15-Dec-2021

ଲୋଇସିଂହା/ଆଗଲପୁର, (ବିନୋଦ କୁମାର ଦୀପ) ଆଗଲପୁର ବ୍ଲକ ରିନବଚନ ଗ୍ରାମର ଜଣେ ମହିଳାଙ୍କୁ ଉତ୍ତର ପ୍ରଦେଶ ରାଜ୍ୟର ଲଳିତପୁର ଜିଲ୍ଲା ସୋଜାନ ଥାନା ନିକୁରା ଗ୍ରାମରୁ ଆଗଲପୁର ପୋଲିସ ଉଦ୍ଧାର କରିବାରେ ସଫଳ ହୋଇଛି ବୋଲି ସୂଚନା ମିଳିଛି । ସୂଚନା ଅନୁସାରେ ରିନବଚନ ଗ୍ରାମର ସତ୍ୟାନନ୍ଦ ଦୀପଙ୍କ ଝିଅ ଗୀତୀଞ୍ଜଳି ଦୀପ ୫ ବର୍ଷ ତଳେ ସେହି ଗ୍ରାମର ସାର୍ତିକ ସୁଗ୍ରୀଙ୍କ ପୁଅ ଯୌତୁକ ସୁଗ୍ରୀକୁ ବିବାହ କରିଥିଲେ l ତାଙ୍କର ୪ ବର୍ଷର ଏକ କନ୍ୟା ସନ୍ତାନ ମଧ୍ୟ ଅଛି, ସୂଚନାରୁ ପ୍ରକାଶ ଯେ ବିବାହିତ ମହିଳା ଜଣକ ସେହି ଗ୍ରାମର ଗର୍ଜନ ବାଗଙ୍କ ପୁଅ ରାଧାକାନ୍ତ ବାଗଙ୍କ ସହ ପ୍ରେମ ସଂପର୍କ ଥିଲା, ଉଭୟେ ୧୦ ମାସ ପୂର୍ବେ ରାତ୍ରି ସମୟରେ ଫେରାର ହେବାସହ କିଛିଦିନ ତାଙ୍କ ଭିଣୋଇ ଘର ପଣ୍ଡରାଣୀ ଗ୍ରାମରେ ଥିଲେ l ଏହାପରେ ବରଗଡ ଜିଲ୍ଲା ମେଲଛାମୁଣ୍ଡାରେ ଘର ଭଡାନେଇ ରହୁଥିଲେ l ସେଠାରେ ଉକ୍ତ ମହିଳା ଜଣକ ଗର୍ଭବତୀ ହେବା ପରେ ରାଧାକାନ୍ତ ଗର୍ଭପାତ କରିବା ପାଇଁ ବାରମ୍ବାର ଚେଷ୍ଟା କରି ଆସୁଥିଲେ ହେଲେ ମହିଳା ଜଣକ ରାଜି ନହେବାରୁ ରାଧାକାନ୍ତ ସହ ତାଙ୍କ ଭିଣୋଇ ଓ ଭଉଣୀ ମିଶି ଷଡୟନ୍ତ୍ର ରଚିଥିଲେ ଓ ବାହାର ରାଜ୍ୟରେ ଚାକିରି ଲୋଭ ଦେଖାଇ, ସମ୍ବଲପୁର ନେଇ ଉତ୍ତର ପ୍ରଦେଶ ଲଳିତପୁରର ମୋହିତ କୁମାରଙ୍କୁ ଡାକି ପୀଡିତାଙ୍କୁ ଭଉଣୀର ପରିଚୟ ଦେଇଥିଲେ l ମୋହିତ କୁମାର ଏକ କମ୍ପାନୀର ମାଲିକ ଅଟନ୍ତି ତାଙ୍କ କମ୍ପାନୀରେ ଚାକିରି କରିବା ପାଇଁ ମିଥ୍ୟା ପ୍ରତିଶ୍ରୁତି ଦେଇ ଉତ୍ତର ପ୍ରଦେଶ ନେଇଯାଇଥିଲେ l ପିଡିତାଙ୍କ ଅଭିଯୋଗ ଅନୁସାରେ ରାଧାକାନ୍ତ ସେଠାରେ କିଛି ଟଙ୍କାରେ ବିକ୍ରି କରି କୌଶଳ କ୍ରମେ ସେଠାରୁ ଫେରାର ହୋଇଥିଲେ l ସମସ୍ତ ଘଟଣାର ଦଲାଲ ସାଜିଥିଲେ ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ଥାନା କନ୍ଦୁମୁଣ୍ଡା ଗାଁର ଅନନ୍ତ ଦୀପ ବୋଲି କୁହାଯାଉଛି l ଯେତେବେଳେ ମୋହିତ କୁମାର ଜାଣିଲେ ମହିଳା ଜଣକ ଗର୍ଭବତୀ ଅଛନ୍ତି ତାଙ୍କୁ ଆଶ୍ରୟ ଦେଇଥିଲେ l କିଛିଦିନ ଗଲାପରେ ଏକ କନ୍ୟା ସନ୍ତାନକୁ ଜନ୍ମ ଦେଇଥିଲେ ମହିଳା ଜଣକ l ମହିଳାଙ୍କ ବାପା ଏହା ଜାଣିବା ପରେ ଲୋଇସିଂହା ଓ ଆଗଲପୁର ପୋଲିସରେ ଅଭିଯୋଗ କରିଥିଲେ l ଅଭିଯୋଗକୁ ଭିତ୍ତିକରି ଆଗଲପୁର ଫାଣ୍ଡି ଅଧିକାରୀ ଦେବାର୍ଚ୍ଚନ ମିର୍ଦ୍ଧl ଓ କନେଷ୍ଟବଳ ରବିନ୍ଦ୍ର ଧରୁଆ ଗତ ୮ ତାରିଖ ଉତ୍ତର ପ୍ରଦେଶର ଲଳିତପୁର ଯାଇ ଉତ୍ତର ପ୍ରଦେଶ ସୋଜାନ ଥାନା ପୋଲିସ ସହାୟତାରେ ନିକୁରା ଗ୍ରାମରୁ ଉଭୟ ନବଜାତ ଶିଶୁ ଓ ମହିଳାଙ୍କୁ ଉଦ୍ଧାର କରି ଆଗଲପୁରକୁ ଆଣିଥିଲେ l ଅଭିଯୁକ୍ତ ବର୍ତମାନ ଫେରାର ଥିବାରୁ ଗିରଫ୍‌ କରାଯାଇ ନାହିଁ l ଏ ବିଷୟକୁ ନେଇ ତଦନ୍ତ ଜାରି ରହିଥିବା ଆଗଲପୁର ପୋଲିସ ପ୍ରକାଶ କରିଛି l ପୀଡିତା ମହିଳା ଓ ତାଙ୍କ ବାପା ଦୋଷୀକୁ ଶୀଘ୍ର ଗିରଫ କରିଵା ସହ କାର୍ଯ୍ୟାନୁଷ୍ଠାନ କରିବା ଲାଗି ଦାବୀ କରିଛନ୍ତି l ପୋଲିସ କେତେ ଶୀଘ୍ର ଫେରାର ଅଭିଯୁକ୍ତକୁ ଧରି କେବେ କାର୍ଯ୍ୟନୁଷ୍ଠାନ ନେଉଛି ତାହା ଦେଖିବାକୁ ରହିଲା l