05-Dec-2021

ନୟାଗଡ଼ (ପ୍ରଦୀପ କୁମାର ପଣ୍ଡା): ଆଜି ବିଶ୍ୱ ମୃତ୍ତିକା ଦିବସ । ଏହି ଅବସରରେ ନୟାଗଡ଼ ଜିଲ୍ଲା ପ୍ରଶାସନ ପକ୍ଷରୁ ମୃତ୍ତିକା ଦିବସ ପାଳନ କରାଯାଇଛି । ନୟାଗଡ଼ ଡି.ଆର.ଡି.ଏ ସମ୍ମିଳନୀ କକ୍ଷ (ସୃଜନ) ଠାରରେ ଜିଲ୍ଲା ସ୍ତରୀୟ ମୃତ୍ତିକା ଦିବସ ପାଳିତ ହୋଇ ଯାଇଛି । ଜିଲ୍ଲାପାଳ ଡ.ପୋମା ଟୁଡୁ ଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭା ରେ ମୁଖ୍ୟ ଅତିଥି ଭାବରେ ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ତଥା ରଣପୁର ବିଧାୟକ ଶ୍ରୀଯୁକ୍ତ ସତ୍ୟନାରାୟଣ ପ୍ରଧାନ ଯୋଗ ଦେଇ ବିଶ୍ୱ ମୃତ୍ତିକା ଦିବସ ପାଳନ ର ମହତ୍ତ୍ୱ ବର୍ଣ୍ଣନା କରିବା ସହ ନୟାଗଡ଼ ଜିଲ୍ଲାର ମୃତ୍ତିକା ଅତି ଉନ୍ନତ ମାନର ଏବଂ ଏଥିରୁ ଅତି ଉନ୍ନତ ମାନର ଧାନ, ମୁଗ, ଆଖୁ ଏବଂ ବିଭିନ୍ନ ପନିପରିବା ଅମଳ ହେଉଥିବା କଥା ବକ୍ତବ୍ୟରେ ରଖିଥିଲେ । ମୁଖ୍ୟତଃ ଜିଲ୍ଲା ମୃତ୍ତିକା ଦିବସ ର ବିଷୟବସ୍ତୁ ଥିଲା ମୃତ୍ତିକା ଲବଣୀକରଣ କୁ ରୋକନ୍ତୁ ଏବଂ ମୃତ୍ତିକା ର ଉତ୍ପାଦିକା ଶକ୍ତି ବୃଦ୍ଧି କରନ୍ତୁ । ଏହା ଉପରେ ଆଲୋଚନା କରାଯାଇଥିଲା । ଅନ୍ୟ ମାନଙ୍କ ମଧ୍ୟରେ ପଞ୍ଚାୟତ ସମିତି ନୟାଗଡ଼ ର ଅଧ୍ୟକ୍ଷା ଶ୍ରୀମତୀ ଗୋଲାପ ଦଳ ବେହେରା, ଆତ୍ମା ନୟାଗଡ଼ର ଅଧ୍ୟକ୍ଷା ଶ୍ରୀ ରାଜେନ୍ଦ୍ର କୁମାର ନାୟକ, ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ଶ୍ରୀମତୀ ପୁଷ୍ପାଞ୍ଜଳୀ ପାଇକରାୟ, ଉଦ୍ୟାନ କୃଷି ଉପନିର୍ଦ୍ଦେଶକ ଶ୍ରୀ ମୁରଲୀଧର ବେହେରା, କୃଷି ବିଜ୍ଞାନ କେନ୍ଦ୍ରର ବରିଷ୍ଠ ବେଜ୍ଞାନିକ ଶ୍ରୀ ବାଦଲ କୁମାର ମହାନ୍ତି ପ୍ରମୁଖ ଅତିଥି ଭାବରେ ଯୋଗଦାନ କରି ମତାମତ ରଖିଥିଲେ । ଡାଲି ଗବେଷଣା କେନ୍ଦ୍ର ର ବିଶେଷଜ୍ଞ ଅପର୍ଣ୍ଣା ପ୍ରିୟଦର୍ଶନୀ ପାତ୍ର ବିଭିନ୍ନ ଜୈବିକ ସାର ର ବିଶେଷତ୍ୱ ଏବଂ ତା’ର ପ୍ରୟୋଗ ଉପରେ ଆଲୋକପାତ କରିଥିଲେ । ଜିଲ୍ଲା ମୁଖ୍ୟ କୃଷି ଅଧିକାରୀ ବିଜୟ କୁମାର ପ୍ରଧାନ ଏବଂ ମୃତ୍ତିକା ପରୀକ୍ଷାଗାରର ସହକାରୀ ନିର୍ଦ୍ଦେଶକ ଓ ମୃତ୍ତିକା ବିଶେଷଜ୍ଞ ଦିପ୍ତୀକାନ୍ତ ରାଉତରାୟ ଉକ୍ତ କାର୍ଯ୍ୟକ୍ରମକୁ ପରିଚାଳନା କରିଥିଲେ । ନୟାଗଡ଼ ବ୍ଲକର ୩୦ ଜଣ ଚାଷୀଙ୍କୁ ମୃତ୍ତିକା ସ୍ୱାସ୍ଥ୍ୟ କାର୍ଡ ପ୍ରଦାନ କରାଯାଇଥିଲା ।