14-Dec-2021

ବଲାଙ୍ଗୀର (ପ୍ରେରଣା ଖବର ବ୍ୟୁରୋ) ::- ସରକାର ସ୍ୱଚ୍ଛ ଏବଂ ସବୁଜ ପରିବେଶ ପାଇଁ ଅନେକ ଯୋଜନା କରିଛନ୍ତି । ପ୍ରତି ଜିଲ୍ଳାରେ ସ୍ଵଚ୍ଛ ପରିବେଶ ସୃଷ୍ଟି ପାଇଁ ସ୍ୱଚ୍ଛ ଭାରତ ମିଶନ ଯୋଜନାରେ ଏସ ଏଚ ଜି ଗ୍ରୁପ ରୁ ସ୍ୱଚ୍ଛ ସାଥୀ ମାନଙ୍କୁ ସ୍ୱଳ୍ପ ପାରିଶ୍ରମିକ ରେ ନିୟୋଜନ କରାଯାଇଛି ।ମୁନିସିପାଲିଟି  ର ପ୍ରତ୍ୟକ୍ଷ ତତ୍ତ୍ଵାବଧାନରେ ଏହି ସ୍ୱଚ୍ଛ ସାଥୀ ମାନଙ୍କୁ ନିଯୁକ୍ତି ଦେଇ କାର୍ଯ୍ୟ କରାଇଥାଏ । ସ୍ୱଚ୍ଛ ସାଥୀ ମାନଙ୍କ କାମ ତଦାରଖ ପାଇଁ ସୂପରଭାଇଜର ମାନଙ୍କୁ ନିଯୁକ୍ତି ଦିଆଯାଇଛି । ଓଡ଼ିଶା ର ପ୍ରତି ଜିଲ୍ଲାରେ ଏହି କାର୍ଯକ୍ରମ ଚାଲିଅଛି । ବଲାଙ୍ଗୀର ଜିଲ୍ଲାରେ ଥିବା ଏସ ଏଚ ଜି ଗ୍ରୁପ ମାନଙ୍କ ମଧ୍ୟରୁ ୩୬ ଜଣ ମହିଳା ଙ୍କୁ ସ୍ୱଚ୍ଛ ସାଥୀ ଭାବରେ ନିଯୁକ୍ତି ମିଳିଥିବା ବେଳେ ଏମାନଙ୍କ କାର୍ଯ୍ୟ କୁ ତଦାରଖ କରିବା ପାଇଁ ୯ ଜଣ ମହିଳା ଙ୍କୁ ସୂପରଭାଇଜର ଭାବେ ନିଯୁକ୍ତି ଦିଆଯାଇଛି । 
  ସ୍ୱଚ୍ଛ ସାଥୀ ୱାର୍ଡ ବୁଲି ସଫେଇ କର୍ମଚାରୀ ମାନଙ୍କ ସହ ସଫେଇ କାର୍ଯକ୍ରମ ତଦାରଖ କରିବେ । ବିଭିନ୍ନ ସ୍ଥାନରେ ପଡ଼ିଥିବା ଅଳିଆ ଆବର୍ଜ୍ଜନା କୁ ଟ୍ରାକ୍ଟର, ଜେ ସି ପି, ବଭ, ଏଲ ସି ଭି ଭଳି ଗାଡ଼ି ରେ ଉଠାଇ ସଫା କରିବାର ଦାୟିତ୍ବ ସ୍ୱଚ୍ଛ ସାଥୀ ମାନଙ୍କର ନିତିଦିନିଆ କାମ । ନାଳ ନର୍ଦ୍ଦମା ପରିଷ୍କାର ପରିଚ୍ଛନ୍ନ ରଖିବା ସହ ପ୍ରତିଦିନ ସୁଇପର ମାନଙ୍କ ଉପସ୍ଥାନ ନେଇ କାମ କରେଇବା ।ଗୃହ ମାନଙ୍କରୁ ବାହାରୁଥିବା ଅଳିଆ କୁ ବର୍ଜ୍ୟବସ୍ତୁ ପରିଚାଳନା କେନ୍ଦ୍ର କୁ ପଠାଇବା ନିତିଦିନିଆ କାମ ।
  ଏହା ବ୍ୟତୀତ ୱାର୍ଡ ରେ ଥିବା ଘର,ଦୋକାନ,ବଜାର ମାନଙ୍କ ଠାରୁ ୟୁଜର ଫି ଆଦାୟ କରିବା । ୟୁଜର ଫି ଆଦାୟ ବେଳେ ଅନେକ ସ୍ଥାନରେ ଅପ୍ରୀତିକର ପରିସ୍ଥିତି  ସମ୍ମୁଖିନ କରୁଥିବା ଦେଖିବାକୁ ମିଳୁଛି । ୟୁଜର ଫି ଆଦାୟ ବେଳେ ଅନେକ ସ୍ଥାନରେ ମାନସିକ ନିର୍ଯାତନା ର ଶିକାର ହେଉଥିବା ଦେଖିବାକୁ ମିଳୁଛି ।ଉପରିସ୍ଥ ଅଧିକାରୀଙ୍କୁ ଅଭିଯୋଗ କରିଥିଲେ ମଧ୍ୟ କୌଣସି ପ୍ରତିକ୍ରିୟା ଜଣାପଡିନାହିଁ । ସଫେଇ କାର୍ଯ୍ୟ ବ୍ୟତୀତ ମୁନିସିପାଲିଟି ର ସମସ୍ତ ସର୍ଭେ କାମରେ ଏମାନଙ୍କୁ ନିୟୋଜିତ କରାଯାଇଛି । କରୋନା ଟିକା ସର୍ଭେ, ଘର ଘର ବୁଲି ଔଷଧ ଦେବା,ଆଧାର ସର୍ଭେ,ପାଇଖାନା ସର୍ଭେ,ଆବାସ ଯୋଜନା ସର୍ଭେ ସହ ସମସ୍ତ ସଫେଇ କାର୍ଯ୍ୟ କରିବାକୁ ପଡୁଛି । ମୁନିସିପାଲିଟି ର ୱାର୍ଡ ଅଫିସର କରିବା କାମ ମଧ୍ୟ ଏମାନଙ୍କୁ କରିବାକୁ ପଡୁଛି । ସ୍ୱଚ୍ଛ ସାଥୀ ମାନଙ୍କୁ ଗୋଟିଏ ୱାର୍ଡ ରୁ ଆଉ ଗୋଟିଏ ୱାର୍ଡ କୁ ବୁଲି କାମ କରିବାକୁ ପଡୁଛି । 
  ଏତିକି ରେ ସ୍ୱଚ୍ଛ ସାଥୀ ମାନଙ୍କ କାମ ସରି ଯାଉନାହିଁ । ସେମାନେ ଏହି କାମ ପରେ ବଲାଙ୍ଗୀର ଠାରୁ ୫/୬ କିଲୋମିଟର ଦୂରରେ ବିଜାଖମନ୍ ଠାରେ ଥିବା ବର୍ଯ୍ୟ ବସ୍ତୁ ପରିଚାଳନା କେନ୍ଦ୍ର( ଏମ ସି ସି ) କୁ ଯାଇ ସେହି କାର୍ଯ୍ୟ କୁ ତଦାରଖ କରିବାକୁ ପଡୁଛି । ସେଠାକୁ ଯିବା ପାଇଁ ସ୍ୱଚ୍ଛ ସାଥୀ ନିଜ ପାକେଟ ରୁ ଟଙ୍କା ଖର୍ଚ୍ଚ କରି ନିଜ ସାଧନାରେ ଉକ୍ତ ସ୍ଥାନକୁ ଯାଉଥିବାରୁ ଖର୍ଚ୍ଚାନ୍ତ ହେବାକୁ ପଡୁଛି । ସ୍ୱଚ୍ଛ ସାଥୀ ମାନଙ୍କ କାମ କରିବା ର ସମୟ ସାରଣୀ ନାହିଁ । ଯେତେବଳେ ଯେଉ ମୁହୂର୍ତ୍ତରେ ଡାକିଲେ ଉପସ୍ଥିତ ରହି କାମ କରିବାକୁ ପଡୁଛି ।
  ତେବେ ଏଠି ପ୍ରଶ୍ନ ଉଠେ ଏମାନେ ଦରମା ପାଆନ୍ତି କେତେ? ଜଣେ ସ୍ୱଚ୍ଛ ସାଥୀ ଦିନସାରା ପରିଶ୍ରମ କରି ପାଏ କେତେ ? ମାତ୍ର ୪୦୦୦ ଟଙ୍କା । ସେହି ୪୦୦୦ ଟଙ୍କାରୁ ମଧ୍ୟ ବାଟ ମାରଣ ହେଉଥିବା ଚର୍ଚ୍ଚା ହୁଏ । କିଛି ସ୍ଵୟଂ ସହାୟକ ଗୋଷ୍ଠୀର ସଭାପତି ସମ୍ପାଦକ ଏମାନଙ୍କ ଦରମାରୁ ୧୦୦୦ ରୁ ୨୦୦୦ ପର୍ଯ୍ୟନ୍ତ ଟଙ୍କା କାଟି ଦେଉଥିବା ଚର୍ଚ୍ଚା ହୁଏ । ନିରୁପାୟ ହୋଇ ପୁଣି ସକାଳ ହେଲେ ଲାଗିଯାଇଥାନ୍ତି ତାଙ୍କ କାମରେ ।ଗୁହାରି କରିବେ କାହାକୁ ? ବାଧ୍ୟ ହୋଇ କମ୍ ଟଙ୍କା ନେଇ ଲୁହଭରା ଆଖିରେ କାମରେ ଲାଗି ଯାଆନ୍ତି ।ଯଦି ସ୍ୱଚ୍ଛ ସାଥୀ ମାନଙ୍କ ମାସିକ ପାଉଣା ତାଙ୍କ ବ୍ୟକ୍ତିଗତ ଜମା ଖାତା ରେ ଜମାକଲେ  ଉପକୃତ ହେବାର ଆଶା ଦେଖାଯାଏ ।
  ସ୍ୱଚ୍ଛ ସାଥୀ ମାନେ କାମ କଲା ବେଳେ ସମ୍ମୁଖିନ ହେଉଥିବା ସମସ୍ୟା ର ସମାଧାନ କଲେ ଆଗାମୀ ଦିନରେ କାମ କରିବାରେ ଉତ୍ସାହିତ ହେବେ ।ଏଥିପ୍ରତି ଉଚ୍ଚ କତୃପକ୍ଷ ଧ୍ୟାନଦେଲେ ଆଗକୁ ଆସୁଥିବା ସମସ୍ୟା କୁ ରୋକାଯାଇ ପାରିବ ।