28-May-2022

ବିନିକା(ହିମାଂଶୁ ଶେଖର ପୁଟେଲ) :ଶୁକ୍ରବାର ଅପରାହ୍ନରେ ଅଚାନକ କାଳବୈଶାଖୀ ବର୍ଷା ଓ ପବନ ଯୋଗୁଁ ବିନିକା ଅଞ୍ଚଳରେ ନାହିଁ ନଥିବା କ୍ଷୟକ୍ଷତି ହୋଇଥିବା ଜଣାପଡିଛି। ସେହିପରି ପବନ ଯୋଗୁଁ ଅନେକ ସ୍ଥାନରେ ଗଛ ପଡି ରାସ୍ତା ଅବରୋଧ ହେବା ସହ ଯାତାୟତରେ ବାଧାପ୍ରାପ୍ତ ଘଟିଛି ।ବର୍ତମାନ ଚାଷୀ ରବି ରିତୁର ଧାନ ଜୋରଦାର ଭାବେ ଅମଲ କରୁଥିବା ବେଳେ ଏବଂ ଆଉ କେତେକ ଚାଷୀ କଷ୍ଟପାର୍ଜିତ ଧାନକୁ ଅମଳ କରି ଖଳା ମାନଙ୍କରେ ସାଇତି ରଖିଥିବା ବେଳେ ଅଚାନକ ବର୍ଷା  ଚାଷୀର ମେରୁଦଣ୍ଡକୁ ଦୋହଲାଇ ଦେଇଛି ।ବହୁ ସ୍ଥାନରେ ଧାନ ସବୁ ବର୍ଷାରେ ଭିଜି ଯାଇଥିବାରୁ ଚାଷୀ ଆଖିରେ ଲୁହ ଗଡ଼ିବା ସାର ହୋଇଛି । ଦୀର୍ଘ ୨ଘଣ୍ଟାରୁ ଅଧିକ ସମୟ ଧରି ପବନ ବୋହିବା ସହ ତୁହାକୁ ତୁହା ବର୍ଷା ଯୋଗୁଁ କେତେକ ଚାଷ ଜମିର ଧାନ ଗଛ ଗୁଡ଼ିକ ସମ୍ପୂର୍ଣ୍ଣ ଶୋଇ ପଡ଼ିଥିବା ବେଳେ ଆଉ କେତେକ ଚାଷ ଜମି ପାଣି ହୋଇ ଯାଇଥିବାରୁ ଧାନ କାଟିବା ବର୍ତମାନ ସମ୍ଭବ ନୁହେଁ ବୋଲି ଚାଷୀ ପ୍ରକାଶ କରିଛନ୍ତି । ଯାହା ଫଳରେ କି ଜମିର

ଓଦାଲିଆ ମାଟି ୫/୭ଦିନ ପରେ ସୁଖିଲେ ଯାଇ ଚାଷୀ ଜମିରୁ ଧାନ ଅମଳ କରି ପାରିବ ।ଅନ୍ୟ ପକ୍ଷରେ ଏହି ବର୍ଷା ଯୋଗୁଁ ପନିପରିବା ଚାଷରେ ମଧ୍ୟ କ୍ଷତି ହୋଇଥିବା ସୂଚନା ମିଳିଛି ।ପବନ ଓ ବର୍ଷା ଯୋଗୁଁ ଅଧିକାଂଶ ସ୍ଥାନରେ ଗଛ ଗୁଡ଼ିକ ଭାଙ୍ଗି ଯାଇଛି ।ବିନିକା ଏସ ରାମପୁର ରାଜପଥ ବିଶାଳପାଲି ଠାରେ ଥିବା ରାସ୍ତା ପାର୍ଶ୍ଵ କେତେକ ଗଛ ଭାଙ୍ଗି ଯାଇ ରାସ୍ତାରେ ପଡ଼ିବାରୁ ଦୀର୍ଘ ୨ଘଣ୍ଟା ଧରି ଯିବା ଆସିବା ବନ୍ଦ ରହିଥିଲା ଉଭୟ ପଟରେ ଗାଡ଼ି ମଟର ଅଟକି ରହିଥିବା ବେଳେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ ।ଖବର ପାଇ ବିନିକା ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ରାସ୍ତାରେ ପଡ଼ିଥିବା ଗଛ ଗୁଡ଼ିକୁ କାଟି ଅନ୍ୟତ୍ର ସ୍ଥାନାନ୍ତର କରିବା ପରେ ଯିବା ଆସିବା ସ୍ୱଭାବିକ ହୋଇଥିଲା ।