04-Mar-2022

ସିନ୍ଧେକେଲା (ଅନୀଲ କୁମାର ତ୍ରିପାଠୀ) : ବଲାଙ୍ଗିର ଜିଲ୍ଲା ସିନ୍ଧେକେଲା ଗାଁ ବନ୍ଦୋବସ୍ତ କାର୍ଯ୍ୟକ୍ରମ ସରିଛି । ମାଁ ଦ୍ବାରସେହ୍ନୀଙ୍କ ନିର୍ଦ୍ଦେଶ ମୁତାବକ ସିନ୍ଧେକେଲା ବାସୀ ବୁଧବାର ରାତି ୮ ଟାରୁ ଗୁରୁବାର ସକାଳ ୫ ଟା ପର୍ଯ୍ୟନ୍ତ ନିଜ ନିଜ ଘରେ ରହି ଗାଁ ଲୋକଙ୍କ ସୁଃଖ ଶାନ୍ତି ପାଇଁ ଦୈବିକ କାର୍ଯ୍ଯରେ ସହଯୋଗ କରିଥିଲେ। ବୁଧବାର ସକାଳୁ ମାଁ ଦ୍ବାରସେହ୍ନୀଙ୍କ ମନ୍ଦିର ସାମ୍ନାରେ ଥିବା ବାଣୀଭଗାର ପୋଖରୀ ରେ ଥିବା ମାଁ ଗଙ୍ଗାଦି ଙ୍କ ମନ୍ଦିର ପ୍ରାଙ୍ଗଣ ରେ ଚଣ୍ଡିପାଠ ସହ ହୋମଯଜ୍ଞ ହୋଇଥିଲା। ରାଜା ଅରୁଣ ସିଂହଦେଓ କର୍ତ୍ତା ଦାୟିତ୍ବ ତୁଲାଇ

ଥିବାବେଳେ ପଣ୍ଡିତ ଉମାଶଙ୍କର ତ୍ରିପାଠୀ ଅନ୍ଯ ସହଯୋଗୀଙ୍କ ସହ ପୁଜାକାର୍ଯ୍ଯ ତୁଲାଇଥିଲେ। ପୁଜା ସରିବାପରେ ମାଁ ଦ୍ବାରସେହ୍ନୀଙ୍କ ଆଦେଶ ମୁତାବକ ମାଁ ଗଙ୍ଗାଦି ଠାକୁରାଣୀ ସମସ୍ତ ମନ୍ଦିର ସେବାୟତ ମାନଙ୍କ ସହ ଗାଁ ବନ୍ଦୋବସ୍ତ କାର୍ଯ୍ୟକ୍ରମ ରେ ବାହାରିଥିଲେ । ଏହି ସମୟରେ ସିନ୍ଧେକେଲାର ସମସ୍ତ ଜନସାଧାରଣ ଘର ବନ୍ଦ ରଖି ନିଜ ଘରେ ରହିଥିଲେ। ରାତି ତମାମ ବିଭିନ୍ନ ଦିଗକୁ ଯାଇ ଗାଁକୁ ଆସି ଯାଇଥିବା ଦେବାଦେବୀଙ୍କୁ ନିଜ ନିଜ ସ୍ଥାନକୁ ପ୍ରତ୍ୟାବର୍ତ୍ତନ କରିବା ପାଇଁ ପୁଜାପାଠ ହୋଇଥିଲା ଏବଂ ସେହି ଦିଗକୁ ମନ୍ତ୍ର ଦ୍ବାରା ବନ୍ଧନ କରାଯାଇଥିଲା । ଏହି ବନ୍ଦୋବସ୍ତ କାର୍ଯ୍ୟକ୍ରମ ୧୨ ବର୍ଷ ପରେ ଅନୁଷ୍ଠିତ ହୋଇଛି। ଅଞ୍ଚଳର ଲୋକଙ୍କ ବିଶ୍ୱାସ ଯେତେବେଳେ ଅପବିତ୍ର ଦେବା ଦେବୀଙ୍କ ପ୍ରବେଶ ଗାଁରେ ହୋଇଥାଏ ସେତେବେଳେ ଗାଁରେ ବିଭିନ୍ନ ରୋଗ ଲାଗି ରହିଥାଏ, ଅଞ୍ଚଳରେ ବର୍ଷାଭାବ ଯୋଗୁଁ ଚାଷ ପ୍ରଭାବିତ ହୁଏ, ଅକାଳରେ ଲୋକେ ମୃତ୍ଯୁବରଣ କରିଥାନ୍ତି। ଏମିତି ହେଲେ ଗାଁ ବନ୍ଦୋବସ୍ତ କରାଯାଏ ବୋଲି ବିଶ୍ଵାସ ରହିଛି ।