18-Jun-2022

ବରଗଡ:-ମହାମାରୀ କୋରୋନା ଯୋଗୁଁ ଦୁଇ ବର୍ଷରୁ ଅଧିକ ସମୟ ବିଦ୍ୟାଳୟ ଗୁଡିକ ବନ୍ଦଥିଲା । ଗତ ଫେବୃୟାରୀ ଅଠେଇଶ ତାରିଖ ବିଦ୍ୟାଳୟ ଗୁଡିକ ଖୋଲାହୋଇ ତିନିମାସ ପାଠପଢ଼ା ହେଲାପରେ ଜୁନ ପାଞ୍ଚରୁ ଷୋହଳ ପର୍ଯ୍ୟନ୍ତ ବିଦ୍ୟାର୍ଥିମାନଙ୍କୁ ଛୋଟିଆ ଗ୍ରୀଷ୍ମ ଅବକାଶ ଦିଆ ଯାଇଥିଲା । ପଢିଥିବା ପାଠ ଯେପରି ପିଲାଏ ଭୁଲି ନ ଯିବେ ସେଥିପାଇଁ ଜିଲ୍ଲା ଶିକ୍ଷା ପ୍ରତିଷ୍ଠାନ ଓ ଶିକ୍ଷା କାର୍ଯ୍ୟାଳୟ, ବରଗଡ ତରଫରୁ "ଗୋଟିଏ ଦିନ ଗୋଟିଏ ପୃଷ୍ଠା " ନାମକ ଏକ କାର୍ଯ୍ୟକ୍ରମ ହାତକୁ ନେଇଥିଲେ । ସରକାରୀ ପ୍ରାଥମିକ ବିଦ୍ୟାଳୟ, ଗଙ୍ଗେଇ ଏଥିରେ ହସ୍ତକର୍ମ , ପ୍ରକଳ୍ପ କାର୍ଯ୍ୟ, ଅନଲାଇନ କ୍ଲାସ "ଶିକ୍ଷା ତରଙ୍ଗ" କୁ ଯୋଡି " ଦୈନନ୍ଦିନୀ " ନାମକ ଏକ ସ୍ଵତନ୍ତ୍ର କାର୍ଯ୍ୟକ୍ରମ ହାତକୁ ନେଇଥିଲେ । ଏଥିପାଇଁ ପ୍ରଧାନ ଶିକ୍ଷକ ଶ୍ରୀମାନ ରୋହିତ କୁମାର ଭୁଏ ଶେଷ କାର୍ଯ୍ୟଦିବସରେ ଅଭିଭାବକମାନଙ୍କୁ ତାଲିମ ମଧ୍ଯ ଦେଇଥିଲେ । କାର୍ଯ୍ୟକ୍ରମକୁ ଶିକ୍ଷାସାରଥୀ ଦଳ ସମ୍ପୂର୍ଣ୍ଣ ସହଯୋଗ କରିବା ସହ ପିତାମାତାଙ୍କ ସକ୍ରିୟ ଅଂଶଗ୍ରହଣ ଓ ପ୍ରଧାନ ଶିକ୍ଷକଙ୍କ ଘର ଘର ପରିଦର୍ଶନ ଏହାକୁ ସଫଳ କରିବାରେ ସହାୟକ ହୋଇପାରିଥିଲା ।

"ଦୈନନ୍ଦିନୀ"ର ସଫଳ ରୂପାୟନ ପରେ ଏକ ସମ୍ବର୍ଦ୍ଧନା ସଭା ର ଆୟୋଜନ କରାଯାଇ ସମସ୍ତ ଶିକ୍ଷାର୍ଥୀମାନଙ୍କୁ ପ୍ରଶଂସା ପତ୍ର ସହ ଉପହାର ପ୍ରଦାନ କରାଯାଇଥିଲା । ଏଥିରେ ମୁଖ୍ଯ ଅତିଥି ଭାବରେ ପୂର୍ବତନ ବି.ଆର.ସି.ସି ଶ୍ରୀଯୁକ୍ତ ରାଜେନ୍ଦ୍ର କୁମାର ତ୍ରିପାଠୀ ଯୋଗଦେଇ ପଢା ଅଭ୍ଯାସର ମହତ୍ତ୍ବ ତଥା ଅଭିଭାବକମାନଙ୍କ ସକ୍ରିୟ ଯୋଗଦାନର ସୁଫଳ ସମ୍ପର୍କରେ ଅବଗତ କରାଇଥିଲେ ।ଶ୍ରୀଯୁକ୍ତ ଜୟରାମ ଗହିରଙ୍କ ସଭାପତିତ୍ବରେ ଅନୁଷ୍ଠିତ ସଭାରେ ଶ୍ରୀଯୁକ୍ତ ଚୈତନ୍ୟ ତୁଆନ ସମ୍ମାନୀତ ଅତିଥି ଭାବରେ ଯୋଗଦେଇ ପିଲାମାନଙ୍କ ଉଜ୍ଜ୍ବଳ ଭବିଷ୍ୟତ କାମନା କରିଥିଲେ । ଶେଷରେ କାର୍ଯ୍ୟକ୍ରମର ପରିଚାଳକ ଶ୍ରୀଯୁକ୍ତ ରୋହିତ କୁମାର ଭୁଏ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ