16-Feb-2022

ସୁବର୍ଣ୍ଣପୁର,, ରାଜ୍ୟର ପ୍ରଥମ ନିର୍ବାଚନ କମିଶନର ତଥା ସୁବର୍ଣ୍ଣପୁର ଜିଲ୍ଲା ର ପ୍ରଥମ ଆଇ ଏ ଏସ ଅଧିକାରୀ ସ୍ବର୍ଗତ ଦେବେନ୍ଦ୍ର କୁମାର ମିଶ୍ର ଙ୍କ ବିୟୋଗ ରେ ସୋନପୁର ମହାରାଜା ହାଇସ୍କୁଲ ଶତାବ୍ଦୀ ସମ୍ବିଳନୀ କକ୍ଷ ଠାରେ ଏକ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଯାଇଛି l ମହାରାଜା ହାଇସ୍କୁଲ ର ପୁରାତନ ଛାତ୍ର ସଂଘ ଏବଂ ଜିଲ୍ଲା ବରିଷ୍ଠ ନାଗରିକ ସଂଘ ର ମିଳିତ ଆନୁକୂଲ୍ୟରେ ଆୟୋଜିତ ଏହି କାର୍ଯ୍ୟକ୍ରମ ରେ ପୁରାତନ ଛାତ୍ର ସଂଘ ର ସଭାପତି ଗୋରେଖନାଥ ସାହୁ ସଭାପତିତ୍ବ କରିଥିଲେ l ପ୍ରାରମ୍ଭରେ ସ୍ବର୍ଗତ ମିଶ୍ର ଙ୍କ ଫୋଟୋ ଚିତ୍ର ରେ ମାଲ୍ୟାର୍ପଣ କରି ଶ୍ରଦ୍ଧାଞ୍ଜଳି ଅର୍ପଣ ସହ ତାଙ୍କ ସ୍ମୃତି ଚାରଣ କରାଯାଇଥିଲା l ସେ ଜଣେ ପ୍ରତିଭାବାନ ବ୍ୟକ୍ତି ଥିଲେ l ସମଗ୍ର ପଶ୍ଚିମ ଓଡିଶା ବିଶେଷ କରି ସୁବର୍ଣ୍ଣପୁର ଜିଲ୍ଲା ର ସମୂହ ଉନ୍ନତି ସକାଶେ ସ୍ବର୍ଗତ ମିଶ୍ର ସର୍ବଦା ଚେଷ୍ଟିତ ରହିଥିଲେ l ପ୍ରଶାସନିକ କ୍ଷେତ୍ରରେ ମଧ୍ୟ ତାଙ୍କ ଅବଦାନ ବେଶ ଉଲ୍ଲେଖନୀୟ l ଚାକିରୀରୁ ଅବସର ନେବା ପରେ ମଧ୍ୟ ପଶ୍ଚିମ ଓଡିଶା ର ଉନ୍ନତି ସକାଶେ ସେ ପଶ୍ଚିମ ଓଡିଶା ଫୋରମ ଗଠନ କରିଥିଲେ l ଏକ ଉଚ୍ଚ ଶିକ୍ଷିତ ପରିବାରରୁ ଆସିଥିଲେ ମଧ୍ୟ ସେ ସବୁ ବର୍ଗ ଲୋକଙ୍କ ପ୍ରିୟ ଭାଜନ ହୋଇପାରିଥିଲେ l ସେ ଜଣେ କ୍ରୀଡ଼ାବିତ ମଧ୍ୟ ଥିଲେ l ଅନୁଷ୍ଠିତ ଶ୍ରଦ୍ଧାଞ୍ଜଳି ସଭାରେ ସଂଘ ଉପଦେଷ୍ଟା ଶରତ ଚନ୍ଦ୍ର ମହାନ୍ତି ମୁଖ୍ୟ ଅତିଥି ଏବଂ ପୁରାତନ ଛାତ୍ର ସଂଘ ର କାର୍ଯ୍ୟକାରୀ ସଭାପତି ପ୍ରଫେସର ନାରାୟଣ ପ୍ରସାଦ ରାୟଗୁରୁ, ସାଧାରଣ ସମ୍ପାଦକ ବ୍ୟୋମକେଶ ଦାଶ ଓ ଉପ ସଭାପତି ଇନ୍ଦ୍ରମଣି ଦାଶ ପ୍ରମୁଖ

ସମ୍ମାନିତ ଅତିଥି ଭାବରେ ଯୋଗ ଦେଇ ସ୍ବର୍ଗତ ମିଶ୍ର ଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରି ସ୍ମୃତି ଚାରଣ କରିଥିଲେ l ଶିକ୍ଷାବିତ ବାଳଗୋପାଳ ମହାପାତ୍ର, ପ୍ରଫେସର ଜ୍ୟୋତିରଞ୍ଜନ ବହିଦାର, ପ୍ରଫେସର ସନ୍ତୋଷ ପାଢ଼ୀ, ବିରଞ୍ଚି ନାରାୟଣ ମହାନ୍ତି, ସାମାଜିକ କର୍ମୀ ମଦନମୋହନ ଦାନୀ, ସାମ୍ବାଦିକ ମନୋରଞ୍ଜନ ତ୍ରିପାଠୀପ୍ରମୁଖ ଙ୍କ ସହ ଅନ୍ୟ ମାନେ ଯୋଗ ଦେଇ ସ୍ବର୍ଗତ ମିଶ୍ର ଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ l ଏହି ଅବସରରେ ସ୍ବର୍ଗତ ମିଶ୍ର ଙ୍କ ଆତ୍ମା ର ସଦଗତି କାମନା କରି ନୀରବ ପ୍ରାର୍ଥନା କରାଯାଇଥିଲା l ଶେଷରେ ପଦ୍ମନାଭ କର୍ଣ୍ଣ ଧନ୍ୟବାଦ ଅର୍ପଣ କରିଥିଲେ l