26-May-2022

ପାଟଣାଗଡ(ମଳୟ ମିଶ୍ରଙ୍କ ରିପୋର୍ଟ)  ପାଟଣାଗଡ ବ୍ଲକ୍ ଜେଇ ସୁରେଶ ଚନ୍ଦ୍ର ସାହୁଙ୍କୁ ହତ୍ୟାମାମଲାର ତଦନ୍ତରେ ଅଦ୍ୟାବଧି ପୁଲିସ୍ ଅନ୍ଧାରରେ ବାଡି ବୁଲାଉଛି । ତେବେ ଏଥିରେ ଗୋଟିଏ କଥା ସ୍ପଷ୍ଟ ଯେ, ମିଥ୍ୟାବିଲ୍ ବା ଫୁଲ୍ ବିଲ୍ କରିବାକୁ ଚାପ ପକାଉଥିବା ଠିକାଦାରମାନଙ୍କ ଦ୍ବାରା ହିଁ ଏହା ଘଟିଛି । ହୁଏତ କେତେକ କହିବାପରି ଏହା ଏକ 'ଅନିଚ୍ଛାକୃତ ମର୍ଡର' ବା ଡରାଇବାକୁ ରାସ୍ତାରେ ଅଟକାଇ ପିଟାପିଟି କରୁ କରୁ ମାତ୍ରା ଅଧିକ ହୋଇଯାଇ ତାହା ମରଣାନ୍ତକ ଆଘାତ ହୋଇଯାଇଛି ଓ  ମୃତଦେହକୁ ଅନ୍ୟତ୍ର ସ୍ଥାନାନ୍ତର କରାଯାଇଛି । ୫ ଟି ସ୍କୁଲ୍ କାମ (ଉଭୟ ଯୋଗୀମୁଣ୍ଡା ଓ ବନେଇମୁଣ୍ଡା), ଫାର୍ମପଣ୍ଡ୍, ମନରେଗା, ଗୋଷ୍ଠୀଖଳା ବା କଂକ୍ରିଟ୍ ଖଳାର ଲେ- ଆଉଟ୍ ଦେବାକୁ ବା ଅନ୍ୟ କୌଣସି ବାକିଆ ବିଲ୍ ସହିତ ତାଙ୍କଠାରୁ ଲକ୍ଷାଧିକ ଟଙ୍କା ହାତ ଉଧାରୀ ନେଇ ଫେରାଉ ନଥିବା ଠିକାଦାର ଅଥବା ଏଥିରେ ମଧ୍ୟସ୍ଥି ସାଜୁଥିବା କେହି ଧନୀ ଉଆରସରକାରର ହାତ ଥାଇପାରେ ବୋଲି ସନ୍ଦେହ ଇତ୍ୟାଦିରେ ସବୁଦିଗରୁ ବୁଲିବାଲି ସେଇ ଠିକାଦାରଙ୍କ ଉପରେ ସନ୍ଦେହ କେନ୍ଦ୍ରିତ ହେଉଛି ।

ତେବେ ଏ ବ୍ଲକ୍ ର ଠିକାଦାରମାନେ ଏବେ କାହାର ଲୋକ, ସମସ୍ତେ ଜାଣନ୍ତି । ଗୋଟିଏ କଥା ଧ୍ରୁବସତ୍ୟ ଯେ, ହତ୍ୟାକାରୀ ବା ଅପରାଧୀ କାହାରି ଲୋକ ହୋଇପାରିବେନି । ଆଇନକୁ ତା' ବାଟରେ ଛାଡିଦିଆଯିବା ଉଚିତ୍ ।

ମୂଳରୁ ଗୋଟିଏ ବିଶେଷ ଦିଗର ଚର୍ଚ୍ଚା ହୋଇଆସୁଛି । ତାହା ହେଲା, ମୃତଜେଇଙ୍କ ପାଦରେ ଲାଗିଥିବା କ୍ରସରଗୁଣ୍ଡ ବା ନୂଆ ନଳକୂପ ଖୋଳାବେଳର ଧଳା ପଥରଗୁଣ୍ଡର ସନ୍ଦେହ । ଏହା ଯଦି ଠିକ୍ ହେଇଥାଏ, ସେଇ ଧଳାପଥରଗୁଣ୍ଡ ହିଁ କହିବ, ହତ୍ୟାକାଣ୍ଡର ଠିକଣା ବୋଲି ଦେଖିଥିବା ଲୋକେ ଆଲୋଚନା କରୁଛନ୍ତି । ଏଥିରେ ବି ସେଇ ଠିକାଦାରଙ୍କ ସମ୍ପୃକ୍ତି ଆସୁଛି !  ହାଇସ୍କୁଲର ଚାଲିଥିବାକାମ ହେଉ, ବାଟଘାଟର ଆଖପାଖରେ ଥିବା କୌଣସି ନିର୍ମାଣାଧୀନ ପୋଲ ହେଉ, ଅଗ୍ରୀମ ଗେଟି ପକାଇ ଆବୋରୁଥିବା କୌଣସି ପେଟି ଠିକାଦାର ଗୋଷ୍ଠୀର ଗୋଷ୍ଠୀଖଳା କାମ ହେଉ, କ୍ଷେତ ବାହାଲ କି ରାସ୍ତାକଡରେ ଖୋଳାଯାଉଥିବା ଡିପ୍ ବୋର୍ ଉଏଲ୍ ଅଥବା  କ୍ରସର୍ ହେଉ; ଏହା ଖୋଜିବାର ଦାୟିତ୍ୱ ତଦନ୍ତକାରୀଙ୍କର ।