02-Mar-2022

ବଲାଙ୍ଗିର,(ପ୍ରେରଣା ଖବର)-ଜିଲ୍ଲା ସ୍ତରୀୟ ବିଜ୍ଞାନ ଦିବସ ପଞ୍ଚାୟତ ହାଇସ୍କୁଲ ନଅଗାଁ (ଖ) ଠାରେ ପାଳିତ ହୋଇଯାଇଛି । ବିଦ୍ୟାୟଳୟର ପ୍ରଧାନ ଶିକ୍ଷକ ଭଗବତିଆ ସାହୁଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ଜିଲ୍ଲା ଶିକ୍ଷା ଅଧିକାରୀ ଧୃବ ଚରଣ ବେହେରା,  ମୁଖ୍ୟ ବକ୍ତା ଭାବେ ସମ୍ବଲପୁର ବିଶ୍ୱ ବିଦ୍ୟାଳୟ ରସାୟନ ବିଜ୍ଞାନ ବିଭାଗର ରିଡର ରାମ ନରେଶ ମହାଲିଙ୍ଗ ଓ ସମ୍ମାନୀତ ଅତିଥି ଭାବେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ କେଶବ ମେହେର, ଆଗଲପୁର ବ୍ଲକ ଶିକ୍ଷା ଅଧିକାରୀ ରିନା ରାଣୀ ବେହେରା, ବିଜ୍ଞାନ ସାହିତ୍ୟ ପରିଷଦର ଡ. ଅଭିମନ୍ୟୁ ମିଶ୍ର, ଡ. ବି.ଏନ.ଶ୍ରୀକାନ୍ତ, ସନାତନ ଠାକୁର ପ୍ରମୁଖ ଯୋଗ ଦେଇଥିଲେ । ବିଜ୍ଞାନ

ତତ୍ତ୍ୱାବଧାରକ ସରୋଜ ନାୟକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆୟୋଜିତ ଏହି କାର୍ଯ୍ୟକ୍ରମରେ ୨୮ଗୋଟି ବିଜ୍ଞାନ ପ୍ରକଳ୍ପ ପ୍ରଦର୍ଶିତ ହୋଇଥିଲା । ବିଶ୍ୱର ପ୍ରତିଟି କ୍ଷେତ୍ରରେ ବିଜ୍ଞାନର ଉପଯୋଗ ନିତାନ୍ତ ଆବଶ୍ୟକ ଓ ବିଜ୍ଞାନ ହେଉଛି ଆଜିର ସମାଜର ପ୍ରଗତିଶୀଳ ପଥ ବୋଲି  ମୁଖ୍ୟ ଅତିଥି ଶ୍ରୀଯୁକ୍ତ ବେହେରା ନିଜ ଅଭିଭାଷଣରେ କହିଥିଲେ । ମୁଖ୍ୟ ବକ୍ତା ଶ୍ରୀଯୁକ୍ତ ମହାଲିଙ୍ଗ ନିଜ ବକ୍ତବ୍ୟରେ ବିଜ୍ଞାନ ମାଧ୍ୟମରେ ମଣିଷ ପ୍ରକୃତିକୁ ଜୟ କରିଚାଲିଛି ଓ ବିଜ୍ଞାନ

ଜଗତ ବିଶ୍ୱକୁ ନୂତନ ଭାବରେ ଦେଖିବାକୁ ଦୃଷ୍ଟି ଶକ୍ତି ପ୍ରଦାନ କରିଛି ବୋଲି କହିବା ସହ ମଣିଷର ପ୍ରୟୋଗ ଉପରେ ଉପକାର ଓ ଅପକାର ନିର୍ଭର କରେ ବୋଲି କହିଥିଲେ । ଏହି ଅବସରରେ ଜିଲ୍ଲା ସ୍ତରୀୟ  ବରିଷ୍ଠ ଓ କନିଷ୍ଠ ବିଭାଗର ବିଜ୍ଞାନ କୁଇଜ୍ ପ୍ରତିଯୋଗିତାର କୃତି ପ୍ରତିଯୋଗୀ ପଦ୍ମନାଭ ମନହିରା, ସୌମ୍ୟ ସୁଦୀପ କୁଅଁର, ନିକିତା ସ୍ୱାଇଁ, ବନାଗ୍ନୀ ମିଶ୍ର, ଗୋପବନ୍ଧୁ ସାହୁ ଓ ସୁବ୍ରତ ମହାପାତ୍ରଙ୍କୁ ପୁରସ୍କୃତ କରାଯାଇଥିଲା । ଏହି କାର୍ଯ୍ୟକ୍ରମରେ ସମସ୍ତ ଗ୍ରାମବାସୀ, ବିଦ୍ୟାଳୟର ଆଲୁମିନୀ କମିଟୀ, ଶିକ୍ଷକ ଶିକ୍ଷୟିତ୍ରୀ ସହଯୋଗ କରିଥିଲେ ।