09-Oct-2022

ବରଗଡ:-ମର୍ଯ୍ଯାଦା ପୁରୁଷୋତ୍ତମ ପ୍ରଭୁ ରାମଚନ୍ଦ୍ର ରାବଣକୁ ବଧ କରି ଦେବୀ ସୀତାଙ୍କୁ ଉଦ୍ଧାର କରିବାକୁ ସେତୁବନ୍ଧ ବାନ୍ଧିଥିଲେ। ଅନୁରୂପ ଭାବେ ସମ୍ବଲପୁରୀ/କୋଶଲୀ ଭାଷାର ସାମ୍ବିଧାନିକ ସ୍ବୀକୃତି ପାଇଁ କବିତା ଅଷ୍ଟ ପ୍ରହରୀ ସେତୁବନ୍ଧର ଆଦ୍ଯ ପ୍ରୟାସ। ସୁତରାଂ ପଶ୍ଚିମ ଓଡିଶାର ଭାଷାକୁ ସାମ୍ବିଧାନିକ ସ୍ବୀକୃତି ପାଇଁ କବିତା ଅଷ୍ଟ ପ୍ରହରୀ ଏକ ଯୁଗାନ୍ତକାରୀ ପଦକ୍ଷେପ। ବରଗଡ଼ ଜିଲ୍ଲା ବିଜେପୁର ବ୍ଲକ ଅନ୍ତର୍ଗତ ପଡା ଗ୍ରାମର ପ୍ରକାଶ ସାଂସ୍କୃତିକ ସଂସଦର ରୌପ୍ୟ ଜୟନ୍ତୀ ଉତ୍ସବ ସମାରୋହରେ ଆଯୋଜିତ କବିତା ଅଷ୍ଟ ପ୍ରହରୀର ସପ୍ତମ ପ୍ରହରରେ ଅତିଥିଗଣ ଏହି ମତପ୍ରକାଶ କରିଛନ୍ତି। ଅଧ୍ଯାପକ ଡକ୍ଟର ମିନତୀ ଦେବତା, ଅଞ୍ଜଳୀ ପଧାନଙ୍କ ପୌରୋହିତ୍ୟରେ ଏହି ପ୍ରହର ଅନୁଷ୍ଠିତ ହୋଇଥିଲା। ଅହଲ୍ୟା ପଧାନ, ନମିତା ଦୀପ ଯାଦବ, ଅନୁପ୍ରିୟା ମିଶ୍ର, ସବିତା ମେହେର, ଆରତୀ ସାହୁ, ପଙ୍କଜିନୀ ମେହେର, ମଞ୍ଜୁ ଲତା ସାହୁ, ଚନ୍ଦ୍ରାବତୀ ପାଣ୍ଡେ, ସାବିତ୍ରୀ ମେହେର, ଜୟଶ୍ରୀ ସାହୁ ପ୍ରମୁଖ ନାରୀ କବିଗଣ କବିତା ପାଠ କରିଥିଲେ। ଏହି ସମାରୋହକୁ କବି ସୋନାଲୀ ପାଢୀ ସଂଚାଳନ କରିଥିଲେ। କବିମାନଙ୍କୁ କବି ଘରଜୁଗୀ ଗଡତିଆ ଅତିଥି ଭାବେ ଯୋଗଦେଇ ନାରୀ କବିମାନଙ୍କୁ ସମ୍ମାନୀତ କରିଥିଲେ। ସେହିପରି ଚତୁର୍ଥ ପ୍ରହରେ ପଦ୍ମଶ୍ରୀ ଡକ୍ଟର ହଳଧର ନାଗ, ନିରଞ୍ଜନ ପଣ୍ଡା, ବୈରାଗୀ ସାହୁ, ସଚ୍ଚିଦାନନ୍ଦ ପଧାନ, ଜଟାଧାରୀ ପଧାନ ପ୍ରମୁଖ ବହୁ କବି କବିତା ପାଠ କରିଥିଲେ। ସ୍ଥାନୀୟ ଗୌତିଆ ଡମ୍ବରୁଧର ପଧାନ, ରାଜେଶ ମେହେର ଏହି ପ୍ରହରେ ସଭାପତିତ୍ୱ କରିଥିଲେ। ଅଧ୍ୟାପକ ସନ୍ତୋଷ ତ୍ରିପାଠୀ କବିତାଗୁଡିକୁ

ସଂଯୋଜନା କରିଥିଲେ। ପଞ୍ଚମ ପ୍ରହରରେ କଳାକାର ସୁରେଶ ଚନ୍ଦ୍ର ଭୋଇ, ଟିକେଲାଲ ପଧାନଙ୍କ ପୌରୋହିତ୍ୟରେ ଗୁଛାକବି ଶିବଶଙ୍କର ପୁଜାରୀ, କ୍ରୁଷ୍ନଚନ୍ଦ୍ର ଭୋଇ, ଭିକାରୀ ଚରଣ ପଧାନ, ଅନନ୍ତ ମେହେର, ଅଶ୍ବିନୀ ସାହୁ, ସୁରେଶ ସାହୁ ଯୋଗଦେଇ କବିତା ପାଠ କରିଥିଲେ। କବିତାଗୁଡ଼ିକୁ କବି ତୁଳସୀରାମ ମେହେର ସଂଯୋଜନା କରିଥିଲେ। କ୍ରୀଡା ଶିକ୍ଷକ ବିଶିକେଶନ ମେହେର, ପ୍ରମୋଦ ପଧାନଙ୍କ ପୌରୋହିତ୍ୟରେ ରବିବାର ସକାଳ ୬ଟାରୁ ୯ଟା ପର୍ଯ୍ୟନ୍ତ ଷଷ୍ଠ ପ୍ରହର ଅନୁଷ୍ଠିତ ହୋଇଥିଲା। କବି ରାମପ୍ରସାଦ ବାଗ, ସୁଶାନ୍ତ ଭୋସାଗର, ବାସୁଦେବ ସାହୁ, ମକରଧ୍ୱଜ ସାହୁ, ଗୌରଚରଣ ସା ପ୍ରମୁଖ କବିତା ପାଠ କରିଥିଲେ। ସାଂସଦ ପ୍ରତିନିଧି ମହେଶ ଦେବତା, ଜିଲ୍ଲା ପରିଷଦ ସଦସ୍ଯ ସୁଶାନ୍ତ ଗଡତୀୟା ଅତିଥି ଭାବେ ଯୋଗଦେଇ କବିମାନଙ୍କୁ ସମ୍ମାନୀତ କରିଥିଲେ।