28-May-2022

ଭୁବନେଶ୍ୱର : ମୁକ୍ତିଲାଭ କରିଛି ବହୁ ପ୍ରତିକ୍ଷୀତ ଓଡିଆ ସିନେମା ‘ଦୃଷ୍ଟିକୋଣ’ । ଅକ୍ଷୟ ପରିଜା ପ୍ରଡକ୍ସନ ବ୍ୟାନରରେ ନିର୍ମିତ ଏହି ସିନେମା ପ୍ରଥମ ଦିନରେ ହାଉସଫୁଲ ହୋଇଛି । ଖାଲି ସେତିକି ନୁହେଁ ଏହି ସିନେମା ଦର୍ଶକଙ୍କୁ ପ୍ରେକ୍ଷାଳୟ ମୁହାଁ କରାଇବା ସହ ଓଡିଆ ସିନେମାକୁ ନେଇ ଥିବା ଦର୍ଶକଙ୍କ ଦୃଷ୍ଟିକୋଣ ବି ବଦଳାଇବାରେ ସକ୍ଷମ ହୋଇଛି । ପ୍ରଥମ ଦିନରେ ହଲରେ ଦର୍ଶକଙ୍କ ତାଳିମାଡ ସହ ସିନେମାକୁ ଜବରଦସ୍ତ ରେସପନ୍ସ ମିଳିଛି । ଦୀର୍ଘଦିନର ବ୍ୟବଧାନ ପରେ ଓଡିଆ ସିନେମା ଗୋଟିଏ ଦିନରେ ସୁପରହିଟ୍ ହୋଇଛି । ଯାହା ଓଲିଉଡ ପାଇଁ ଏକ ମାଇଲଷ୍ଟୋନ ହେବା ସହ ଦର୍ଶକଙ୍କୁ ପୁଣି ସିନେମା ହଲକୁ ଫେରାଇ ଆଣିବାରେ ସଫଳ ହୋଇପାରିଛି । 
ପ୍ରଥମ ଦିନ ପ୍ରଥମ ସୋ’ରେ ଓଲିଉଡର ନାମକରା କଳାକାରଙ୍କ ସହ ସିନେ କ୍ରିଟିକ୍‌, ଶୁଭେଚ୍ଛୁ ଦର୍ଶକଙ୍କ ସହ ହଲରେ ବସି ସିନେମାକୁ ଦେଖିଥିଲେ । ପୀଡିତା ଭାବେ ନବଗତା ଲିଜା ନାୟକଙ୍କ ଦମଦାର ଅଭିନୟ, ଏଲିନା ସାମନ୍ତରାୟଙ୍କ ପୁଲିସ ଭୂମିକା ଓ ହର ରଥଙ୍କ ଓକିଲାତି ସିନେମାକୁ ଫାଇଭ ଷ୍ଟାର ରେଟିଂ ଦେଇଛି । ସାହିତ୍ୟିକ ହର ପ୍ରସାଦ ଦାସ ଜଜ୍ ଭୂମିକାରେ ନିଖୁଣ ଅଭିନୟ କରିଛନ୍ତି 

ଅନ୍ୟମାନଙ୍କ ମଧ୍ୟରେ ଚୌଧୁରୀ ବିକାଶ ଦାସ, ଅଙ୍କିତ ମହାନ୍ତି ଓ ସାଥୀ କଳାକାରମାନେ ବେଶ ବଢ଼ିଆ ଅଭିନୟ କରିଥିବା ବେଳେ ସୁଶାନ୍ତ ମଣିଙ୍କ ନିର୍ଦ୍ଦେଶନାରେ ସିନେମାଟି ବେଶ ଉଚ୍ଚକୋଟୀର ହୋଇପାରିଛି । 

ସବୁଠୁ ବଡକଥା ହେଲା, ରଜ ସମୟରେ ଧୁମଧଡାକ ସିନେମା ରିଲିଜ ହେବାର ନଜୀର ରହିଛି । କିନ୍ତୁ ରଜ ପୂର୍ବରୁ ଅକ୍ଷୟ ପରିଜା ଏଭଳି ଏକ ସାମାଜିକ ସିନେମା ‘ଦୃଷ୍ଟିକୋଣ’ ନିର୍ମାଣ କରି ଓଡିଆ ଦର୍ଶକଙ୍କ ରୁଚିକୁ ନିରିଖେଇ ଦେଖି ପାରିଛନ୍ତି । ଦେହ ଭୋକ ମେଂଟାଇବା ପାଇଁ ନାରୀକୁ କିଭଳି ଭୋଗ୍ୟବସ୍ତୁ ଭାବେ ବ୍ୟବହାର କରାଯାଉଛି । ମଦ ଓ ଡ୍ରଗ୍ସ ନିଶାରେ ଜଣେ ଯୁବତୀକୁ କିଭଳି ଗଣବଳାତ୍କାର କରାଯାଉଛି ଓ କୋର୍ଟ ରୁମ ଭିତରେ ପୀଡିତାର ବକ୍ଷସ୍ଥଳକୁ କିଭଳି କଦର୍ଯ୍ୟ ଭାବେ ଚିତ୍ରଣ କରାଯାଇ ତାର ଚରିତ୍ର ସଂହାର କରାଯାଉଛି ତାହା ଅତି ସୁନ୍ଦର ଭାବେ ସିନେମାରେ ଦେଖିବାକୁ ମିଳିଛି । ତେବେ ପ୍ରମାଣ ଅଭାବରୁ ଅଭିଯୁକ୍ତ ମାନେ ଖସି ଯିବାକୁ ଗଳାବାଟ ଖୋଜୁଥିବା ବେଳେ ଶେଷରେ ନିଜେ ବିଚାରପତି କଣ ପଦକ୍ଷେପ ଗ୍ରହଣ କରୁଛନ୍ତି ତାହା ସିନେମାରେ ଚିତ୍ରଣ କରାଯାଇଛି । ସିନେମାକୁ ଲୋକଙ୍କ ପ୍ରବଳ ଭଲପାଇବା ମିଳିଥିବା ବେଳେ ପ୍ରଯୋଜନା ସଂସ୍ଥା ତରଫରୁ ସମସ୍ତଙ୍କୁ ଧନ୍ୟବାଦ ଅର୍ପଣ କରାଯାଇଛି ।

(ଅମୃତ ନନ୍ଦଙ୍କ ରିପୋର୍ଟ)