବନ ମହାକୁର,ୱାର୍ଡ ସଭ୍ୟ ଶଙ୍କର ପଣ୍ଡା ପ୍ରମୁଖ ଗ୍ରାମର ସମସ୍ୟା ନେଇ ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ ।