07-Dec-2021

ଭୁବନେଶ୍ୱର, ୟୁନିଟ-୪ ସ୍ଥିତ ମସଜିଦ ଡମନ୍ ଠାରେ ଭୁବନେଶ୍ୱର ମଜଲିସ ଖୁଦ୍ଦାମୁଲ ଅହମଦୀୟା ଯୁବ ସଂଗଠନର କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଛି । ଏହି ବୈଠକରେ ମୁଖ୍ୟ ଅତିଥି ଭାବେ ଜିଲ୍ଲା ଖୋର୍ଦ୍ଧା ଓ ନୟାଗଡ଼ର ଅହମଦୟା ମୁସଲିମ ଯୁବ ସଂଗଠନ ସଭାପତି ତବରେଜ ଅହମଦ ଖାଁ ଯୋଗ ଦେଇଥିଲେ  । ପବିତ୍ର କୋରାନ ପାଠ ଶମିମ ଅହମଦ କରିବା ସହ ବୈଠକ କାର୍ଯ୍ୟ ଆରମ୍ଭ ହୋଇଥିଲା ।  ଏହି ବୈଠକରେ ମୌଲାନା ଫଜଲ ହକ ଖାଁ ପୌରୋହିତ୍ୟ କରିଥିଲେ । ମୁଖ୍ୟ ବକ୍ତା ଭାବେ ଯୋଗଦେଇ ଭୁବନେଶ୍ୱର ଅହମଦୀୟା ଯୁବ ସଂଗଠନର ସଭାପତି ସମିର ଅହମଦ କହିଲେ; ଉତମ ସମାଜ ଗଢିବାରେ ଯୁବକମାନଙ୍କ ଭୁମିକା ବହୁତ ଗୁରୁତ୍ୱପୂର୍ଣ୍ଣ ହୋଇଥାଏ । ଯୁବକମାନଙ୍କ ଗତିରେ ହିଁ ଦେଶର ଓ ସମାଜର ପ୍ରଗତି ରହିଛି ।  ଯୁବକମାନେ ଶୃଙ୍ଖଳିତ ହୋଇ ଭଲ କର୍ମ କରିବା ଦରକାର । 
         ମୁଖ୍ୟ ଅତିଥି ତବରେଜ ଅହମଦ ଖାଁ କହିଲେ; ଯୁବକମାନଙ୍କୁ ଏବେ ଶିକ୍ଷା କ୍ଷେତ୍ରରେ ଭଲ ଅବସର ମିଳୁଛି । ଭଲ ପାଠ ପଢି ଭଲ ସମାଜ ଗଢିବା ଉଚିତ୍ । ସଭାପତିତ୍ୱ ଭାଷଣରେ ମୌଲାନା ଫଜଲ ହକ ଖାଁ କହିଲେ; ବାପ-ମା ମାନେ ଯଦି ସନ୍ତାନର ସଠିକ ଯତ୍ନ ନଅନ୍ତେ ତେବେ ପିଲାଟି ଦିନରୁ ତାଙ୍କର ଚିନ୍ତାଧାରା ଭଲ ହୁଅନ୍ତା । ଏବେ ଆମେ ପାଶ୍ଚାତ୍ୟ ଜଗତର ସଭ୍ୟତାକୁ ଆପଣାଇବା ଦ୍ୱାରା ସନ୍ତାନମାନଙ୍କ ଉପରେ ତାର ଘୋର କୁପ୍ରଭାବ ପଡ଼ିଛି । ଫଳରେ ଆମେମାନେ ଆମର ସଭ୍ୟତା, ସଂସ୍କୃତି, ଶିଷ୍ଟାଚାର, ଗୁରୁଭକ୍ତି ତଥା ଭାରତ ବର୍ଷର ଐତିହ୍ୟକୁ ଭୁଲି ଯାଉଛୁ । ଆମମାନଙ୍କ ମଧ୍ୟରେ ସେ ମାନବିକତା ଓ ଏକାଗ୍ରତା ନାହିଁ । ସାଂସାରିକ ଭୋଗବିଳାସ, ଭଲ ଖାଇବା, ଭଲ ପିନ୍ଧିବା ଏବଂ ନିଜେ ଭଲରେ ରହିବା ହିଁ ଜୀବନର ମୂଳ ଲକ୍ଷ ହୋଇ ଯାଇଛି । ଧର୍ମକର୍ମରେ ଆଗେଇବା ତଥା ମାନବ ସେବା ଓ ପରୋପକାରୀ ହେବା ପାଇଁ ଯୁବକମାନଙ୍କୁ ସେ ଆହ୍ୱାନ ଦେଇଥିଲେ । 
      ଏହି ବୈଠକରେ ଉପସଭାପତି ସେକ ରମଜାନ, ପୂର୍ବତନ ଯୁବ ସଭାପତି ଅହମଦ ସଲାମ, ମୁଖତାର ଅଲି, ସୟଦ ତାହେର ଅହମଦ, ସଲାଉଦ୍ଦିନ ଖାଁ ଏବଂ କମାଲ ଅହମଦଙ୍କ ବ୍ୟତୀତ ଅନେକ ଯୁବ ସଂଗଠନର କର୍ମକର୍ତାମାନେ ଯୋଗ ଦେଇଥିଲେ ।